請來吟詩
周天來
1928.01.01 514卷p.3
請大家來吟一首新詩!這首詩，是佮聖詩117首的音韻，句調不止sio像--ê；有參考聖詩幾若首來做--ê；總是大部分是參考日本的讚美歌212首來做；因為字數攏sio像，所以無論是用讚美歌的調，抑是聖詩的調；拍算攏真好聽。咱的聖詩是將廈門音做標準，佮北部的腔口共款；所以下底所記這首詩猶原將這个做標準；請若欲吟，隨人通用家己的腔口。若愛知這首詩的原由佮目的抑是信仰上淡薄的故事，請看教會新報，新年號：「我主至好朋友，」彼篇所記--ê。若有人憂愁，煩惱家己的罪，啼哭，失望，無平安的人，請無棄嫌來吟看bāi。
Taⁿ，請大家來吟：－
至好朋友耶穌
1.救主耶穌，我歡喜，
攏總交託我主。
願你近倚，扶持--我，
我主，至好朋友。
救主恩典大慈悲，
贖罪，功勞做成。
救主予我來親近，
我心全無驚惶。
2.魔鬼，歹人愛害我；
心神，厭倦憂悶：
主伸聖手，我箝--teh，
信靠，盡我本份。
憂愁，煩惱攪擾--我，
予我失望，受害；
救主，求你來chhoā--我；
靠你滿心自在。
3.救主名字，至尊貴，
我主，以馬內利。
伊名報揚逐所在，
較贏好花芳味。
Taⁿ，主耶穌，我歡喜，
攏總交託我主。
願你近倚，扶持--我，
我主，至好朋友。
4.救主耶穌，心開闊，
溫柔，疼痛通滿滿。
予我的心親像你；
救主模樣，來看。
我學天使的唱歌，
永遠呵咾，歡喜；
吟詩呵咾主無煞：
至好朋友是你。 |
