誠實<br />陳--氏碧鳳<br />1932.02, no. 563, pp. 5<p>（這篇是本人佇嘉義基督教青年會例會的講演）。<br />誠實，是現代青年所-要緊；另外老人teh看咱青年，是用這个誠實做標準。 <br />咱若聽著人teh講：某青年是誠實，某女子是可取，敢無歡喜麼？<br />因為誠實的人予咱真會信賴--得；毋旦按呢，閣予咱會誠實，是真好啦！<br />愛講濟濟；可惜因為今日的環境，無啥順事，精神bē統一。 所想淡薄來相勉勵。 遮講兩項就好。<br />1. 誠實是敬虔。 誠實的人佇上帝的面前會顯出敬虔的意思。 這款，毋是法利賽人的敬虔。 佇"佮上帝同行的一日"有一暫teh講："合掌的心。" 這敢毋是真的敬虔麼？ 詩篇95篇6，7節有講："敬虔佮順服聽伊的聲。"<br />俗語講，"誠實好做本。" 所以咱信徒的信仰生活，著有曉出敬虔的誠實。 <br />2. 誠實是真的美。 真的媠毋是穿媠衫，掛媠的領巾；抑是穿花紅柳綠，抹粉點胭脂麼？<br />試看主耶穌，伊的服裝無人嫌伊傷bái；也無人批評伊傷媠。 伊是真質素。 <br />佇路加23:11。 人共伊紅袍。 這是戲弄伊。 咱敢通家己戲弄麼？<br />主耶穌顛倒予人尊敬；人益發愛望伊的衫仔裾。 這是對伊質素的衫，soà有莊嚴的神跡顯出。 <br />通知真的媠，不在佇外皮；是在佇逐人的心。 誠實的心的，就會發出真的美；奸詐詭譎的，伊的行做是親像癩哥乞食；外皮穿媠有啥路用？<br />向望咱佇這个青年時代著養成咱的真的美，就是"誠實"。 欲 tuì 這个"誠實"來改造現代腐敗的社會。 現時咱教會猶boē到完全。 青年啊！ 著奮起！ 用誠實來合腰，chiah會通刣贏現世的害竹，閣會通建設榮光的神國！ 是心所願。</p><p></p> |
