Sin Eng-chiáu
Ko Kim-seng
1928.01.01 514 Koàn p.1-3
Kiong-hí Siu-chhun, soà pâi chi̍t-poâⁿ sió-khoá ê tiⁿ-liāu tī Sin-chhun ê toh-téng. Chhiáⁿ lia̍t-uī chhì-khoàⁿ, ǹg-bāng ē thang êng-ióng lán Sin-chhun ê hó kám-sióng. Chit poâⁿ chiū-sī Sin Eng-chiáu.
Sin-iok Kiù-chú thiàⁿ Iâ-lō͘-sat-léng ê peh-sèⁿ, ēng ke-bó thiàⁿ ke-kiáⁿ, lâi siá-chhut hit-ê chin-chêng (Má-thài 23：37). Kū-iok Siōng-tè kiù Í-sek-lia̍t lâng, chiong eng-chiáu ēng si̍t hû-kiáⁿ pí-phēng I pún-sin. Siōng-tè kóng, Goá só͘ kiâⁿ tī Ai-ki̍p ê peh-sìⁿ ê, lín iā chin chhin-ba̍k khoàⁿ-kìⁿ, phì-jū chhin-chhiūⁿ toā-eng poē-kiáⁿ tī si̍t--ni̍h, hō͘ lín chèng-lâng kui Goá (Chhut Ai-ki̍p-kì 19：4).
Eng-chiáu choh-siū tī koân-soaⁿ-téng, siⁿ-nn̄g, pū-kiáⁿ, kàu in hoat-mn̂g, chiáu-bó chhoā in chhut siū, kà in o̍h poe, mn̂g taⁿ-chiah hoat, chiáu-kiáⁿ iáu loán-jio̍k, o̍h poe ê sî, chiáu-bó kiaⁿ-liáu in poe-liáu bô-la̍t ē tuī-tē, chiū poe tī chiáu-kiáⁿ ê ē-bīn; kiáⁿ nā siān, thang hioh tī i ê si̍t-téng. Eng-chiáu tī khong-tiong ēng si̍t hû-kiáⁿ, Siōng-tè ín-chhoā Í-sek-lia̍t lâng, si̍t-chāi ū-iáⁿ sī chhin-chhiūⁿ án-ni.
Í-sek-lia̍t peh-sìⁿ tī Ai-ki̍p chò lô͘-châi, siū-khó͘ chē-chē nî; nā m̄-sī Siōng-tè ēng koân-lêng, kiâⁿ sîn-jiah, in bē-thang cháu-chhut Ai-ki̍p ông ê chhiú. Chiaⁿ-goe̍h 15 ji̍t chá-khí, in chéng-lia̍t chhin-chhiūⁿ peng-tuī, lī-khui Ai-ki̍p kok, taⁿ sī pù-lâng, sī chū-iû ê, sī Siōng-tè ê peh-sìⁿ, chit-sî in siūⁿ tò-tńg, chiū chai in ê hok-khì ê toā, hoaⁿ-hí kàu cháiⁿ-iūⁿ!
Ki-tok-tô͘ ah! Siōng-tè chhoā lán iû-goân chhin-chhiūⁿ Toā-eng poē sin chiáu-kiáⁿ. I í-keng kiù lán thoat-lī O͘-àm ê koân-sè, lâi poaⁿ-soá lán ji̍p I só͘ thiàⁿ ê Kiáⁿ ê kok, ē kham-tit ū hūn sèng-tô͘ ê gia̍p tī kng-bêng ê só͘-chāi. Tio̍h o-ló kám-siā choân-lêng ê Siōng-tè, thiàⁿ lán ê Thiⁿ Pē. I ê koân-lêng kap in-tián toā bû-hān.
Sin eng-chiáu í-keng hoat-mn̂g, kiám ē thang kú-tn̂g toà siū--ni̍h? Kīn-lâi kàu-hoē ū chē-chē chheng-liân, ū-ê tiàm Pún-tó, ū-ê khì Loē-tē, ū-ê chhut goā-iûⁿ tit-tio̍h siong-tong ê kàu-io̍k, khah-chē bih tī siū--ni̍h; bô sím-mi̍h khoàⁿ-tio̍h in ū kan-sia̍p kàu-hoē ê kang, á-sī heng-khí siā hoē ê chû-siān. Toā-eng chin ài i ê kiáⁿ o̍h poe; oá tī siū--ni̍h, tuì chiáu-kiáⁿ ēng si̍t phah-phia̍t, pek in tio̍h chhut-siū; i ū thián-si̍t beh poē in tī si̍t-téng (Sin-bēng-kì 32：11). Thiⁿ Pē chin ài khoàⁿ I ê kiáⁿ-jî kiâⁿ chû-siān (Hēng-toān 10：35). Chit-tia̍p teh kóng, Sî iáu sī ji̍t-sî, lán tio̍h chò chhe goá-ê ê kang: mî-sî beh kàu, hit-tia̍p chiū bô lâng ē chò kang (Iok-hān 9：4). Kìⁿ nā hō͘ I chē--ê, beh kā i the̍h chē; thok tiōng i chē--ê, beh kā i thó khah-chē (Lō͘-ka 12：48)． Kin-nî tio̍h chhut-siū ho͘h! Chú ê kang tī thâu-chêng teh tán.
