讀冊桌
陳清義
1928.06.01 519卷(芥菜子第28號) p.14-15
教會存在的 要素
凡若有思想的，無毋了解教會的真意義。教會毋是禮拜堂。教會就是對眾信徒集合來組織的團體，可見信徒就是教會，教會的信仰心冷熱來移轉。總講，教會的存在，除起心以外，無別款的氣力。這个信心就是靈界生活的表象。信心就是教會用啥物法度來測量，試用幾若款，排列佇下底：
1. 致意祈禱。不論啥物教派中的信者，抑是求道者，著致意祈禱；不但佇公眾的所在祈禱，佇家己的厝內，睏房的中間，若會家己佮上帝交通，就基督已經佇伊的中間；亦教會也建設佇伊的內面。若毋是按呢，雖罔有會友的名，無會友的名，無會友的實，教會也是空空的名nā-tiāⁿ。凡若肯時常祈禱的基督徒，靈魂上有無限的能力，會感動人歸倚佇基督，會奮興教會中的兄弟姊妹，予人為著基督來盡力，看教會ná家己的家庭，認上帝做人類的大老爸，按呢就教會kiám袂興旺，福音kiám袂廣播的理mah，實在祈禱的功效真大。
2. 吟詩讀經。會友若會每日吟詩查經，無歇睏，可見伊對上帝佮基督攏有觀念的決心，信仰的態度，的確會升懸，袂降低，這个就是教會存在興旺的氣上。
3. 料理會務。會友若會了解教會，毋是牧師抑是宣教師的教會，實在是咱家己的家庭，按呢對教會經濟上，抑是行政上的事，攏會家己奮起來擔當。拄著教會經濟缺乏的時，就會慷慨募集。牧師無佇teh 的時，會替主理禮拜，chhoā人來敬拜上帝。教會逐款的計畫，會佮牧師參詳做自立自養的本色教會。
4. 人格表現。凡若會友若會用基督的心做心，平日的言語，思想，動作等，攏會表現基督完美的人格，教會才有活氣；因為教會的存在，會友著擔當大半的責任。
以上所講這4款，濟濟教會猶未得著到遮，傳教師著注意，出力栽培會友，予in 的靈界生活，對信仰上會發生佮上帝，佮教會有密切的關係，予教會得著興盛來存在，這个就是現今教會所大欠缺。 |
