故潘打眉先生
1927.09 510卷 p.14
(勝輝)
潘--先生出世tī 1894 年。細漢ê時父母立志beh將伊獻hō͘上帝做主ê工。所以公學校卒業後就入台南長老教中學校。後--來卒業了koh入神學校，畢業是tú 22歲ê時。
Tī 1916年4 月1 號受派tiàm Soaⁿ-pà教會約3 年久。後--來轉任去草屯、埔里、大湳、牛困山chiah-ê教會。頭尾為主做工著磨約8年久。後--來為著家庭ê都合，辭任倒來伺候父母。不幸tī 8月1號受主揀召接納上天，享壽34歲。會內ê兄姊宛然hō͘ 烏雲jia 密，無m̄為著伊痛切啼哭。初二tī伊ê本厝舉行葬式，會眾者約400名，thang 講極其盛況。論伊ê一生做人：
1.仁愛。先生ê性情極其溫柔、謙遜，不止ài和平。Tiàm教會m̄ bat聽見kap會友有口角，kap厝邊朋友也真好來去。無論老幼伊不止好親近，所以bat kap伊交陪ê人無m̄數念伊ê好做人。
2.信上帝。對細漢ê時不止敬畏耶和華。所以論敬神真熱誠。Bat 1擺，伊ê後生破病傷重ê時，跪落求講：「父--ah！求你可憐，救我這個細子。求你莫tit為著做工不足來責罰我。若是父ê旨意，別日我歡喜將這個細子hō͘ 你，來補我為著你所做無夠ê工。」這號熱切求叫ê聲音親像芳香chhèng到上帝ê面前。果然細子ê病得著好。
3.獻工。對辭傳道師倒來本教會，就擔當執事ê職份。為著教會ê財政不止出力料理。也前年bat做主日學校長來鼓舞主日學。教會ê事不止關心，歡喜獻工。
對起病到別世才有兩禮拜久nā-tiāⁿ，雖然入院治療，總--是上主ê旨意hō͘人bē gâu--tit。今仔日先生kap主同企起tī安樂國，m̄免koh tiàm 罪惡ê苦海；總--是伊所留ê幼lám弱女kap遺族，暝日為著伊teh 啼哭流目屎。願列位看報ê兄姊tī祈禱中數念伊ê家族，學伊ê敬虔kap信仰。 |
