Chîn Hi-kia̍t ê Sió-toān
1925.06 483 koàn p.8-9
(Phoaⁿ Chuí-thó͘)
Hi-kia̍t-kun sī Báng-kah ê hoē-iú, iā sī to̍k-sin ê chheng-liân. I ê goân-chi̍p tī Toā-khoe. I soè-hàn chiū tha̍k Hàn-bûn, āu-lâi koh tha̍k Kong-ha̍k-hāu kàu chut-gia̍p, liáu-āu chiū lâi Báng-kah hō͘ i ê a-chek khan-sêng; nā-sī i ê sin-thé soe-jio̍k, siông-siông phoà-pīⁿ, keng-kè choē-choē i-seng ê chhiú-thâu iā sī pêng-siông. Put-hēng tī kū nî 7 ge̍h koh hoat-pīⁿ chiū ji̍p Siông-san Pīⁿ-īⁿ, lóng bô khah hó, jiân-āu koh choán-ji̍p Tâi-pak Pīⁿ-īⁿ, nā-sī i ê pīⁿ-chèng ji̍t-ji̍t ná tāng, kàu 2 ge̍h 28 hō chiū pia̍t-sè. Hióng-siū 24 hè.
Hit ē-po͘ goá chhoā hoē-iú cha̍p-goā lâng kàu Chhiah-si̍p-jī-siā ê chòng-sek-tiûⁿ chip-hêng chòng-sek ê lé-pài, iā choē-choē lâng sàng-kàu thióng-po͘--ni̍h.
Chit ê Hi-kia̍t-kun chiàu goá chhâ-khó ū thang choè lán ê hó bô͘-hoān.
1. Lūn i ê sèng-chit. Tuì soè-hàn chin un-sûn, khaim-pi, thun-lún, jîn-ài, chun-kèng sī-toā, thiàⁿ sī-soè, kap lâng hô-bo̍k, bô tham-sim, bô chia̍h-hun, bô lim-chiú, hō͘ lâng sìn-iōng,hoān-sū kín-sīn, i án-ni kiâⁿ ū ha̍h tī Sèng-chheh ê kà-sī.
2. Lūn i ê sìn-gióng. I tuì tiàm i ê a-chek ê bí-tiàm chiū siông-siông kap pêng-iú lâi thiaⁿ ián-soat-hoē. Lé-pài-ji̍t soà lâi thiaⁿ tō-lí, bô-kú chiū boé Sèng-keng, Sèng-si, khûn-khûn káng-kiù hit ê ì-sù. Bô-kú bêng-pe̍k Ki-tok-kàu sī Chong-kàu-tiong tē-it ko-siōng ê Chong-kàu; só͘-í tī Tāi-chèng 12 nî 9 ge̍h 2 hō, hō͘ Tân Bo̍k-su mn̄g tō-lí soà ji̍p Sèng-hoē. I tuì soé-lé liáu, tû-khì sin-thé put-an, í-goā hán-tit hioh lé-pài. Koh thiaⁿ-kìⁿ lâng kóng, i nā êng ê sî chiū tha̍k Sèng-keng, kî-tó, ū-sî kóng tō-lí hō͘ tiàm-lāi ê lâng thiaⁿ, iā bián-lē in a-chek saⁿ ê gín-ná lâi choè Chú-ji̍t-o̍h ê ha̍k-seng, iū-koh nā beh lâi lé-pài ê sî khah-siông ū chio in ê pêng-iú lâi thiaⁿ tō-lí. Sui-jiân tī phoà-pīⁿ tiong iû-goân siông-siông tha̍k Sèng-keng kap gîm-si, kî-tó, iā ū tha̍k choē-choē ê Chong-kàu-chheh. I án-ni ū teh chīn Ki-tok-tô͘ ê pún-hūn.
3. Lūn i ê uî-giân. I beh sí ê sî khó͘-khǹg i ê a-má, lāu-bú, tio̍h ho̍k-sāi Siōng-tè, āu-ji̍t chiah thang saⁿ-kìⁿ-bīn tī Thian-tông. Koh khó͘-khǹg in m̄-thang hoân-ló, sè-kan sī chhin-chhiūⁿ kheh-koán. Kàu teh-beh kè-khuì ê sî, kā i ê a-má, lāu-bú kóng. "Goá beh lâi-khì lah!" Bīn chhiò-chhiò chiū kè-khuì. Kè-ji̍t sī lé-pài-ji̍t, i ê a-má kap lāu-bú ū lâi pài-tn̂g thiaⁿ tō-lí soà kā hù-chòng-sek ê lâng seh-siā.
Taⁿ ǹg-bāng khoàⁿ pò ê hiaⁿ-tī chí-moē thè in kî-tó, ǹg-hāng in ē chiâⁿ-chò Siōng-tè ê peh-sèⁿ, sī goá ê sim só͘ goān.
