Lâu Tiong-kian Bo̍k-su tī Iû-thài kok
1928.08 621 koàn p.6-7
Goán toà tī Ai-ki̍p Khai-jiû (Cairo) ê só͘-chāi gō͘ ji̍t kú. Ū peh tī Toā Kim- jī-thah ê boé-liu, si̍t-chāi kan-khó͘ peh, chóng-sī kong-kéng khoàⁿ chin hn̄g. iā ū khì tī Phok-bu̍t-koán khoàⁿ chit kin-nî khui-tio̍h ê Hoat-ló bōng ê pó-mi̍h chin hi-hán; hit ê kim-luī sǹg bē liáu.
Tī 3 goe̍h 16 hō chē àm chhia khì tang-pak, kàu thiⁿ-kng chiū kàu tī Ka- sat (chiū-sī chá Hui-lī-sū lâng ê siâⁿ), iā téng-po͘ 10 tiám cheng chiūⁿ Iâ-lō͘- sat-léng.
In-uī hiān-sî ū chū-tōng-chhia, chiū lú-hêng khah lī-piān. Thâu-chi̍t ji̍t goán ū khoàⁿ Hoê-hoê-kàu ê toā Lé-pài- sī (Mosque of Omar) chiū-sī ti éng-koè Sèng Tiān ê tē. iā ū khì tī Iû-thài lâng Ai-khàu-só͘, in iû-goân teh khàu pún- kok só͘ sit-lo̍h ê êng-kng, thiaⁿ-liáu si̍t- chāi khó-lîn. Iâ-lō͘-sat-léng pí hái-bīn koân 2000 chhioh, goán tuì hia khì tī Sí Hái, pí hái-bīn kē 1400 chhioh, lī 25 Eng-lí. Ū koè Iâ-lī-ko, iā khoàⁿ Iok- tàn hô. Tī Sí Hái sé-e̍k; chhì-khoàⁿ tîm, bē tîm, in-uī chuí hiah-ni̍h kiâm!
Keh ji̍t khì tī Pek-lī-hêng; tī lō͘-ni̍h khoàⁿ-kìⁿ Lia̍p-kiat ê bōng. Tī Pek-lī-hêng ū só͘ lia̍h chò Chú chhut-sì ê bé- tiâu, m̄-chai sī á m̄-sī. Khó-sioh hit só͘-chāi tuì tī Lô-má kàu kap Hi-lia̍p-kàu khiàn-sńg ê chng-thāⁿ chiū lóng sit- lo̍h hit ê pún-lâi ê bīn-bo̍k.
Tńg-lâi Iâ-lō͘-sat-léng chiū khì Ka- ná soaⁿ, chia in-uī ū chē-chē kiàn-tiok chiū oh-tit sióng-siōng chá-ji̍t ê chōng-thài. iā ū khoàⁿ Pit-sū-tāi ê tî, kap hit ê lia̍h-chò Chú giâ si̍p-jī-kè ê lō͘ (Via Dolorosa). Lé-pài-ji̍t khì Sèng Bōng Pài-tn̂g. Chit keng sui-jiân sī îⁿ-îⁿ ê chin toā keng, iáu-kú tī piⁿ-á ū hun kuí- nā keng, hō͘ Thian-chú, Hi-lia̍p, Sū-lī-a, Ai-ki̍p (Coptic) chiah ê Ki-tok-kàu siāng chi̍t sî suî-ê chò ka-tī ê lé-pài-sek!! Chin kiáu-jiáu bē-ē chòng-giâm. iā ū Eng-kok ê kéng-chhat teh siú, kiaⁿ-liáu ū saⁿ-chiⁿ !
Lī-khui hia khì pak-sì. Tī ē-tàu-sî keng-koè Sat-má-lī-a, iā ū lim Ngá-kok ê chéⁿ ê chuí chin liâng. Ū oá Kî-lí- sim kap Í-pat ê soaⁿ-kha, iā ū khì Sī-kiàm (Nablus, chit só͘-chāi tī kīn-lâi ê tē-tāng ū toā sún-hāi). Tī-hia ū kó͘- chá Sat-má-li-a phài ê lāu chè-si, i ū chiong ke̍k chá Mô͘ se Ngó͘-keng ê bûn hō͘ goán khoàⁿ. Koh koè soaⁿ chiū keng koè Iâ-su-lia̍t ê pêⁿ-iûⁿ. Che sī puî-tē, chêng boē bat khoàⁿ puî-tē tī Ka-lâm ! Chiah kàu Ná-sat-le̍k; tī chia só͘ siū ê kám-chhiok oh-tit kóng. Ū thang khoàⁿ Má-lī-a ê chéⁿ, iā ū peh hit pêng ê soaⁿ. Tī hia khoàⁿ-kìⁿ chheh-bīn só͘ kì ê kong-kéng chiū-sī lán Sèng-tō ū chhut-miâ ê só͘-chāi. Tī pak-pêng lī 60 Eng-lí ū Hek-bûn soaⁿ khàm-seh teh si̍h.
Lī Ná-sat-le̍k koè Ka-ná siâⁿ chiū ē- po͘ 4 tiám kàu Ka-lī-lī Hái ê Thê-pí-lī-a, chiū-sī tī hái ê sai-lâm. Chit ê tē-hng sī chin kē, pí hái-bīn kē 682 chhioh. Tī Chú ê sî Hi-lu̍t An-thê-phàⁿ ū i ê ông-kiong tī kīn-hū ê soaⁿ-piⁿ; iā ū chhut-miâ ê jiû-n̂g choâⁿ-tī-hia. Hiān-sî So͘-kek-lân ê Tiúⁿ-ló-kàu ū siat i-koán tú tī hái-kîⁿ, goán ū toà tī hia kap Sòng Ko͘-niû (Hazel chiū-sī He-sù) chò-hoé. Goán tuì hia chē chûn-á tī hái-bīn iā ū khì Ka-pek-lông. Koh put-sî teh khoàⁿ hit ê ge̍k-soaⁿ Hek-bûn. Khó-sioh sî- kan chin pek, chiū beh liâm-piⁿ tńg-khì Tē-tiong-hái piⁿ ài koè Lé-pài-ji̍t tī Ka- bi̍t soaⁿ. (Téng-bīn chiah-ê sī tuì Lâu Bo̍k-su ê phoe e̍k--ê. Liâm Bo̍k-su iā kap i khì)