Sè-chiah eng-chiáu tiàm siū-lāi koè-ji̍t khah-khoài, taⁿ ài chhut siū, chhú-khì chiân-thêng bān-lí, lō͘ chin hn̄g, beh poe tó-uī khì? Khoà-lū kiaⁿ-hiâⁿ tī thâu-chêng. Kin-nî tiong, lán ū pún-sin ê tē-uī, ka-têng ê chek-sêng, siā-hoē ê sū-gia̍p, kok-ka ê koan-hē, pún-lâng ê gû-gōng, bô hêng ê bê-he̍k, sin-thé ê soe-jio̍k, châi-chèng ê khùn-lân, chiân-tô͘ àm-bongbong. Taⁿ tio̍h cháiⁿ-iūⁿ? Chhiáⁿ siūⁿ toā-eng thián-si̍t tī sin-piⁿ beh poē lí. Lán sui loán-jio̍k, Chú ū koân-lêng. Sian-ti kóng, To̍k-to̍k oá-khò Iâ hô-hoa ê lâng pó͘-ióng i ê cheng-eng; chhin-chhiūⁿ eng-á poe-lâi poe-khì, toā-pō͘ cháu bē ià, chīn-la̍t kiâⁿ bē siān (Í-sài-a 40：31).
Sin eng chiáu tio̍h ū sin ka-têng; in choh-siū tī koân-soaⁿ-téng. Chheng-liân ê pêng-iú ah! lūn chong-kàu chit hong-biān, lín beh choh-siū tī tó-uī? Khiok chhut-chāi lâng; chóng-sī goá pò lín chai, iàu-kín tio̍h tī koân-soaⁿ-téng, tio̍h sìn Iâ-so͘ chò lín ê Kiù-chú; mê-sî kàu, lín chiah ē thang an-bîn. Chhiáⁿ mn̄g kim-sè ê sin ka-têng, lín beh kiàn-tiok tī tó-uī? iā-sī tio̍h tī koân-soaⁿ téng. Tio̍h chiàu Ki-tok ê kà-sī lâi kiat-bun, tiōng sèng-kiat, bô tiōng chhia-hoâ. Nn̄g lâng saⁿ-kap khiā-khí, Ki-tok chò hō͘-chú, chiū lín ê sin ka-têng ē an-choân. Keng-êng sū-gia̍p ê hiaⁿ-tī ah! kin-nî lán beh choh-siū tī tó-uī? Ta̍k-hāng ha̍p-gî sū-gia̍p lóng thang chò; iàu-kín tio̍h ēng Ki-tok ê kà-sī chò ki-chhó͘ (Má-thài 7：24－27)
Eng-chiáu sui-jiân lāu, iā ē piàn-chò sin-eng. Nî-nî kàu chhun-kuì, eng-chiáu chiū thuì-mn̂g, hoat sin--ê, bô koh-iūⁿ chheng-liân ê eng-chiáu. Lán taⁿ chē-hoè lah, kiám-chhái koh lám sin-miā; beh-thài ē thang thǹg-khak piàn-chò chheng-liân lâng? Lán m̄-sī choâ, iā m̄-sī eng. Sui-sī án-ni, lán ê cheng-sîn tī ho̍k-sāi Chú, kiâⁿ jîn-ài, tio̍h nî-nî sin. Pó-lô kóng, Só͘-í goán bô loé-chì; goán ê goā-thé sui-jiân pāi-hāi, nā-sī goán ê lāi-sim ji̍t-ji̍t oāⁿ-sin (2 Ko-lîm-to 4：16). iū-koh lán nā si̍t-sim ho̍k-sāi Siōng-tè, kàu lāu ê sî, iû-goân ē kiat koé-chí, i ê chiap chhiong moá, sek-tī chhiⁿ-chhuì (Si-phian 92：14).
Ki-tok-tô͘, ū-ê tuì chit kuí-nî lâi chin sit-chì, ná chún lāu-lâng; kap kàu-hoē chhin-chhiūⁿ toān-iân, uī-tio̍h chióng-chióng ê jio̍k-tiám Chhiáⁿ khoàⁿ lāu-eng, bián sit-chì, mn̂g chi̍t-ē thuì, chheng-chhun koh lâi. Chú-chêng 1055 nî, ū ông miâ Tāi-pi̍t, thâi-sí O͘-lī-a, chiàm i ê hū-jîn-lâng. I ū thòng-hoé, hián-bêng tī Si-phian 51 phiⁿ. Í-āu koh khiā sèng-tô͘ ê uī, chiū kám-siā Siōng-tè siúⁿ-sù i tī sîn-lêng-kài sim-sîn koh-chài piàn chheng liân chhin-chhiūⁿ eng-chiáu (Si-phian 103：5). Ki-tok-tô͘ ah! sit-chì m̄-thang; oàn-hīn pháiⁿ, tio̍h. Chú beh koh kiù lí.
Tang-kuì hit-tia̍p, kui-tīn eng-chiáu, ū-ê lāu, ū-ê siàu-liân, kàu chhun-thiⁿ lâi, toā-sè lóng sī sin. Kū-nî tiong, lán tuì Chú chin léng-sim, tuì pêng-iú chin po̍k-chêng, tī ke-lāi bô-iūⁿ, tuì chhiàⁿ-kang chin bô-liōng. Taⁿ Sin-chhun kàu, tio̍h thuì-mn̂g, oāⁿ sin-khoán. Goān Chú toā-toā kám-hoà lán tāi-ke, siúⁿ-sù ta̍k-lâng sin, ta̍k-ê kàu-hoē sin, ta̍k-ê ka-têng sin.
