死海
偕叡廉
1928.02.01 515卷(芥菜子第24號)p.17-18
拍算通世間無半个海比死海較奇怪，無半个比伊較出名，無半个hiah大干涉佇歷史。
死海照咱逐人所知，就是佇猶太國的東南爿。這个海長大約有15 phò͘，闊有3 phò͘半，深有130丈。死海親像鼎底。猶太國親像鼎，怎樣講按呢？因為比四圍的所在較低，伊的水面猶有比地中海較低1600尺。通世間無一所在比海較低到按呢。
死海的水到極鹹，較鹹海水有九倍，所以佇伊的內面攏無活物，水內毋但有鹽真濟，以外有別項，其中就是kiⁿ較濟。在早人teh拍算死海無啥物路用，因為無活物佇teh，連一尾魚也無。Taⁿ知所出的鹽佮kiⁿ達錢袂算得，因為chiah 的物the̍h袂盡。有人講通世間的富國也無一國有夠額錢通一盡共伊買。
現時英國的政府teh設計欲製造死海所出的鹽佮kiⁿ，也欲將所出的錢來整頓猶太國。這也是興起猶太國一項的方法。早時猶太真發達，地方鬧熱，百姓看活。檢采死海欲予猶太人通閣興起in 的國。 |
