約翰對基督的位格觀
陳清義
1928.01.01 514卷(芥菜子第23號) p.13-14
論基督的位格，照人的研究，有的講基督只有人性也無神性。到主後107年的中間，有伊比學派的說有講基督只有神性，也無人性。到主後70到170年的中間，有Tô西德學派的說有講，咱人將約翰對基督位格方面的研究，就通知約翰對基督的性質，基督的名份，基督的位格，攏有徹底的的研究。伊的結果是認定基督就是神，人，兩性來合一；是上帝獨生的囝，也是三位一體的神，試排列佇下底來論。
1. 論神，人，兩性合一的基督。基督既然有神，人，兩性，這兩个性的本能攏集合佇基督一身，因為基督實在毋是神，人，分離的基督，就是神，人，合成為一的基督；咱若將約翰對基督的性質觀來研究，就通得著真切的證據。
A. 看約翰3：11；記載耶穌佮尼哥底母講話，其中通看見神，人，兩性實存佇耶穌的一身。
B. 看約翰8：58；記載神，人，兩性的品德佮能力，歸集佇基督一身。伊一生的做工佮品性實在有表現伊的神性佮人性，閣再伊有這兩款的性，無受時間世代的管轄。對伊的品德彼方面來講，也通證明伊實在有神，人，合一 的性質。
C. 基督做第一大的使命，就是做神，人的中保，所以的確有神，人，兩性的資格才會擔當這个使命；對神，對人的方面，攏會發生彼个效力，來成天地間最大和平的工事，對這个工事上來證明基督也有神，人，兩性。
2. 論上帝獨生囝的基督。這个基督雖然成人的身軀，iáu-kú佮上帝猶原有特別的關係，基督捌家己認做上帝的囝。約翰5：25也尊稱上帝做父，毋是平常所稱的父nā-tiāⁿ，是慈悲疼痛通親近的父。佇聖經中基督尊稱上帝做父有30擺，閣自稱做囝抑是講上帝的囝有17擺；這款高尚的教義比古代的宗教較活動，較有力，較有意味。
3. 三位一體的神的基督觀。基督佮上帝合一的教義，佇早年宗教的經驗上，袂會十分明白的理解。早年宗教上對上帝雖罔有三个觀念，到尾無充分的解釋。到新約時代的信徒對上帝的觀念，因為基督成人的身軀的實現，就認定上帝就是創造宇宙的天父，就是耶穌基督所表現。同時伊也供給能力的聖神，這款活動有聲明的教義，實在是對約翰所寫的基督合一的位格上來得著。
咱信上帝是創造者，道德者，安慰者，同時也著信上帝獨生的囝的基督。約翰講，「道，」也是創造者，道德者，安慰者。伊的宗教生活上，已經有覺悟到遮，經驗到遮。所以明白將基督佮神合一的奧妙獻予咱，予咱的信仰上不但信上帝做父，做救主，也著信伊是做安慰有能力的聖神，因為按呢人類一切的快樂，平安，真理，能力，攏通對這合一的教義上來得著，這款信仰的中心，實在是約翰對基督的位格合一觀來教示咱。 |
