Kū-koàn ê Chīn-la̍t
Tân Thiam-ōng
1928.10.01 523 Koàn (KOÀ-CHHÀI-CHÍ TĒ 32 Hō) p.17-18
(Bô-ì-tiong ê chham-koan)
Gī-bîn-biō sī tī Sin-tek chiu Sin-po͘ koe hū-kûn ê soaⁿ-kha só͘-chāi. Chiàu Pang-liâu ê lâng só͘ chai teh kóng, chá-nî Tè Bān-seng hoán, ū chin choē lâng uī-tio̍h kok-ka chīn-la̍t lâi sí; āu-lâi kàu Lâu Khim-chhe sî-tāi, Hông-tè ū chhut-chiàu hong in choè "Gī-bîn-iâ." Tuì án-ni chin choē lâi hōng-kèng, soà tēng-lē tī kū-le̍k 7 ge̍h 20 ji̍t siat phó͘-sì chè bô-chú ê ko͘-hûn.
Chit ê biō ū 2000 goā cho͘ ê châi-sán, chóng-sī koaⁿ-hú ū kā in chè-hān, muí-nî 400 cho͘ choè cha̍p-huì ēng, iáu--ê kài-hù kàu-io̍k kap siā-hoē kong-kiōng ê sū-gia̍p.
Chit ê phó͘-sì hun-choè 15 khu, ta̍k khu sī 15 nî tio̍h chi̍t pái; kin-nî lûn-tio̍h Tiong-le̍k koán-hā, Toā-lūn hū-kūn ê chng-siā. Só͘ khai ê chîⁿ chin-chiàⁿ choē, káⁿ ū 10 bān kho͘ í-siōng (m̄-sī kong-chîⁿ, kok-lâng chū-tam).
Hit ji̍t chè-tián ê kong-kéng, ti ū 2000 chiah, iûⁿ kap koe-ah kuí-nā chheng chiah, lâi-óng ê lâng ū 5 bān khah ke. Ti it-téng toā--ê sī Toh Siu-siuⁿ.
1 téng 898 kun 6 téng 836 kun
2 téng 880 kun 7 téng 833 kun.
3 téng 872 kun 8 téng 831 kun.
4 téng 871 kun 9 téng 816 kun.
5 téng 869 kun 10 téng 804 kun.
Poeh pah kun í-hā sǹg bô téng. Sǹg iàu sī chin kiaⁿ--lâng. Biō sī tī soaⁿ-phiâⁿ-kha, chi̍t-ē khoàⁿ-tio̍h moá-soaⁿ sī lâng kap toā-ti. Khì ê sî iân-lō͘ sī lâng, toā-ti ū ēng lâng kng, ū-ê ēng gû-chhia, ū-ê ēng chū-tōng-chhia; tuì tio̍h chú-phó͘ ê toē kàu Pang-liâu kiâⁿ-lō͘ ài 8 tiám cheng kú. Kan-ta tong-sū-chiá 320 miâ, iáu-ê ke-ke hō͘-hō͘ ài khai chin-choē chîⁿ.
Thiaⁿ kóng beh kàu-sî ū sí chi̍t chiah toā-ti ū 900 goā kun, nā bô sí it-téng; sí liáu hit ke nn̄g-saⁿ ji̍t bô hé-hun, ēng peng lâi peng, iā ēng ta̍k-hāng ê hong-hoat lâi kiù-tī bô hāu.
Toā chiah ti tn̂g ū la̍k chhioh sì chhùn, phiaⁿ-liâu ū sì chhioh chó-iū.
Hit ji̍t ê kú-hêng sī bē-bat ū, chài-mi̍h kap tah-kheh ê chū-tōng-chhia ū 50 chiah í-siōng.
Tuì Tām-suí Tâi-pak í-hā ê hè-bu̍t-chhia it-chīn chhiàⁿ khì, chi̍t tâi chhia kang-kim ài 30 kho͘. Tâi-pak khí-sin kàu Toā-ô͘-kháu ē ê soaⁿ-phiâⁿ poâⁿ-kè ū 50 mai, Tâi-oân 150 lí, (chiàu chū-tōng-chhia kiâⁿ só͘ sǹg).
Hong-siaⁿ chin lāu-jia̍t, kuí-nā pái khì bô sêng, chit pái bô ì-tiong ū chhin-iú ê chū-tōng-chhia sio-chio khì khoàⁿ. Lâng kóng, "Ní-bûn put-jú gán-kiàn," si̍t-chāi ū iáⁿ.
Khoàⁿ in ê chīn-la̍t sêng-sim sêng-kèng, hoán séng lâi siūⁿ, lán Kàu-hoē ê tong-sū-chiá kap sìn-tô͘ uī-tio̍h chin ê Sîn nā ū án-ni chīn-la̍t kap hi-seng iā put-chí khó-chhú.
