新奇ê事
1925.01 478卷 p.11-12
(K. T. S.)
近日tī中洲有一人飼一隻豬差不多11月日ê久；koh飼一隻牛差不多4月日ê久。豬佮牛攏是tuì別位買來飼--ê。這隻豬已經bē--人定著，買豬ê人就beh來掠去thâi,就用liù-chhoê kā伊liù,就用索teh kā伊縛；豬bē免得大聲哮到吱吱叫。這隻牛是赤牛，聽見伊ê好友teh哮，看見人teh kā伊縛，就盡力chhoah斷伊所縛ê索，走到豬ê所在；將伊兩支ê前角kā伊áⁿ-tiâu-teh，哮到o͘N3-o͘N3-kiò;將伊ê角beh觸對敵；致到掠豬ê人走了了；有ê用爬來走離，有ê舉槌來扑hit隻牛。伊攏無驚疼，雖然hō͘人直直扑，伊亦攏無小可ê忍--neh，來顧伊ê身體。豬就走到牛寮內，牛就走到牛寮ê門口，將頭àⁿ下牛寮內；身軀toà外面，án-ni來保守。
平日這隻牛若teh食草，若看著這隻豬來，連草也無khoà食；就將伊ê頭tuì這隻豬來戲弄。這隻豬就歡喜倒tī伊ê面前，牛就將伊舌遍身kā伊洗。án-ni看，這隻牛佮這隻豬疼情m̄知有偌大？這隻牛phoe命來救這隻豬，無想伊比這隻豬加偌大ê功勞，加大大ê尊貴；怎樣歡喜佮結交做朋友？怎樣phoe命到án-ni？
今仔日咱ê聖會算是世界上第一文明ê宗教敢m̄是tuì相疼來建立，來設成堅固ê教會。現時咱ê教會ê指導者敢有攏總較贏頂面hit兩隻ê精牲抑--無？若是有人較贏，穩當無久全台會攏來歸主。向望人人會為著這個款受大小感激；thang致意tī chiah ê序細ê會友。 |
