讀冊桌
陳清義
1928.05.01 518卷(芥菜子第27號) p.13-15
基督徒信仰的派別
基督教佇世間，日日teh進步，佇國家社會的中心，活氣生起，已經佔了大部分的勢力，所向望是愛欲予地面上的國，變成做天國。這个是真要緊的事，可惜現代基督徒的中間無一盡十分透徹基督的真意，表示合一的做工，同踮佇基督十字架的 大旗下，盡力去做，來收效果，he是怎樣，照人teh查察，是因為今仔日的基督教中的信徒in 的信仰有掛派別的色彩，來予伊按呢。Taⁿ彼个派別是啥物款，排列佇下底：－
1. 權勢派。權勢2字，是世間人第一意向的目的，也是世間人所誇口的榮光，因為有權勢的人，做事真快，人人稱讚伊。捌聽見佇對岸傳道理的先生有的帶權勢的色彩來傳教；會外的人毋知道理的意義，紲掠教會是做國家事務的機關。所以聽道理的人，愛記這个名，出多少的緣金，表面上也宛然一个信者一樣。若是道理啥物款攏毋知影，較thêng為著私慾的事lāu-khí，就欲對教會參詳，揣權勢主義的先生，狐假虎威，來生出事端，無奇怪對岸人的怨恨基督教；soà僥疑傳教的先生是國家所用的器具，假做傳教的人這款的信仰就是號做權勢派的信仰。
2. 名利派。世界中做第一厲害--ê，就是名利，兩字，人若受這款的迷惑，心就愛搖動。俗語講，名kiong利só雖罔智慧的人也oh得脫離，何況平常的人。捌看見有傳教的人，欣慕世間名利，放拺傳教的工，也捌聽見會內的信徒貪世間的名利，拋去心中的信仰。這款的信仰，就是號做名利派的信仰。
3. 感情派。咱人佇國家社會的交際上，欲表示親密的意思，就是感情，因為人類毋是草木，是感情的動物，佮人往來，意氣會相投，心心會相印。所以佇教會的中間，有一款人來信道理，常常對好感情引chhoā濟濟人來聽道理，卻有的對按呢來明白道理有，也有的無明白道理，較thêng為著感情上的事就佮教會分離。這款的信仰號做感情派的信仰。
4. 迷信派。迷信的惡習慣，逐國攏有，佇台灣也真興盛。親像卜卦，相命，風水。拜偶像，這攏是迷信。咱基督教的信徒，有的迷信佇老君真深，雖然拜上帝，iáu-kú放袂離；有的紲用這款的心理來信上帝。款待上帝做無形的偶像，不過比偶像較大，所以若欲徛柱，上樑，喪喜事等，就愛請傳教師來做幾句平安的祈禱，因為驚了無祈禱，會犯著煞氣，袂平安。這款的信仰，就是迷信派的信仰。
5. 懷疑派。佇教會中，信者的心，各有不同，捌看見有的信道理久久，無冷無熱，親像lâ-lun-sio 的水。研究伊的心理，對上帝淺信，對主耶穌無十分信趁。天堂，地獄，毋知有抑無，聖神的感化，事有事無，按呢予心生起僥疑，親像早時多馬的款曲，這款的信仰，號做懷疑派的信仰。
6. 研究派。現今的世界，物質文明，科學發展，事事愛取公開的研究。基督教的信徒受了這款的影響，也生起愛查察的眼光，取研究的態度，予基督教的真理較顯露。因為基督的道理是千古無改換，萬世常新，愈研究愈有價值，這款的信仰，號做研究派的信仰。
以上所論的派別，做予咱通取--ê，就是研究派的信仰。咱若真心研究聖經，會幫贊咱明白心身上的事，予咱的信仰較堅固徛在，袂搖動，成做堅固真實的基督徒。 |
