首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 方言的研究
方言的研究
卷期：第515卷 本次： 日期：1928/2 刊名：台灣教會報 頁數：3-5
篇名：方言的研究 [ Hong-giân ê Gián-kiù ]
作者：陳思聰 Tân Su-chhong
  顯示 : 漢羅 全羅 並列  

方言的研究

陳思聰

1928.02.01 515卷p.3-5

 

III.保羅的講方言

保羅講方言比哥林多的信徒較濟(I林14：18)。總是保羅無掠講方言做上帝恩賜。保羅毋捌苦勸方言的人著誇口伊的方言，也毋捌一擺苦勸袂講方言的，著致意求講方言。反轉警戒眾人毋通錯誤。

  保羅看講方言，毋是對信的人做干證，是對毋信的 (I林14：22)。保羅掠仁愛比講方言較好。伊講若無仁愛，方言有啥物利益？(I林13：1)。保羅掠傳道比講方言較大(I林14：1-5)。講五句教示的話，贏過講萬句的音語(I林14：19)。保羅將方言排列佇恩賜的尾á，顯明方言毋是大要緊的事。

IV. 講方言著照規矩

1.     講方言，著專專為著造就人的目的，的確著有人翻譯(I林14：1－13)。

2.     若無人翻譯，就毋通講(I林14：13，22)。

3.     若有人翻譯，siāng濟通予三个人講也著照規矩，輪流講，毋通亂亂講(I林 14：27)。

4.     聖神的權能若佇教會中出現，就毋通放肆；失了自制的權，來致到無安靜，無規矩，昏迷，顛倒(I林14：15，19，20，23，25，30，34)。

5.     婦人人感情快發，佇教會中的確著恬恬(I林14：34，35)。保羅會講按呢，無毋是佇哥林多婦女的中間，講方言的時，有顯出無合宜的事。

6.     講方言兩，三人；毋通siāng一時亂亂講(I林14：27)。著輪流才通講(I林 14：31)。

7.     若有混亂的事，這毋是對聖神出(I林 14：32)。凡事著愛照規矩，照次序(I林 14：40)。

試問張巴拿巴教派的講方言，有照聖經這款的規矩teh講抑無？

V. Gâu講方言的教會是siāng歹的教會

查考哥林多的教會，講方言siāng濟，iáu-kú毋是上進的教會，也毋是道德佮人的比並得的教會，反轉是siāng歹的教會。有九項的歹；欠一項，就十chn̂g歹，實在可憐：－

1.     是結黨(1－3章；1：11；3；3，4)。

2.     是淫亂(5：1節)。

3.     是相告(6：1節)。

4.     Lām-sám食祭偶像的物(8：10節)。

5.     無禮，失落禮拜的敬虔(11章)。

6.     逐人顧家己(12章)。

7.     無仁愛(13章)。

8.     亂亂講方言(14章)。

9.     道理傳錯誤(15章)。

按呢看，講方言愈濟，教會愈腐敗。實在無價值。

VI. 講方言，照看是邪神來bē-he̍k人。

1. 翰4：1節。所疼的 兄弟ah！Chiah 的神毋通攏總信，獨獨著試驗chiah 的神是對上帝抑無是；因為有濟濟假先知，出來入世間。2. 哥林多11：3，4，講，「總是我驚了恁的心思敗壞，無純全清潔來向基督，親像蛇用伊的詭詰引誘夏娃一樣。若有人來傳別的耶穌，阮所袂捌傳--ê，抑是恁受著各樣的神，前所袂捌受著--ê，抑是閣樣的福音，前所袂捌承受的，你容允伊，好(14節)。這也無通奇怪，因為撒旦也家己裝做光明的天使。所以伊的差用，裝親像義的差用，這也毋是大事。In 的結局，欲照in 的所行。

這幾節教示咱，著持防假先知；傳各樣的教--ê。有人teh講，巴拿巴派若是假--ê，怎樣信的人hiah熱心。請看羅馬10：2節：「因為我為著in做干證，in向上帝有熱心，總是無照真的智識：「因為in毋捌上帝的義，愛立家己的義，就無降服上帝的義。」對按呢看，明明是teh警醒，咱毋通受迷惑。

列位ah！對舊年來，巴拿巴這个教派傳入咱台灣，伊的特點專專是講予人會講方言做要緊。這號講方言，予咱看出in 的所講所行，濟濟佮聖經無合。Taⁿ欲講無合的所在：－

1.     聖經將方言排佇恩賜尾後，來顯明方言毋是大要緊--ê。In用方言排佇恩賜的頭，掠做真要緊--ê。這佮聖經無合。

2.     聖經顯明濟濟信徒，受聖神充滿，無講方言。巴拿巴派講，無講方言，就無受聖神充滿的證據，用按呢騙人。這佮聖經無合。

3.     聖經講方言，著照聖經講方言的規矩。巴拿巴教會無照聖經的規矩，lām-sám講方言。這佮聖經無合。

4.     聖經記載方言是對毋信的講。巴拿巴派對已經信的講。這佮聖經無合。

5.     哥林多教會的方言，佮五旬節的方言，若無閣樣，就哥林多教會的方言，全然毋是方言，因為不成話。這無合。

6.     使徒講方言，是chhoā遐的猶未信耶穌的猶太人去信。巴拿巴的講方言，是chhoā已經信耶穌的閣去信。這無合。

7.     使徒講方言，是chhoā袂受洗 的去受洗。巴拿巴的講方言，是chhoā已經洗了的閣去洗。聖經講洗禮是一个，in幾若个。按呢無合。

8.     聖經記載人毋通趕緊共人按手。巴拿巴派這時信，這時就按手，予人做長老，執事。這大拍亂教會佮聖經無合。

9.     In teh共人行洗禮，講的確著浸規身軀才會得救；閣洗禮的時無奉父，囝，聖神的名共人行洗禮。這佮聖經無合。

10.   聖經記載聖神的賞賜是合一，成做一个結連的教會。張巴拿巴教會無論設佇佗位，結局相爭，結黨，分裂，無看出興旺教會的果子，反轉親像哥林多教會有相爭相告，結黨，以上9項的弊害。

主耶穌講，對伊的果子通捌伊的樹，實在是按呢。請大家替chiah的受迷的人祈禱。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461