Siàu-liām kè-óng jia̍t-sim ê sìn-tô͘
1926.04 493 koàn p.8-9
(Ia̍p Kim-bo̍k)
Tân Khai-teng
I sī toà tī Tāi-kah Téng-tiàm. Tuì soè-hàn kàu lāu chiū-sī Hàn-bûn-ka ê tha̍k-chheh lâng; tuì siàu-liân kàu lāu chiū-sī kà Chu-pâng. I kap Tân Kî-siông Tiúⁿ-ló sī choè hó pêng-iú, 18 nî-chêng ū siū Tân Tiúⁿ-ló ín-chhoā lâi tit-tio̍h tō-ló. Tuì tit-tio̍h tō-lí liáu-āu chiū chhim-chhim gián-kiù Sèng-chheh, chiū put-chí jia̍t-sim tī kàu-hoē. I nā bô tú-tio̍h hui-siông ê chó͘-tòng hán-tit bô hù lé-pài, ta̍k lé-pài kap i chi̍t ê chek-peh sió-tī Bān-sūn-peh lóng tāi-seng kàu. I iā ū tam-tng tiúⁿ-ló chi̍t-jīm, khó-sioh i ê kiáⁿ lóng boē tit-tio̍h tō-lí. I ê choè lâng chin láu-si̍t kó͘-ì, bat i ê lâng lóng o-ló i. Put-hēng tī 9 ge̍h 14 ji̍t hut-jiân khí ló-ek-huih ê pīⁿ, kàu 16 ji̍t chiū kè-óng, hióng-siū 73 hè, 18 ji̍t chhut-chòng. Tú-tn̄g Tân Khêng-iâu Bo̍k-su tńg-lâi, soà chham-ka chòng-sek, hoē-lāi hoē-goā put-chí choē lâng kā i sàng-chòng.
Tân--sī Sok
I pún toà tī Tāi-kah Siā-bé, 17 nî chêng ū tit-tio̍h tō-lí, chiū chin jia̍t-sim tì-ì chhoā i saⁿ ê kiáⁿ lâi lé-pài, ka-kī tì-ì o̍h Pe̍h-oē-jī kàu oē tha̍k Sèng-chheh.
1.Tì-ì siú lé-pài. I nā bô tú-tio̍h phoà-pīⁿ, hán-tit bô lâi lé-pài.
2.Khek-kí. Toê-iân ê sū chin bêng-pe̍k, ta̍k pái chin chàn-sêng, koh gâu pang-chān kan-khó͘ lâng. Tāi-kah Kàu-hoē ū teh iúⁿ-chhī nn̄g ê ko͘-koáⁿ ê lāu-lâng, ū chi̍t-ê A-huī-peh, siat-sú nā ēng bô kàu, i chiū lēng-goā ēng chîⁿ ēng bí lâi kiong-kip i.
3.Jia̍t-sim pò͘-tō. Nā ū ko͘-niû á-sī sím-mi̍h sian-siⁿ beh pò͘-tō i chiū chhoā-lō͘; nā bô, i iā ka-kī siông-siông kiâⁿ chin hn̄g ê lō͘; kóng tō-lí hō͘ lâng thiaⁿ.
4.Gâu khoán-thāi Thoân tō-lí ê lâng. Le̍k-jīm ê Thoân-kàu-su lóng ū siū i ê hó khoán-thāi, tuì hoē-iú iā chin chhin-chhiat. Put-hēng jiám-tio̍h hì-pīⁿ keng-kè nî-goā, kiáⁿ sim-pū put-chí gâu hōng-sêng i, kàu 1 ge̍h 26 ji̍t chiū siū Chú kéng-tiàu an-jiân kè-óng tò-khì Pē tau, hióng-siū 59 hè. Thiaⁿ-tio̍h ê lâng bô m̄ siong-sim, sui-jiân toà tī Khoe-toé lō͘ hn̄g pháiⁿ-kiâⁿ, iáu-kú chin-choē hiaⁿ-tī chí-bē khì kā i sàng-chòng.
Chan Chheng-châi
I sī Chan Un Tiúⁿ-ló ê tē-saⁿ kiáⁿ. I ē pē ū choè Thoân-tō, Tiúⁿ-ló 40 nî chó-iū, kàu 70 goā hè chiah hioh kang kò͘-nó͘. Tī Hoat-lân-se hoán ê sî, ū hō͘ pháiⁿ-lâng lia̍h-khih3 koaⁿ-hú beh thâi, āu-lâi koh tit-tio̍h tháu-pàng. In ê pún-ku-toē toà tī Chuí-tńg-kha, Pó-tiúⁿ-khiⁿ chng. Chheng-châi soè-hàn ê sî khah siông kap i ê lāu-bú toà tī Chuí-tńg-kha. Kàu 17 hè chiū khì ji̍p Sîn Ha̍k-hāu oá nn̄g nî kú, chiū khì Koe-lâng tiàm thih-tō-pō͘, bô joā-kú chiū seng choè chhia-tiúⁿ. In-uī toà put-chí kú kip-hōng koân, kàu kū-nî chiū hō͘ Thih-tō-pō͘ chhâi khí-lâi. Chóng-sī Thih-tō-pō͘ put-chí siàu-liām i ê kong-lô, ū oá ￥1000 siúⁿ i, koh siúⁿ i chi̍t ê hun-chiong hō͘ i chē chhia 10 nî kú bô liāu. Koh tī Thâu-siâⁿ chhia-thâu chhòng chi̍t keng tiám-á hō͘ i boē. Hé-chhia koh chi̍t ki ūn-sàng-pâi hō͘ i tī Goā-ò thang choè, thang kóng chin hó thāi-gū.
