新年可畏
(T.H.L.)
1928.01.01 514卷(芥菜子第23號) p.14-15
列位的兄姊平安。
世間的日子真快過。我會記得無偌久才teh歡喜經過1927 的新年，taⁿ 1928 的新年又閣到位lah。我想佇今年的新年家家予猶原照舊歡歡喜喜來teh歡迎1928年的新年。
M̄-nā按呢，大家欲寫批相探，紲講，「新年恭喜！」Taⁿ若是我是愛用「新年可畏」這句來替「新年恭喜」彼句予大家。新年一下到，大大細細大家攏總講，「新年恭喜！」若是我佇新年較無愛聽這句講，「新年恭喜！」也無愛共人講「恭喜！」反轉愛用這句「新年可畏」共人應答，所以「新年可畏」是我所愛講，亦新年恭喜是我所無愛聽。
Taⁿ，我怎樣會按呢？kiám毋是痟mah？檢采恁欲笑我痟，若是我掠做這句是金言好教示的話。這霎愛講淡薄予咱大家知，怎樣我欲將「新年恭喜，」來換做「新年可畏」的理由。因為今仔日所teh講「新年恭喜！」的較濟是無想將來，是干焦致意目前nā-tiāⁿ。因為現在teh過年做工的攏總通歇睏thit-thô，亦有濟濟錢通過年，亦媠衫通穿，亦有魚肉chhe-chhau通食，有朋友濟濟saⁿ-chhoā通行遊，所以位著chiah 的來teh講「新年恭喜！」遐的攏無想佇今年的新年所欲拄著啥物款式。所以若是致意佇將來的事，新年毋是通恭喜，實在是通驚惶的所在。Taⁿ有啥物通驚惶？
1. 境遇。咱佇今年中毋知欲拄著啥物天災地變，亦毋知欲拄著啥物瘟疫抑是飢荒。設使咱若知佇今年中所欲拄著的境遇，佇年頭的確無心肝通講「新年恭喜！」譬喻大正十二年一月一日通國的百姓攏teh講「新年恭喜！」佇東京市拍算猶閣較鬧熱，總是佇彼年的九月一日東京拄著大震災，實在予人通驚。Taⁿ設使佇一日欲拄著彼款，遐的百姓拍算怎樣？毋知會歡喜來經過新年，啉酒宴樂，講，「新年恭喜」抑袂？拍算的確毋敢。Taⁿ咱今仔日亦是毋知佇今年所欲拄著是啥物款，所以新年著可畏。
2. 行為。咱知魔鬼極濟，極狠惡。魔鬼的計策極好。毋知咱佇今年中會予魔鬼引誘去行不正烏暗的路抑袂？我常常聽見佮不時看見某教會有某姊妹佇新年的時不止熱心，所行所做亦不止通呵咾，總是到佇年中拄著凄慘，離開主，行毋正經的路，所以新年通驚。
3. 信仰抑是信心。咱佇新年的年頭不止歡喜信主，不止熱心閣有信仰，家己自誇講是親像石磐堅固無搖choah，若是到尾拄著淡薄的風，就出在伊吹來吹去親像粗糠。閣若拄著淡薄的風湧，就連鞭予伊ek來ek去親像水薸無定著。
Taⁿ咱知佇咱台灣有幾若款的教派來teh拍亂人的信仰，所以有兄弟親像粗糠，見著風就欲振動，遷徙去別位；這kiám毋是佇年頭無謹慎驚惶的所致mah？所以新年咱著行，因為佇今年中欲閣有濟濟的教派來拍亂人的信心，總是咱毋免驚，因為咱的主耶穌有講，著謹慎，莫得予人迷惑，因為欲有濟濟人用我的名來講，「我是基督，」按呢欲來迷惑咱。兄弟ah！咱的主吩咐這句話毋通袂記得。所以新年著驚惶。
4. 性命。新年通驚惶，因為咱毋知咱的性命到佇時。設使若知，佇年頭的確驚惶謹慎，毋敢歡喜來過新年。一下到，就咱大家有通加算一歲來歡喜，總是毋知咱加一歲，就猶活佇世間的時間有kiám一年。譬喻平均50歲；今年是29歲，過年加一歲是30歲，亦teh歡喜加一歲；總是攏無煩惱驚惶佇世間偆有20年久nā-tiāⁿ，按呢人加食一歲，就佇世間加緊過一年；咱若按呢想就咱的死hô一年一年直直逼倚佇咱的頭前，就是予咱通驚惶，無通歡喜的所在。 |
