Chè-iâm Kang-gia̍p
(Soà-chiap Tē 22 hō ê Koà-chhài-chí)
Tiuⁿ Ki-choân
1928.02.01 515 Koàn (KOÀ-CHHÀI-CHÍ TĒ 24 Hō) p.20
Hiān-sî tiàm-thâu teh boē hit-khoán it-téng iâm ê phín-chit sī iâm-hoà so͘-táⁿ (NaCl) 90% í-siōng ê mi̍h, í-hā ta̍k-téng kiám 5%, iā ta̍k téng ê iâm lóng iáu ū tām-po̍h Magnesium (khó͘-thó͘) ê hoà-lia̍p mi̍h; chit hāng sī khó͘, só͘-í nā beh tit-tio̍h hit-khoán boē khó͘ ê iâm, tio̍h chiong iâm khì kā i sio; iâm nā kè sio, khó͘-thó͘ oē pìⁿ-choè sng-hoà, khó͘-thó͘ ê hoà-lia̍p mi̍h, (MgOMgCl). Chit hāng mi̍h boē iûⁿ, só͘-í iâm nā kè-sio kè, chiū oē khó͘ ê sêng-hun pìⁿ-choè boē-khó͘ ê sêng-hun. Chiàu lán só͘ chai, lán ê chi̍h oē chai bī ê kám-kak, sī in-uī mi̍h kìⁿ-tio̍h chuí, á-sī chhuì-noā, iûⁿ--khì, pìⁿ-choè iûⁿ-e̍k, chiah lâi chhì-kek lán ê bī-kak soè-pau, lán chiah chai bī-sò͘, iâm kè-sio ê, kiò-choè sio-iâm, chit khoán iâm pí phó͘-thong ê iâm ke put-chí kuì.
iâm ê lō͘-ēng: Chiong iâm lâi hoà-ha̍k èng-iōng chè-chō tit chin-choē khoán ê io̍h-phín. Taⁿ chiong kî-tiong tiōng-iàu ê kì tī ē-toé:－
iâm-sng, khok-sèng so͘-táⁿ (NaOH) thoàⁿ-sng so-táⁿ, tiōng-chô, bông-siau (choè po-lê teh ēng), iâm-hoà a-iân, seng-hóng, kî-thaⁿ chè-chō sat-bûn iā ū ēng--tio̍h, siù-phî pó-chûn iōng, chia̍h iōng, sīⁿ bah-luī iōng, chin-choē kóng boē-liáu, kiaⁿ-liáu siuⁿ-tn̂g, iâm 5 hù-sán-bu̍t tī-chia bô beh kì-chài. (Oân).
