方言的研究
陳思聰
1928.01.01 514卷p.6-8
論研究方言，愛知詳細著看丁良材先生所著的聖靈三要。我寫伊的要緊予大家做參考。
I. 聖冊所有記的方言
舊約中攏無記；新約有三本較有記，就是使徒行傳佮哥林多。其餘馬可也記一擺。這三本以外新約毋捌記。
共有26 位(大約)。就是行2：4，11；12：46；19：6；哥林多前書12：10，28，30；13：1，8；14：2，4，5，6，10，13，14，18，19，21，22，23，24，26，27，39。馬可16：17。其餘無閣記方言。
巴拿巴教講耶穌也講方言。In講馬可5：41；7：34；14：36；15：34，這幾節是方言。其實毋是。這是耶穌用A-lân國的話，毋是方言
這26位的中間，若照漢文的聖經(舊的)是講「諸國方言；」意思是逐國的腔口。若照白話聖所記，使徒所記的是講「chiah 的腔口。」哥林多所記的是講「音語。」使徒所記的是逐國的腔口，予人會曉聽。行2：8，11，是對人講--ê。哥林多所記予人袂曉聽，是對上帝講--ê (I 林14：2，28)。是做祈禱(I林14：14)。是做吟詩(I林14：15)。是做祝謝(I林14：16) 的路用。對人講的予人會曉聽，有十五所在的人聽了受感動，反悔來得救，無用通譯。這明明是逐國的 腔口。因為按呢，論使徒所記的方言佮哥林多教會的方言，有的講sio-siāng。講sio-siāng 的，有四个，有四个證據。
1. 聖經明明講使徒佇五旬節是講逐國的腔口(行2：4)。逐國的人會曉聽(行2：12)。哥林多所記也是腔口，閣無明明記毋是別國的腔口。這顯明sio-siāng。
2. 彼得講上帝予Ko-nî-liû一家的人得著聖神的恩賜，會講腔口親像咱起頭一樣(Hēng 11：17)。這顯明sio-siāng。
3. 保羅講伊會講人佮天使的音語(I哥林多13：1)。這顯明sio-siāng。
4. 保羅佇哥林多14：10節佮21節ín舊約的話，顯明。保羅認哥林多的方言也是別國的話。
對這四个證據人講方言是平平sio-siāng。講無siāng 的，也有幾若的證據。
1. 五旬節使徒的方言，明明是別國的話(行2：4)。逐所在的人會曉聽，免翻譯(行2：12)。哥林多的方言，人袂曉聽，著翻譯。所以保羅講，若無人翻譯，佇教會中著恬恬。閣使徒的方言是對人講；哥林多的方言是對上帝講(I林14：2)。這證據是無siāng。
2. 五旬節使徒欲講方言的時，對天有聲落來，親像teh透的風，來充滿所坐的厝，閣有火的舌，歇佇逐人的頂面。有chiah 的講方言的證據。哥林多教會全然無顯出這號的證據。對按呢通看出in使徒受聖神是全無sio-siāng。
3. 哥林多14章的內面有兩節顯明有這號有意思的方言(14：21)，有無意思的方言(14：10)。按呢證據哥林多的方言佮五旬節的方言是無sio-siāng。
Taⁿ巴拿巴派的教會，若認做攏sio-siāng，著有顯出方言的證據，就是著有聲，有風；有充滿，所坐的厝，有火的舌，有歇佇逐人的頭殼頂，閣著會講逐國的腔口。按呢就曉明是實在受聖神teh講方言的證據。若認做無sio-siāng，按呢就哥林多的方言是毋成方言，是無意思的方言。保羅真大嫌哥林多教會的方言。
1. 伊講，講方言有啥物利益？(14：6)。
2. 嫌無活氣，親像siau佮琴(7節)。
3. 嫌無意思 (10節)。
4. 嫌親像囡仔(20節)。
5. 嫌親像痟 (23節)。
6. 嫌擾亂(27節)。
7. 嫌無照次序(27節)。
8. 嫌無肅靜(28節)。
無通o-ló，袂會建立教會，袂會予教會得著利益。所以保羅講，講方言毋達著做先知來傳道。這是論方言有無sio-siāng 的所在。
II. 受聖神的人，無的確逐个會講方言
巴拿巴教派講人著會講方言，才有受聖神的憑據。照使徒所記載，有三擺聖神降臨的時人就講方言(行2：4；10：46；19：6)。因為按呢人紲誤解，拍算逐个to會講方言才有受聖神，用按呢來迷惑人。Taⁿ愛證明予人知，人袂講方言也有受聖神。
1. 五旬節的時學生佮兄弟姊妹120人，受聖神的充滿；kiám有攏逐个會講方言？iáu-kú聖經記in予聖神充滿(行傳1：15；2：1)。
2. 彼得傳道理時3000人反悔，聖神充滿，專務使徒的教示，相佮peh餅交陪。相千人kiám有講方言？
3. 行傳4章29節記載真濟人信主。In拄著窘逐就同心祈禱；祈禱了，地動，聖神充滿。In kiám有講方言？(行 4：29－31)。
4. 保羅受聖神充滿，kiám有講方言？(行 9：17)。
5. 規本的使徒行傳，顯明使徒當時共人趕鬼醫病，行神跡，攏無提起方言的事。In kiám有講方言？
6. 以弗所的批teh論聖神的恩賜，毋捌講起上帝恩賜中有提起方言(以弗所4：11)。保羅寄予提摩太的批；講起揀長老，監督，執事的資格；毋捌講起著揀會講方言的資格。
7. 對早到taⁿ，有無數的聖徒，親像路德馬丁，衛斯理，Bú-tì，Sat-hu Sun-tāi：in予聖神充滿，in kiám有講方言？這是證據人受聖神充滿，無的確著會講方言。
8. 哥林多教會照聖經所記是聖神充滿的教會(I林12：13)。iáu-kú無逐个會講方言。有先知，有教師，有行權能的，有醫病的，有教師，行權能的，有醫病的，有幫贊的，有治理的，有講逐樣音語的。有的講，袂會翻譯(I林12：30)。有的會翻譯，袂會講(I林12：30)。有的袂會講，也袂翻譯。以上八个證據，人受聖神，無的確逐个會講方言。
(袂完)。 |
