首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督教會佮實踐道德使命
基督教會佮實踐道德使命
卷期：第514卷 本次： 日期：1928/1 刊名：台灣教會報 頁數：8-9
篇名：基督教會佮實踐道德使命 [ Ki-tok Kàu-hoē kap Sit-chián Tō-tek Sú-bēng ]
作者：周天來 Chiu Thian-lâi
  顯示 : 漢羅 全羅 並列  

現代的基督教會佮實踐道德的使命

周天來

1928.01.01 514卷p.8-9

 

基督教是疼的宗教，也是實行的宗教。若無基督，自然基督教是無存在：sio-siāng按呢，若無基督的精神，就基督教是袂存屬。教會是基督建設--ê，是上帝國的中心。

有人講，耶穌的教示佮使徒彼个，全然無siāng款；總是這个決斷毋是放拺上帝國的觀念：因為in是宣傳上帝國的中心，基督佮十字架；所以將上帝國換做彼个建設者，就是基督佮伊的十字架nā-tiāⁿ。又閣使徒的批有將「上帝國」這句，換做「教會。」「上帝國」這句，保羅的批信有記10外擺，其他別位攏是真少：總是「教會」這句，使徒行傳以下有記100擺以上，干焦保羅的批信也有記60，70擺。佇歌羅西佮以弗所有講教會是未來的理想團體，基督的神所充滿的體；宇宙聚集合做伙中心的意思：佮上帝國差不多siāng意義。又閣佇別位的批信有將教會看做欲完成上帝國的地上的機關。總講佇批信的中間「教會」這句是佮上帝國佔siāng地位；教會是上帝國的具體化--ê 的意思(attained tangible results)。總是怎樣無講「上帝國，」講「教會，」是啥因端？拍算是講按呢較快了解；亦檢采驚了予羅馬帝國看做危險思想來受窘逐。

  Taⁿ以上所講通知上帝國的具體化--ê，就是教會。總是到底毋知現代的基督教會，這个團體tek 的理想有夠額通看做完全得著彼个價值抑無？若照正直教會的現在的人，實在敢，無人有彼款的勇氣通講現在的教會就是上帝的國。因為上帝國的內容，是將基督做中心；閣對信仰來佮伊有直接的關係，才會經驗的；是重頭生，成做清氣，完全的基督信者來成--ê。對上帝的平和出來的心內的大平和；對基督的感化，品性的變化；對祈禱，來體驗的氣力；實在攏無僥疑。這个是無論啥物人，對信耶穌，就攏總會經驗的平常事，毋是啥物oh得。總是無論佇啥物教會欲來證明這款體驗的真正基督徒是真少。怎樣少？就是所講基督信者無的確攏重頭生，屬佇上帝國的人。有明無實的信者嶄然濟。

總是上帝國的實現決斷毋是空想；因為是不止遠大的事業，所以經過兩千年，iáu-kú袂完成。總是耶穌對起頭已經看破，若對伊的教訓就通在。上帝國毋是親像回回教，用武力來建設，是親像農夫teh掖種，自然發生；佇好的田就是拄好的心內結果子；又閣親像麥佮稗仔參插的款，上帝國發展的中途有異端邪法，有假好的人。稗仔就結稗仔籽，著消滅；真的麥結好的籽，收入上帝國的粟倉。照耶穌所講，兩千年間有無數的異端，邪說；有出Tiong-sè 的法王，出真濟稗仔攏總結稗仔的種子，kiat落火燒滅。教會改革閣改革，復興閣復興；隱囥濟濟真理佮果子，漸漸有豐富的內容到佇今仔日。

閣較心適的，就是上帝國親像芥菜籽，親像酵母下麵粉來，彼个思想佇社會的中間感化，予社會的思想漸漸發達，進步；種種的社會事業得著氣力，亦較有價值。種種的文藝 (literature)，經濟(economy)，科學(science)，運動(movement)；若有價值的，攏總號伊有新精神，會通完成彼个使命；這个就是耶穌的精神。閣上帝國會予人生得著完全的調和佮統一；會予團體tek的精神得著健全的發達。

 個人有利己心，團體也是有團體tek的利己心；家族，學校，銀行，會社攏總是按呢。所以耶穌的精神，是鼓吹團體的的精神；也會四正指導彼个精神。所以耶穌講，「代先求上帝的國佮伊的義......」這个是予團體tek的精神健全發達唯一的路。

(袂完)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461