Tāi-ke pêng-an!

Ko Tek-chiong

1928.06.01 519 Koàn p.3-4

  Lia̍t-uī khoàⁿ Pò ê hiáⁿ-ché pêng-an. Kám-siā Chú ê thiàⁿ lán tāi-ke tit-tio̍h siū-tiàu ê hok-khì, thang thoat-lī o͘-àm, Mô͘-kuí ê sok-pa̍k, ji̍p tī kng-bêng chū-iû ê sè-kài, tit-tio̍h un-tián bô-hān. Him-bō͘ lán tāi-ke ê sìn-tek chi̍t-ji̍t chi̍t-ji̍t ná ke-thiⁿ, ná chìn-pō͘; chhin-chhiūⁿ chhiū-ki kiat-liân tī chhiū-sin chi̍t-poaⁿ, siông-siông kiat-liân tī Chú, tit-tio̍h kiat hó ê koé-chí chē-chē, thang hō͘ tī thiⁿ-ni̍h lán ê Pē tit-tio̍h êng-kng. Him-bō͘ lán tāi-ke tī thâu-chêng ê lō͘-chām, he̍k-sī tú-tio̍h sím-mi̍h kéng-gū, sī lap-khí á-sī lap-lo̍h, oan-oan oat-oat, siông-siông sāⁿ khoàn-bián, saⁿ chí-tō, saⁿ ín-chhoā, bián-tit khiā tī piⁿ-á khoàⁿ lán-ê sìn-gióng ê pêng-iú teh sit-bê, bô pêng-an, beh poa̍h-tó, sit-chì, kan-khó͘. Kàu-hoē hiaⁿ-tī chí-moē tāi-ke chí-ū "khiàm-chè tio̍h hêng--ê" m̄-sī saⁿ oàn-tò͘, saⁿ-chiⁿ, saⁿ khi-hū, kan-chà, khuí-khiat, tò͘-hiân, jiáu-loān, chí-ū tek-khak tio̍h bêng--ê. 1, sī saⁿ-thiàⁿ; 2, iā-sī saⁿ-thiàⁿ, 3 iā-sī saⁿ-thiàⁿ, nā koh mn̄g só͘ tio̍h bêng--ê sī sím-mi̍h, iû-goân iā-sī beh án-ni ìn. Lán ê Bó kàu-hoē (Iâ-lō͘-sat-léng kàu-hoē) ê sìn-tô͘ ê seng-hoa̍t chiū-sī "Siông-siông choan-bū sù-tô͘ ê kà-sī, saⁿ-kap kau-poê, peh-piáⁿ kî-tó;" iā-sī, "ji̍t-ji̍t tâng-sim choan-bū tī tiān-lāi, iā tī jîn-ke peh-piáⁿ ēng hoaⁿ-hí sêng-si̍t ê sim lâi chia̍h." Kīn-lâi tī lán ê sin-piⁿ só͘ ū khoàⁿ-kìⁿ it-poaⁿ ê lâng, chiàu khoàⁿ tī in ê lêng-hûn chiū lóng bô chhù-khiā ê lâng chē-chē. In ê lêng-hûn bô só͘-sio̍k, bô tiāⁿ-tio̍h ê chhù-the̍h, sì-kè phiau-liû, oán-jiân chhin-chhiūⁿ hòng-tōng-chú chi̍t-poaⁿ. Tuì chá-chá lán ê chó͘-sian só͘ thoân-lo̍h lâi ê pu̍t-chó͘ bô beh pài, hiuⁿ bô ài sio, nā sī chhiáⁿ i ji̍p-lâi Ki-tok-kàu iû-goân sī chin sè-jī, m̄-ji̍p ê lâng put-chí chē, moá sì-kè, tì-kàu tāi-ke ji̍t-siông ê seng-oa̍h chin thang hoân-ló, siā-hoē tú-tio̍h hú-pāi, oán-jiân chhin-chhiūⁿ khe-chuí teh lâu-lo̍h chi̍t-poaⁿ, tāi-ke bô sioh liâm-thí, cheng-chiat bô-khì, pháiⁿ-sū chhiong-moá tī ji̍t-ji̍t ê Sin-bûn pò-choá, choē-ok ê ì-sek choân-jiân kap chit sî ê lâng seⁿ-hūn, kha-chiah ǹg Siōng-tè, bīn ǹg tē-ge̍k ti̍t-ti̍t cháu, hiān-sè sêng-kong, sìn-gióng sit-pāi ê lâng sī hui-siông chē, tāi-ke boán-chiok án-ni. Khó-sioh siā-hoē tiâu-liû pìⁿ án-ni. Kīn-lâi kai-chài ū thiaⁿ-tio̍h iú-sim ê chì-sū chhut-thâu soan-thoân au-kiò "kái-chō," "kái-chō," moá sim chiok-siā, chóng-sī kiaⁿ-liáu cheng-sîn-chiūⁿ ê sū khǹg tiàm piⁿ-á, bô chù-ì tī chit-tiám lâi teh hoah kái-chō sī iáu ū thang hoân-ló ê só͘-chāi tī-teh, kiaⁿ-liáu chē-chē lâng him-bō͘ thô͘-té bô kin ê suí-suí ê hoe, tāi-ke ì-ài chhin-chhiūⁿ hō͘ ko͘-tâ ê chhiū khui-hoe hit ê lāu-lâng, chiàu khoàⁿ chin chió lâng chù-ì-tio̍h lāi-bīn ê kái-chō; siat-sú ū chù-ì-tio̍h, chí-ū ēng siā-hoē ūn-tōng, á-sī kàu-io̍k chè-tō͘ iû-goân iā-sī uî-lân ê sū. Nā-sī Iâ-so͘ Ki-tok the̍h piⁿ-á, chí-ū ēng lâng ê tì-sek hong-hoat beh lâi kek sin siā-hoē, hit-ê chì-khì kàu-gia̍h thang o-ló, chóng-sī hit-ê hoat-tō͘ choan-jiân sī m̄-tio̍h. Lán ê lí-sióng-hiong he̍k-sī beh lâi khí tiàm tī Phêⁿ-ô͘, á-sī Soaⁿ-lāi, che kiám-chhái ē, iū-koh kiám-chhái bē. Chóng-sī chin-si̍t ê Lí-sióng-hiong chiū-sī choân-pō͘ kau-hù Siōng-tè, siū Ki-tok ê Sèng-lêng só͘ ín-chhoā lâi chò-chiâⁿ ê thoân-thé. Nā bô ū oa̍h-oa̍h ê Ki-tok tī-teh chiū goā-bīn hó-khoàⁿ iā-sī bô kú-tn̂g, bô si̍t-chāi ê siā-hoē.

