首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 小傳陳鹿先生
小傳陳鹿先生
卷期：第480卷 本次： 日期：1925/3 刊名：台南府城教會報 頁數：11
篇名：小傳陳鹿先生 [ Sió-toān Tân Lo̍k Sian-siⁿ ]
作者：潘道榮 Phoaⁿ Tō-êng
  顯示 : 漢羅 全羅 並列  

小傳
陳鹿先生
1925.03 480卷 p.11-13
(潘道榮)
先生是澎湖湖西庄西溪ê人，出世tī明治23年。伊ê 祖上濟濟攏有進學，所以伊tī 細漢ê 時父母就送伊入書房講究漢學。 後--來有去讀公學校6年久，伊著優等 ê 卒業。學校ê先生愛惜伊ê才調，就留伊tiàm本校做教員。伊是真誠心敬神明ê人；每日對學--ni̍h 歇工轉--來，就隨時去燒香點燭。
雖然身居教育ê職，為著hiah-ni̍h 熱心teh敬重神明，總--是tī 伊ê 心內不時有teh 掛慮1項，就是：「人到死後m̄知啥款?」所以有1擺bat決心beh 離開某子去做菜友。
抵好有一年ê夏期休夏中，受上官派過來台灣赴教員ê 講習會。有朋友chhoā伊去太平境ê 拜堂禮拜，hit日抵抵是故宋中堅牧師teh說教。題目是「貪財是萬惡ê根源」（1 Thê.6:10）。伊聽了心中暗暗有感激ê所在，就想beh來信耶穌教。到講習會明白beh轉--去ê時，有朋友報伊來新樓冊房買1本「天道溯源。」伊就暝日勤勤讀hit本冊。對án-ni那明基督教ê道理是真實，就好膽放sak前所尊重ê鬼神，來敬拜上帝。
Tī伊ê本鄉攏無人信主。Hit時抵好楊世註牧師tiàm tī媽宮1 做澎湖宣道會ê牧師。伊就招楊牧師去in西溪設1間福音堂。 可惜後--來in二位攏過來台灣，也無別人 thang 繼續鼓舞，致到chit-tia̍p煞廢止--去。
今伊對信主了後，真致意稽考聖經ê道理，就tī媽宮對楊牧師領洗禮。Koh 過無偌久，續獻身beh來做主ê工。所以tī 大正7年，就來入神學校讀冊4年久。Tī學中凡事佮朋友真和睦，也gâu敬重先生。伊ê 天資明敏，讀冊也勉強，所以卒業第一名。傳道局就派伊去tiàm東港ê教會；tī hia 兩年久。
大正13 年4月間，又koh受傳道局kā伊轉任去tiàm北港。去hia 倚兩月外日，出力佈道，巡視友會，煞抵著嚨喉起痛，無聲thang做工，就來醫館打tia̍p差不多3禮拜久。到較好，就koh轉去做工。 咱知北港是咱台灣佛教ê 重要地；咱ê 教會設立未偌久，信徒iáu少，koh軟弱；現在ê拜堂是用稅--ê;狹狹無合用。抵好廉牧師去巡教會，就佮伊去chhoē地，備辦thang建築新拜堂。
因為伊ê嚨喉病猶未十分好，傷出力做工，致到嚨喉ê病koh發作較傷重。伊本身teh想，著暫時歇睏較好，所以就轉去in澎湖。心意是想beh療養身命；總--是看著本鄉親人ê烏暗，就無惜著本身破病ê身体，猶原chhoē機會佈道。Bat有人譏刺講伊病是去hō͘北港媽thāu著、毒著，in ê北港媽是較聖；叫伊m̄-thang傳hit號番仔教。雖然是án-ni,先生攏無tàm志，猶原好膽干証主ê名。
對án-ni伊ê症頭那沉重。Tī舊年10月間就koh過來台南新樓醫館打tia̍p。照醫生kā伊診斷，chit號病症真為難。日過日身体那軟弱，bē食、bē起--來。到正月18暝，抵好是禮拜暝昏，倚8點鐘，就手舉懸，比對天頂去，kā伊ê婦人人講：「我beh轉--去lah。」就án-ni安然過氣，去天堂佮主tiàm。享壽36歲。
隔日，就是19 e晡3點鐘，巴博士做主理，執行葬式ê禮拜。來會葬--ê倚有200人。有ê真遠，親像對東港教會有林燕臣牧師佮in ê長老、執事做代表；其餘有伊ê先生、朋友佮教會信主ê人來赴chit個葬式。濟濟人看了無m̄傷心流目屎。
