Chiu Lāu-chài ê Sió-toān

1928.03  第516期   p.10

Koeh Tiâu-sêng

  Chiu Lāu-chài-chek sī Chháu-tun kàu-hoē chho͘-tāi ê sìn-tô͘. Tiong-ti̍t in-khîn ê lâng, bat chò kuí-nā jīm ê Chip-sū, chīn-tiong tī Siōng-tè ê ke. Tong-sî Chháu-tun ê jîn-bîn oàn-hīn Ki-tok-kàu, iā siū chē-chē lêng-jio̍k, Lāu-chài-chek bô kiaⁿ-hiâⁿ, tuì Si̍p-jī-kè hit hong-bīn ti̍t-ti̍t chìn-chêng, Chháu-tun kàu-hoē ū loā-chē chit khoán jia̍t-sim ê sèng-tô͘, kàu-hoē iā toā-heng; tì-kàu só͘ soè ê chhù chē bô lō͘. Tāi-ke him-bō͘ ài khí sin pài-tn̂g, khó-sioh bé bô pài-tn̂g tē.

  Lāu-chài-chek só͘ ū ê châi-sán, sī kuí keng phoà-chhù, kap chi̍t tè chhù-tē. Khài-jiân kóng, Goá kam-goān hiàn pài-tn̂g tē, chèng hoē-iú hoaⁿ-hí kàu-ke̍k, chhut-la̍t tê chîⁿ khí pài-tn̂g kap siok-sià.

  Lāu-chài-chek sī chiong só͘-ū ê châi-sán, hiàn chi̍t-poàⁿ hō͘ Siōng-tè. Kám-sim ah! I ê nî-hoè lāu, sè-hàn sun toā-tīn, ka-têng seng-oa̍h khùn-lân, sin-khu tài chek-chuí ê chèng chin siong-tiōng, kan-khó͘ kàu-ke̍k. Chóng-sī i ê sìn-sim bô sit.

  I tī pēⁿ-tiong, iáu-kú khoà-lū kàu-hoē, him-bō͘ ài chhiáⁿ bo̍k-su kā Tióng-chip kóng, "Chhiáⁿ bo̍k-su nā bô kàu chîⁿ, thang the̍h goá chhù-tē ê hù-pún kā lâng chioh." Siông-siông kiû Siōng-tè kóng, "Tio̍h lâu goá ê sèⁿ-miā kàu chhiáⁿ bo̍k-su liáu."

  Kàu phí-jîn chiū-jīm ê sî, i ê kiáⁿ, khan i lâi chò-hoé hip kì-liām siá-chin, chū án-ni bô koh chhut-lâi lah! I sui-jiân sin-khu kan-khó͘, kai-chài sim ū tō-lí, koh tit-tio̍h iú-hàu ê sim-pū ê ho̍k-sāi, jîn-ài ê Âng Kim-kang I-su, siông-siông kā i chín-chhat, chhòng io̍h hō͘ i chia̍h, sim iā khah siū an-uì.

Chiau-hô 2 nî 12 ge̍h 10 ji̍t, ē-po͘-sî, phí-jîn khì chhoē i chē, thè i kî-tó. I iā kî-tó kóng, "Siōng-tè ah! Goān Lí ê chí-ì chiâⁿ, thé-thiap goá ê kan-khó͘, hō͘ goá tńg-khì. Kàu poàⁿ-mê koè, an-jiân tńg-khì Thiⁿ-pē ê ke, hióng-siū 73 hoè. Hó ah! thoat-lī it-chhè ê khó͘-lān, tit-tio̍h éng-oán ê hok-khì.

  I ê kiáⁿ teh hoân-ló, ka-tiong bô chîⁿ, taⁿ beh àn-choáⁿ? Keh ji̍t chèng hoē-iú thiaⁿ-tio̍h, sio-cheⁿ sàng tiàu-uì kim, hoē-goē ê pêng-iú iā tông-chêng. Só͘ siu--ê, chò song-huì iáu ū chhun, khó-kiàn i ê gâu chò lâng, ta̍k lâng thiàⁿ i. Keh ji̍t ū chiâⁿ-pah lâng kā i sàng chòng, ū bo̍k-su kā i chò lé-pài, ū ga̍k-tuī pûn pi-siong ê tiāu, kàu thióng-soaⁿ. I it-seng só͘ hi-bōng--ê lóng ta̍t bo̍k-tek.