  Tī lán ê sin-piⁿ tē-it toá iàu-kín ê kang kiám m̄-sī chit hāng mah? Lán tāi-ke kiám m̄-sī chit-ê guî-hiám ê sî tio̍h khiā khi chai, ēng chin-si̍t hâ-ió, ēng gī chò hō͘-sim-kiàⁿ, ēng hô-pêng hok-im ê pī-pān, chhēng tī kha-ni̍h; koh tio̍h giâ sìn ê tîn-pâi lâi châu-bia̍t pháiⁿ ê it-chhè ê hoé-chìⁿ mah? Kin á-ji̍t Ki-tok-kàu ê sú-bēng nā m̄-sī tī chia, sī tī sím-mi̍h só͘-chāi? Him-bō͘ lán tāi-ke tit-tio̍h Sèng Sîn ê ín-chhoā, sui-jiân kóng-oē bē thang chhin-chhiūⁿ Pó-lô, thoân-tō bē thang chhin-chhiūⁿ Pó-lô, iáu-kú tī pún-sin ê seng-oa̍h ē chiàu Chú ê tī lâi kiâⁿ. Siu-ióng jîn-keh chiàu gû-gōng ê ì-sù án-ni chiū-sī put-chí êng-hián Siōng-tè ê miâ, ū chin lán ê sú-bēng.

  Goān Siōng-tè ê in-tián kàng-lo̍h tī ta̍k-lâng ê sim, tī ta̍k-ê ka-têng, ta̍k-ê kàu-hoē, hō͘ Siōng-tè ê kàu-hoē, hō͘ Siōng-tè ê chí-ì chiâⁿ tī tē-ni̍h chhin-chhiūⁿ tī thiⁿ-ni̍h chi̍t-iūⁿ, sī sim só͘ goān.