Jī-choá-láng
Iûⁿ Sū-ióng
1928.1101 524 Koàn p.5-6
Chhit-cha̍p nî-āu
Cha̍p-hoè-tiàm ông Oa-ná-mé-kà ū siú kap in lāu-bó só͘ iok-sok ê oē; kìⁿ-nā siong-tio̍h lâng ê phín-sèng ê choá-pâi-á it-chhè bô bē. Tī 1860 nî 8 goe̍h chhe 8, chiū-sīi khui tiàm ê tē-it ji̍t só͘ bē ê kiōng ū 24 hut koh 67 sián. Koè 70 nî āu i ê tiàm-oân ū chi̍t bān gō͘ chheng lâng. Siong-phín ê kè-ta̍t ū chi̍t ek sì chheng-bān hut. I ū tuì thiⁿ-ē chèng-bêng sêng-si̍t sī choè-liông ê seng-lí-hoat. Tâi-oân lâng iā kóng "Láu-si̍t hó chò pún."
Chia̍h-hun-lâng ē bô-êng
Chiàu khoàⁿ beh chhin-chhiūⁿ chia̍h hun ê lâng hiah bô êng--ê chin chió. In-uī chia̍h hun ê lâng, thiⁿ-kng ba̍k-chiu peh kim chiū chia̍h chi̍t ki, sé bīn liáu chiū suh chi̍t ki, koh pn̄g chia̍h boē khoà pá iā ài pok chi̍t ki. Ū-sî chha-put-to chia̍h bô thêng, suh bô hioh. Chit ki soà hit ki. oán-jiân chhin-chhiūⁿ toā kang-tiûⁿ ê ian-tâng teh chhut-hun. Khiā-teh iā chia̍h, chē teh iā chia̍h, ná kiâⁿ ná chia̍h. Hong nā teh thàu tiám bē to̍h, ū-sî chhè chiâⁿ 10 ki, 20 goā ki ê hoé-chhâ. Chia̍h hun ê lâng si̍t-chāi chin bô êng.
Thâu-khak-téng koà ian-tâng
iáu ē kì-tit teh tha̍k Sîn-ha̍k ê sî, Sòng Bo̍k-su bat kóng, Lâng m̄-thang chia̍h hun. In-uī siat-sú Siōng-tè nā beh hō͘ lâng chia̍h hun, tī lán lâng ê thâu-khak-téng, I tek-khak ē kā lán chhòng chi̍t ki ian-tâng. Phīⁿ-khang sī beh hō͘ lâng chhoán-khuì, m̄-sī beh hō͘ lâng bū hun-ian.
Chin ké ê hun-piat
Iû-thài ê keng-tián tiong ū chi̍t chām ê liû-thoân, teh kì Sò-lô-bûn ông ê tāi-chì kóng. Sī-pa ê lú-ông chiong nn̄g ê hoe-khoân lâi sàng Sò-lô-bûn. Chi̍t-ê sī si̍t-chāi ê hoe, chi̍t-ê sī jîn-chō--ê. In-uī chè-chō liáu chin kháu-biāu, só͘-í kap hit ê si̍t-chāi chin-chiàⁿ ê hoe oh-tit hun-piat. Hit-tia̍p ū chi̍t chiah bi̍t-phang poe oá lâi hioh tī hit ê chin ê hoe-khoân-ni̍h. Tuì án-ni lâng chiū bêng pe̍k. Sè-kan lâng ê ho-pháiⁿ, sìn-tô͘ ê chin-ké lán sui-jiân oh tit chai, chóng-sī Siōng-tè bô chi̍t hāng m̄-chai.
Bô tì-sek ê thiàⁿ
Ū chi̍t ê hū-jîn-lâng phō gín-á khì hō͘ i-seng khoàⁿ pēⁿ. I-seng kia̍h kiám-un-khì kah hit ê hū-jîn-lâng kā i ê kiáⁿ nge̍h tī koh-ē-khang. āu-lâi kia̍h chhut-lâi chi̍t-ē khoàⁿ, beh kàu 40 tō͘. I-seng chin kî-koài kóng, chiàu goá khoàⁿ to bô sím-mi̍h iàu-kín, thâu-khak kap chhiú bong-tio̍h iā liâng-liâng. àn-choáⁿ jia̍t-tō͘ ē chiah koân? Mn̄g chit hāng mn̄g hit hāng. Kàu boé hū-jîn-lâng chiah kóng, káⁿ sī án-ni hò͘? Chit-chūn thiⁿ-khì chin-koâⁿ, goá kiaⁿ-liáu ēng chit-ki léng chhìn-chhìn ê po-lê hō͘ goá ê kiáⁿ nge̍h, ē hō͘ i chin léng. Só͘-í goá ū tī chit ê hoé-lô͘ kā hang chi̍t ē. I-seng kóng, án-ni tio̍h là, lí gōng-gōng. Chit ê hū-jîn-lâng ê thiàⁿ kiáⁿ si̍t-chāi sī gōng-gōng ê thiàⁿ.
Nn̄g bān kho͘ pìⁿ 20 bān
Kiù-sè-kun ê Bú-sū Tāi-chiong 70 Hoè chiok-hō ê sî, ji̍t-pún ê Kiù-sè-kun kià nn̄g bān kho͘ beh khì kā i chiok-hō͘. Chóng-sī in hia tian-tò kià 10 poē chiū-sī jī cha̍p bān kho͘ lâi beh hō͘ in chò Sū-koaⁿ Ha̍k-hāu ê kiàn-tiok-huì. Chit keng ha̍k-hāu í-keng khí-hó. Tī pún-nî 9 goe̍h 4 ji̍t kú-hêng sin-tiok khai-hāu-sek. Ki-tok-tô͘ ê hiàn kim m̄ sī liáu khì, Siōng-tè beh ke siúⁿ-sù 10 poē 100 poē hō͘ lán. M̄ bat thiaⁿ-kìⁿ lâng tuì hiàn-kim tī kàu-hoē lâi tì-kàu sàn-hiong.
