Kò͘ Si̍t-chhoan Chèng-kiú Sian-seⁿ
1925.02 479 koàn p.10-11
(Lâu Chín-hong)
Si̍t-chhoan(Uemura) Sian-seⁿ put-hēng tī chiaⁿ-goe̍h peh-ji̍t ngó͘-hō͘ oá 6 tiám teh chia̍h-pn̄g tiong, hut-jiân náu ek-hoeh, siū Siōng-tè kéng-tiàu i lī-khui sè-kan. Hióng-siū 69 hoè.
Tī pún-goe̍h 12 ji̍t ngó͘-chiân 10 tiám tī i pún kàu-hoē (Hù-sū-kiàn-teng) ū kú-hêng kàu-hoē-chòng. Chit ji̍t ê hoē-chòng-chiá, m̄-nā choân-kok Ji̍t-pún Ki-tok kàu-hoē ū phài tāi-piáu lâi hoē-chòng nā-tiāⁿ, í-goā iáu ū Sian-seⁿ seⁿ-chêng só͘ kau-poê hoē-goā ê ti-kí, bêng-sū, lâi-lia̍t-sek iā bē-chió. Put-chí chòng-giâm, sēng-tāi ê kò-pia̍t-sek.
Tī-chia lūn Sian-seⁿ ê sū-gia̍p loā-ni̍h teh sêng-kong, á-sī tuì kàu-hoē, siā-hoē, loā-ni̍h hi-seng kòng-hiàn, chit-hō sū, m̄-bián goá koh tī chia têng pâi-lia̍t, lia̍t-uī toā to-sò͘ sī pêng-sò͘ chiau-chai ê só͘-chāi.
Sian-seⁿ tī hoē-lāi m̄-bián kóng, chiū hoē-goā, á-sī khah-hn̄g kàu Au-bí iā sī ji̍t-siông hō͘ lâng só͘ teh khim-gióng, kèng-ho̍k ê jîn-bu̍t. Ná chún kò-pia̍t-sek hit-ji̍t i ê tiàu-tiān, í-ki̍p tiàu-sû sī hiah-ni̍h chē, tì-kàu bē-thang it-it tha̍k tī lâng ê bīn-chêng. Kan-ta tuì chit-hāng lán thang chhui-chhut, chò put-chí bêng ê chèng-kù. iū-koh Sian-seⁿ m̄-nā kan-ta sī chò chhut-miâ ê ha̍k-chiá, koh chi̍t-bīn sī toā sìn-gióng-ka, hui-siông ê jîn-keh-chiá, kó-jiân sī lêng-kài ê uí-jîn eng-hiông.
Sian-seⁿ sui sī chèng-lâng só͘ kong-jīn, m̄-sī hiông-piān-ka, gâu ián-soat. iáu-kú tī só͘ soat2-kàu-tiong, chhâi-liāu ê hong-hù, loē-iông ê chhiong-si̍t, í-ki̍p ū oa̍h-khì ê giân-sû, kàu-gia̍h ū thang kám-tōng, kiò chhéⁿ lâng ê lêng-le̍k. Ū chi̍t khoán ê kè-tì, iā sī chèng-lâng só͘ sêng-jīn. M̄-nā án-ni, Sian-seⁿ goân-lâi thâu-náu bêng-sek, tōng-chok bín-chia̍t, put-chí ū to̍k-chhòng-tek ê cheng-sîn, chin-chiàⁿ thang kóng ū chhiau-kûn poa̍t-chiòng ê thian-châi. I ê kàu-hoē kin-á-ji̍t ē hiah-ni̍h toā-keng, hiah-ni̍h chìn-pō͘; hoat-tián, chi̍t-bīn kiám-chhái ū-iáⁿ sī hō͘ chhiú-oán só͘ tì-ìm, iáu-kú khah toā pō͘-hūn, bô m̄-sī tuì Sian-seⁿ phāu-chiong-sí it-koàn ê sìn-gióng, phun-pho tī tang-sai, tì-kàu ū-sî bē kì-tit ê-hng chá-khí; ná-chún Sèng-keng kóng, "Hoan-hù lí tio̍h thoân tō-lí, bô-lūn tek-sî put tek-sî, tio̍h choan-bū i, ēng pah-poaⁿ ê khoan-iông kà-sī lâi chek-pī, kéng-kài, khoàn-bián" (2 Thê. 4:2). Si̍t-chāi Sian-seⁿ it-seng sī chò kàu-hoē ê tiong-po̍k, in-khîn chû-sim ê bo̍k-chiá. Sèng-keng kóng, "Í-keng cheng-chiàn hó ê cheng-chiàn, í-keng chīn pháu-cháu ê lō͘ chām, í-keng siú só͘ sìn ê tō-lí"(2 Thê. 4:7), cha̍p-hun thang chò lán sìn-chiá-kan ê bô͘-hoān.
àm-chēⁿ siūⁿ Sian-seⁿ tuì lán Tâi-tó put-lūn kò-jîn, á-sī it-poaⁿ, ti̍t-chiap á-sī kàn-chiap, i siông-siông piáu-chhut tông-chêng. Tuì i chi̍t-khoán suí ê cheng-sîn, lán ài hián-chhut kám-in ê sim. Ná-chún tī chòng-sek hit-ji̍t m̄-nā goá chi̍t lâng, chiū to-sò͘ ê lâng, khoàⁿ-tio̍h tiûⁿ-lāi hit-khoán kong-kéng, hit-khoán hiān-siōng,chū-jiân nâ-âu-kńg tīⁿ, pu-ti put-kak ê tiong-kan ba̍k-sái iā bô sè-jī ná hō͘ ti̍t-lo̍h.
Choè-hō͘ ǹg-bāng lán tī kî-tó-tiong uī-tio̍h i ê uî-cho̍k, í-ki̍p i ê sū-gia̍p (Tang-kiaⁿ Sîn-ha̍k-siā, Kàu-hoē, Cha̍p-chì-siā) lâi saⁿ siàu-liām.
