約翰對基督的品質觀
陳清義
1928.02.01 515卷(芥菜子第24號) p.15-18
研究基督做彌賽亞，做救世主，這款的教義，會顯明基督的品質。伊對人類所發出貢獻的道德品性，佇約翰的觀察中，知有真濟款的貢獻，試排列佇下底來論。
1. 光。古早的宗教心理，光是做聖物的本體，也是耶和華上帝所顯出的榮光，所以基督佇世間也用光來家己號，愛表明伊家己佇世間的責任，以及將來的 榮光(約翰1：5)。
2. 生命。生命的定義，佇舊約時代認做是人第一大的幸福，不過舊約時代的 生命觀念，是注重將來，忽略現代。約翰所寫基督的生命觀，就是基督所講的生命要義，不但注意今世的實現，iáu-kú是用家己做生命的本源(約翰 1：4)。這款優美高尚，豐富，活動，有生命的教義，對信徒靈德的生活上，實在有密切的關係。這款教義的暗示毋但愛人有重頭生的要緊，iáu-kú予人有通到新能力的希望。所以凡若佇主的內面，佮主相交陪聯合的人通成做有生命的信徒。
3. 活泉。宗教的信仰，的確著佇家己內心的宗教覺悟有活泉的能力，直直來灌沃咱的心田，予咱家己內心的靈界生活，會直通到做高尚純全的所在，就是基督佮人所論活泉的功效能力，的確會佇逐人的內心，予人宗教信仰上會發生功效，這个就是約翰4：10。「耶穌講，設使恁捌上帝的賞賜，佮請啉的是chī-chuī，恁求伊，伊的確用活水予恁。」
4. 好的牧者。基督對全人類所盡第一著現的責任，佇約翰的觀察，是認定基督就是全人類的好牧者。咱若對這个好的牧者的意義來想，看現今的社會害惡的問題所造的陷坑，實在有予全人類有失迷墮落的淒慘，佳哉基督做好的牧者來拯救，就通講是人類前途光明。
5. 真理。基督教的中心，毋是佇新約，舊約，也毋是佇教派分別，也毋是佇信條教義，也毋是佇教會的禮儀，也毋是佇教會政治。基督教的中心，就是佇基督的本身，以及所顯出絕對的真理。(約翰14：6)，「耶穌講，我就是路，就是真理。」
6. 道路。咱人佇世間親像佇雙叉路teh踅的時陣，毋知通踏進平安的道路。所以約翰對基督的品質觀，有認定基督做道路的真理。因為按呢咱chiah的雖然經過烏暗的山谷，猶原會進行，這个就是基督做道路的意義，所指示佇咱人的真理；咱人若放拺這條路，袂得親近上帝。
Taⁿ約翰對基督的品質觀有這幾項通教示咱，予咱通明白基督是光，生命，活泉，好的牧者，真理，道路，等，咱通深信，毋免僥疑。 |
