首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台灣基督教史
台灣基督教史
卷期：第525卷 本次： 日期：1928/12 刊名：台灣教會報/芥菜子 頁數：11-13
篇名：台灣基督教史 [ Tâi-oân Ki-tok-kàu Sú ]
作者：吳昌盛 Gô͘ Chhiong-sēng
  顯示 : 漢羅 全羅 並列  

台灣基督教史

1928.12  525卷  p.11-13

吳昌盛

(紲接前號)

佇1657年，10月5日，台灣年會詳細書的跋萃有寫，「有對新領事接著Ba-ta-bia來的批信。彼个內容有咧嫌阮教化南部眾鄉社用新港話做用語，致到無得著大成功的事。閣亦講欲將這个地方的教化委託政府，毋予教會干涉。總是這項是因為當局干焦愛阮緊成功亦毋允阮的要求的所致。阮有對當局請六項，總是無允阮。(1)著愛予牧師有權通召集in所想得當的教師，閣予in有自由通揀in所欲研究的地方。(2)對欲研究南部鄉社的話的眾牧師，求政府歡喜予官吏來教。(3)In所召集的官吏到教師著愛指導in所愛欲學的話。(以下猶有三項，免攏總講)。閣再亦禁阮毋通教荷蘭話。

「亦有對台灣的當局請欲建設神學校的事，佳哉這層有得著許可。建設神學校的目的，就是欲養成在地的青年，予in有做傳道師的才調佮資格。代先政府有想欲起蹛Sovlang抑是新港的所在。總是後來有得著本年會的進言才決定來起佇Mattau。(總是若看「台灣志，有兩間的神學校。就是起佇Mattau佮新港。拍算新港敢是後來閣起--的)。本年會進言的理由有5項。(1)Mattau的地勢是親像美所波大美的款，是佇兩條溪的中間。欲走的學生快快通掠著，亦會通持防in軟汫的志氣，這項是真通煩惱的事，特別佇創業的起頭閣較著想的事。所以神學校著愛起佇Mattau；因為遮的溪閣深，流閣緊，閣常常有風颱通做持防逃走者。(2)Mattau是真靜的所在，真好勉強，佮真攪擾的中國人隔離真遠。佇這个所在來研究上帝的道理是真拄好的所在。閣Mattau的周圍有真媠的樹林來圍咧。既若親像刁工為著這款的目的來做--的。(3)佇Mattau有會社所iú的厝，彼間有一个半樓，通予咱省起倉庫的費用。彼間是用石起--的，所以亦會通持防火燒厝。閣這間大厝的後面有一間蓋瓦的小厝。校長的宿舍閣離遮無遠。(4)Mattau是比新港佮Sovlang閣較近拍獵的所在，所以真容易通得著好的肉。論到魚類的事，卻無通親像Sovlang遐利便，總是亦毋是真僫得得著的物。因為Mattau是比別位較有討魚的人蹛佇遐。(5)煞尾這項閣是第一要緊。台灣無一所在有親像Mattau有遐濟監督者佮官吏捌Sydeyan (西螺話？)。Sydeyan是Mattau附近咧用的話語。對以上遮的理由，本年會才講年會著去蹛Mattau較得當。

「忠告的第二項，就是關係經營的代誌。頭擺募集的人員拍算30名是較拄好。總是著設備甲有通補缺病死抑是退學的。遮的人員著愛對逐所在來取。著愛揀真好記持的，性質閣真好的，閣真快理解的。著愛暗念種種的祈禱佮基督教問答。閣著有氣力通學荷蘭話的。以上閣著真愛讀冊的，歡喜承受教訓的才會用得。若會通對孤兒抑是拄著不幸--的來揀是猶較好。年歲是對10歲到14歲做標準。欲教育遮的青年佮監督in，的確著愛有一个校長，(本年會推薦Hambreck)。亦著愛一个副校長(本年會推薦Johaⁿes Horstaman)。會計一名(當局若無用校長抑是副校長來兼任，本年會看Mattau校的教師Valentyn Hermange Verdelfft做得當者)。伊會通做Mattau校的教師閣會通兼神學校的會計。

「忠告的第三項，就是關係學校的順序，規則佮學課的事。對一般來講，午前中是研究在地話；午後是欲研究荷蘭話。勉強的時間是對6點到8點，對9點到11點，閣對午後3點到5點。學生猶未通理解荷蘭語的中間副校長著愛用本地話來教「基督教問答，」著愛出力來教，向望予學生會通得著真的理解。相siāng的代誌，校長著愛佇10點到11點來教。九點佮11點是欲做學生寫佮讀的時間。拜四做定期的歇睏日。佇這日學生會通自由運動，thit迌抑是欲外出攏會用得。午後做研究荷蘭話的路用，紲推薦恁用「The Door or Portal to Language」這本做教科書。這本有真濟的荷、台話的慣用句。愛恁採用的規則，就是副校長著愛監督學生的起床，予in家己換衫，洗面佮梳頭。透早咧念祈禱的時著用敬虔的態度跪咧。讀冊前，讀冊後，著愛祈禱。食飯的時間是早起頓對8點起，中晝頓對12點起，暗頓對6點起。食飯前著愛稱謝上帝的恩惠，食飽後著愛感謝上帝的恩典。欲食中晝頓佮暗頓的時著讀一章的聖冊，是學生輪流讀--的。祈禱的事是食飽了抑是讀冊了的時任命的。若無校長特別的許可無論甚物人攏未使得踏出神學校外。出去傷久--的，校長會通照伊所愛共伊罰。副校長欲刑罰學生才會通共拍一下nā-tiāⁿ。逐日著設兩个做當番，予in通相替做代誌。In所著做的代誌就是記遐的無做好品行--的佮佇研究荷蘭話的時講本地話的，來報副校長知。副校長著愛監督學生的服裝佮室內的衛生，閣著愛注意加添幸福的事。閣再愛求當局著命令幾若名的奴才來做遮的粗工，予in來洗學生的衫褲，煮食佮料理厝內的事。

「In有講欲召北部的宣教師來蹛赤崁，這層是阮所袂通同意的事。彼个理由就是近來彼搭有嶄然較進步。老幼對暗記有學真濟項的事。若閣忍耐幾年仔就會通親像插-蓋附近的鄉社遐捌基督教的智識。閣再若召北部的宣教師轉來赤崁是干焦予北部的人民失望nā-tiāⁿ。毋-若按呢，會予宣教師失落學北部話的希望。最近in的語學嶄然有進步。設使in的所想若通過是干焦予遐的宣教師失落向望，閣予in的勞碌變做無路用nā-tiāⁿ。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461