虞朝清的小傳
1929.06 531卷 p.10
(卓Uí-sîn)
傳道師虞朝清，伊的本所在佇高雄州旗山郡杉林庄新厝仔，伊的父母早早就過身，細漢的時攏是倚靠伊的公牽教。彼霎新厝仔有教會佇遐，伊的公虞生不止熱心拜上帝，就peh-kàu予伊來讀中學。後來拄遇我來佇交坪做傳道，我有設1間教會的小學，彼時我就請伊來教小學，所經過的成積不止好。
後--來阮看伊不止關心愛做教會的工，所以有舉薦伊來讀神學。伊卒業就去蹛佇交坪、頭社、關仔嶺、東後寮的教會。佇今年傳道局有派伊欲去蹛佇岡仔林的教會，伊佇4月14 的禮拜有轉任去岡仔林。閣過禮拜倒出來欲設法伊的行李入去，無扑算到新化街，伊就起急性的肺炎，食藥無效。到21日就離開世間，今年37歲。
論伊蹛教會不止盡忠做工，也是真活動，無論蹛甚物教會，毋捌聽見佮人衝突，佇社會不止平和，這也是真通可取。
上可惜通替伊掛慮的就是伊現時有5个半子，就是1个猶未出世，伊的子攏猶真細漢，聽見伊過身，身軀邊攏無遺產。
今虞先生娘欲維持遐的細子過日，實在有長長的掛慮。大向望列位相疼的好朋友為著伊的家眷來鬥同情，來伊祈禱上帝，這是心所大向望--的。 |