禮拜煞，自翕像。然後才送伊去埋 tī台南教會ê 公?--ni̍h。
論先生tiàm世間，伊ê歷史卻是短短。總--是鄙人對所看、所聽ài koh加寫幾句，ǹg望會thang做咱ê利益。
(1)真gâu吞忍。Tī 破病中，伊m̄-bat 對某子來摔sau、抑是對朋友來講甚物怨天尤人ê話。 常常是歡喜交陪主，備辦聽候主ê chín召。伊知伊ê病無thang koh ǹg 望tiàm世間；所以伊ê婦人人勸伊著熱心toè主耶穌。卻做人tī地上bē免得有人情tī --leh,因為若有伊ê好朋友來看--伊；伊本身就流目屎。意思就是koh無偌久著佮伊所疼ê朋友分離。
(2)做主盡忠ê奴僕 。伊本身m̄是甚物gâu說教ê先生。M̄-kú伊tī 禮拜早起攏禁食祈禱，才說教；所以所講ê道理有大感動心ê心。伊真gâu chhoē機會佈道，gâu体恤艱苦ê人。伊ê性質真溫純，hō͘囡仔真好親近。所以聽著伊過身，連伊所教主日學ê學生也流目屎。
(3)伊gâu疼教會，教會也真疼伊。論伊病中ê kiàn bú,或是傳道局、個人hit 號m̄免講起。先生已經離東港ê教會，總--是hiaê 會友聽見伊ê 破病，就替伊祈禱、寄錢、備辦藥、送物等等。到死ê時，koh寄50箍來慰問伊ê遺族。卻北港ê教會也有差人佮帶錢來弔喪，這也是對主真saⁿ帶著。鄙人看了，心真受感激。因為先生實在有好ê人格thang感動會友ê 心。Chit號ê 教會thang 講是 「仁愛ê教會」。 ǹg望主kā lín 祝福，hō͘ lín 那gâu 顯出仁愛ê果子，來做別教會ê模樣。
(4)看破世間。伊m̄-nā 獻本身做傳教ê工nā-tiāⁿ。伊有將所用得ê現金3、4千箍攏hō͘伊ê兄弟--去，無佮伊分。只有分淡薄較m̄成物ê田園，káⁿ值有成千箍。若有錢，伊較常ài 買新冊來講究。伊也想伊本身獻hō͘主是無夠額，到beh死hit 幾日前，有勉勵伊ê大子著接續伊ê腳步。
(5)對伊ê遺言有永遠ê ǹg 望。先生有兩個後生、兩個查某子攏猶細漢。因為伊ê親人攏世俗人，所以先生有遺言，m̄-ài伊ê某子轉去tiàm澎湖。今伊ê婦人人有得著盧姑娘ê好意 hō͘伊tiàm 女學幫贊炊事hē ê工，ǹg望讀報ê人，時常替伊ê家族祈禱。澎湖算是咱台灣ê宣道會，先生是澎湖出身頭1 個傳道師。咱著体察先生遺言ê意思，致意替澎湖佮伊ê遺族來祈禱。
(6)對伊beh斷氣ê 時有奇怪ê暗示。先生beh過身ê hit e 晡ê四點半鐘，鄙人有koh去kā伊看，看伊ê款，知是無偌久ê人。續問伊看伊ê心有攏平安--無? 伊tìm頭，顯明有真平安ê意思，就替伊祈禱，求上帝tháu放伊ê奴僕身体上ê艱苦。到hit暗倚7點半，鄙人家庭ê禮拜煞，就掀開主日神糧4月26號：「Sū-thê-hoán是做頭一個殉道者」ê事，續寫幾句ài做教主日學學生ê路用：「今Sū-thê-hoán伊有平安去天頂佮主相佮tiàm。因為伊是盡忠為著主ê名來放sak姓名上帝有備辦suí-suí活命ê冕旒來戴tī伊ê頭殼--ni̍h。」Chiah-ê話寫了就聽著伊ê婦人人開聲teh哭。鄙人趕緊去kā伊看，都是先生teh beh過氣。看時鐘抵抵是欠10分8點。Chit-tia̍p teh寫伊小傳就ài用 chit層做結尾。因為想了實在有奇怪ê暗時tī--leh。先生真正會堪得列tī Sū-thê-hoán hit輩，盡忠到死，主ê奴僕。所以深望咱做基督徒著toè chit款ê模樣，別日就thang相佮享福tī天頂明宮 ê所在。「你著盡忠到死，我就beh用活命ê冕旒賞賜你。」（啟示錄 2:10；這是4月26號所著唸ê金句。）
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461