Só͘ siàu-liām ê Chí-moē
1926.04 493 koàn p.14-15
(Chhoà Phòng)
Sèⁿ-miâ chheng-chò Lîm--sī Hio̍h, khah-siông lâng lóng kiò i Suī-chím, sio̍k Koè-kau ê kàu-hoē, khiā-ke tī Gû-tiâu-khe, lī pài-tn̂g saⁿ lí lō͘. I tit-tio̍h tō-lí thâu-boé káu nî si̍t, tī chûn-nî kap i ê lú-jî Lí--sī Kiok, siū Ong Bo̍k-su mn̄g tō-lí chìn-kàu. I chhut-sì tī Chú-āu 1870 nî, kàu kū-nî 12 goe̍h 17 ji̍t Thiⁿ-pē kéng-tiàu i lī-khui sè-kan, hióng-siū 56 hoè. Cha-khó i ê seng-pêng chin-chiàⁿ ū thang khó-chhú:
1.Hō͘ goā-lâng o-ló. Chin hó lú-tek, chin jîn-ài, hoān-sū un-jiû siông-sè, hó chhin-kīn, khoài-khoài siū khó͘-khǹg, khîn-kín koh khiām-phok. Chi̍t-ē pia̍t-sè, lâng-lâng to͘ lâu ba̍k-sái, thó͘-khuì, kóng, " Khó-lîn ah! Khó-lîn ah!"
2.Siū ke-lāi kèng-tiōng. M̄-nā pún-sin jīn-chin ho̍k-sāi Chú, koh choân-ke lóng kèng-uì Siōng-tè, lóng iàu-kín ka-têng ê lé-pài kap siú An-hioh-ji̍t, toā- toā sè-sè it-giân it-hêng, kó-jiân kap bī-sìn-chiá ū toā koh-iū tī-teh, thang kám-sim. In ê ke, ē ū chit hō koé-chí, kā i chim-chiok khí-lâi, choan sī i chi̍t lâng ê khip-ín-le̍k. Siat-sú i nā kan-ta tuì goā-bīn lâng chhin-chhiūⁿ sèng-tô͘, tī chhù-ni̍h ná siâ-kuí, beh cháiⁿ-iūⁿ? Beh cháiⁿ-iūⁿ ín-chhoā ke-lāi ah? Só͘-í khoàⁿ kàu thong-ke chin-si̍t tī Chú, chiū-sī chāi i chi̍t lâng ê bí-tek, tuì ū tek-hēng, tì-kàu ke-lāi kèng-tiōng.
3.Tit-tio̍h Siōng-tè hoaⁿ-hí. (1) Jīn Chú bô kiaⁿ kiàn-siàu. Tī i ê chhin-chhek, chhù-piⁿ lîn-iū, pêng-iú tiong chhut-thâu jīn Iâ-so͘, sīm-chì siū hiah ê lâng kheng-sī, ki-chhì, kong-kek, hoán-tuì iā bô sió-khoá lún-neh, thâu kàu boé chū-chāi kian-kò͘, iú-chìn bû-the. Chhin-chhiūⁿ bat chi̍t pái, siú lé-pài tńg-lâi, só͘ chèng ê koé-chí chò chi̍t-ē hō͘ lâng châu, beh chhia-tó i ê sìn-gióng; chóng-sī i it-hoat hó-táⁿ.
(2) Iâⁿ chhì-liān. Sìn Chú í-āu chhì-liān ná chìⁿ-pé ti̍t-ti̍t lâi. Thâu-pái sit-lo̍h chîⁿ-châi, kā lâng kóng chhin-chhiūⁿ bé thiⁿ-lō͘. Tē-jī pái tú-tio̍h sí-sit, tan-tan seⁿ chi̍t ê kiáⁿ miâ kiò Siú-ah, hō͘ Siōng-tè thó--khì. (In tit-tio̍h tō-lí ê chéng-chí sī tuì Siú-ah)! Chi̍t-sî Suī-chek ê sim chin gî-ngái, i hoán-tǹg an-uì i. āu-lâi pún-sin seⁿ-thiàⁿ, tī ām-kún pō͘, oá chiâⁿ-nî kú; lio̍h-á khah-hó, tē-jī lú-jî Hiān-ah koh hō͘ Chú tiàu-khì. Chiàu lâng teh siūⁿ ún-tàng ē sit-chì, nā-sī i jia̍t-sim bī-sī. Kàu kū-nî-thâu koh jiám--tio̍h pīⁿ-chi̍t, tī 12 goe̍h 17 hō an-jiân kìⁿ Chú. Tng i teh kan-kó͘ ê sî siaⁿ-siaⁿ kù-kù lóng sī o-ló Chú, siàu-liām Chú, beh lîm-chiong ê sî chhiáⁿ i ê tiōng-hu tī i sin-piⁿ kā i kóng, "Lí m̄-thang hōng-hiahN, nā hōng-hiahN ē chi̍t lâng chi̍t lō͘." Thêng tiap-á-kú kóng, "Sî-kan kàu lah, kā goá oāⁿ-saⁿ." Oāⁿ-hó, chhut-siaⁿ "Chú oê! Kiù goá ! Siōng-tè oê! Kiù goá oh!" chhiú, kha liòng-ti̍t chiong án-ni tò-khì.
Ah! chin-chiàⁿ sī Chú só͘ thiàⁿ só͘ hoaⁿ-hí--ê lah! Kám-siā Thiⁿ-pē.
Goá ē siá chit kuí-kù sī in-uī án-ni:
1.Bô pò-iông i ê hó siau-sit m̄ koè-sim.
2.Soà ǹg-bāng ē hō͘ khoàⁿ Pò ê lí, goá, toè kha-pō͘, êng-kng Thiⁿ-pē.
3.ài lán tông-chêng i ê uî-cho̍k, tī pài-saⁿ ê kî-tó hoē, á sī kò-jîn kî-tó ê sî, saⁿ siàu-liām , kiû Chú kiông in ê chì, chòng in ê sim.