I tuì kàu-hoē chin jia̍t-sim, tī 10 goā nî chêng tuì Chuí-tńg-kha niá î-ku-chiò sio̍k Koe-lâng. I tuì kàu-hoē ta̍k-hāng chin chhut-la̍t, hoān ū lī-ek kàu-hoē ê lóng hoaⁿ-hí choè. Kàu-hoē ê nî-iân i ta̍k nî chìn-pō͘, kàu kin-nî i ū toê 100 kho͘ thang kóng chin chhut-la̍t. I ū tam-tng Chi̍p-sū nn̄g pái, tāi-seng chi̍t pái moá-jīm, in-uī kiâⁿ chhia chin bô êng, chiū hioh-khùn. Kuí nî chêng hoē-iú koh kéng i, chiū tam-tng chīn só͘ oē lâi choè, koh kó͘-bú chhiáⁿ Bo̍k-su. I chin gâu chun-kèng thoân tō-lí ê lâng, le̍k-jīm ê thoân-kàu-su i chin gâu thé-thiap, bô-lūn Soan-kàu-su kap pún-toē Thoân-kàu-su i chin chun-kèng, i nā ū sím-mi̍h thang tàu pang-chān i hoaⁿ-hí choè. Chiah ê Soan-kàu-su nā chhut-ji̍p ū sím-mi̍h hêng-lí i hoaⁿ-hí tàu pang-chān, tī chhia-ni̍h nā ū khoàⁿ-tio̍h thoân-tō-lí ê lâng i chin hó khoán-thāi i, in-uī i chai thoân-tō-lí ê lâng sī Siōng-tè ê lô͘-po̍k, sī kàu-hoē ê sian-siⁿ.
Goá téng-ji̍t ū tú-tio̍h chi̍t ê thoân-tō-lí ê lâng kóng, i pêng-sò͘ kap i bô sím-mi̍h se̍k-sāi, ū chi̍t pái tī kip-hêng-chhia khoàⁿ-kìⁿ, suî-sî chhiáⁿ i kàu chia̍h-tn̂g pī-pān mi̍h lâi khoán-thāi i. án-ni thang chai i ê choè lâng. Koh i it-seng ke̍k láu-si̍t, jia̍t-sim siú-tō. Put-hēng tī bô joā-kú chêng ū hoān-tio̍h sim-chōng-pīⁿ, ū ji̍p Má-kai pīⁿ-īⁿ, bô khah hó, ná siong-tiōng, āu-lâi chiū thè-īⁿ tò-tńg, chiū chhiáⁿ kuí-nā ê i-seng, iû-goân bô hāu. āu-lâi ū chhiáⁿ Tek-sim Liû-khiû I-seng, pīⁿ-sè ū khah hó.
Goá tī 2 goe̍h 26 hō, ū kap Tāi-kah Tīⁿ Tiúⁿ-ló khì thàm i, i chin hoaⁿ-í, kóng bô phah-sǹg thang koh saⁿ-kìⁿ, iā put-chí an-sim ê khoán. Kàu 3 ge̍h 4 ji̍t siu tio̍h phoe kóng i tī 3 ji̍t í-keng hō͘ Chú kéng-tiàu lī-khui sè-kan, hióng-siū 44 hoè.
Hāiⁿ ah! Si̍t-chāi thang siong-sim ah! Kàu-hoē sit-lo̍h chi̍t ê toā tòng-liông, i ê bó͘-kiáⁿ sit-lo̍h chi̍t ê thâu-chàng, bat i ê lâng thiaⁿ-kìⁿ bô-m̄ siong-sim lâu ba̍k-sái. I ū chi̍t ê cha-bó͘-kiáⁿ Chan--sī Gio̍k-lân, ū tī Tām-suí Ko-lú chut-gia̍p. Hiān-sî liû-ha̍k tī Tang-kiaⁿ Khí-kho I-ha̍k; koh ū chi̍t ê kiáⁿ kap chi̍t ê sim-pū kap i ê Chip-sū-niû.
Taⁿ ū tiāⁿ-tio̍h tī 4 ge̍h 2 ji̍t téng-po͘ 9 tiám, beh tī Koe-lâng Chan-á-liâu ka-kī ê chhù choè Kò-pia̍t-sek. Kàu-sî tek-khak ū chin-choē saⁿ bat ê pêng-iú kap hoē-iú kā i sàng-chòng. Goá siá kuí-jī ài hō͘ tāi-ke saⁿ siàu-liām, chhiáⁿ thoè i ê ke-lāi toā-soè kî-tó.
