Chin kap Ké
Tân--sī Chhoan-kiong
1932.08, no. 569, pp. 14-15
Goá khoàⁿ sè-kan ê mi̍h, ta̍k-hāng ū chin ké. Taⁿ beh kóng ê, chiū-sī lâng ê chin ké.
Thâu-chi̍t hāng sī Ké.
1. Bīn-chêng ê ké-chò. Lán choē-choē chheng-liân hiaⁿ-ché, chhut tī siā-hoē teh oa̍h-tāng, keng-êng sū-gia̍p; ū chia̍h thâu-lō͘--ê, iā ū tī ha̍k-hāu tiong teh bián-kóng--ê, kok lâng chīn in ê gī-bū. Nā-sī ū chi̍t khoán ê chheng-liân, tī chú-lâng ê bīn-chêng, á-sī tī sian-siⁿ ê bīn-chêng, chhin-chhiūⁿ sèng-jîn; chóng-sī tī bô lâng khoàⁿ-tio̍h ê tiong-kan, bû ok put chok. Sio̍k-gú kóng, (chha̍t-á ké sèng-jîn); goá kóng chit khoán sī bīn-chêng ê ké-chò.
2. Chu-keh ê ké-chò. Lia̍t-uī chheng-liân hiaⁿ-ché, lán chò Ki-tok-tô͘, chiū-sī Thiⁿ Pē ê kiáⁿ, lán ê chu-keh boē thang lām-ēng. Khó-pí lâi kóng, ū chi̍t ê hông-tè, i ê kiáⁿ chiū-sī thài-chú, in lāu-pē só͘ siat ê hoat-lu̍t nā hoān-tio̍h, i m̄-nā hō͘ in lāu-pē ê hoat-lu̍t boē thang hō͘ lâng kiaⁿ-uì, iā ū put-hàu tī in lau-pē, koh ko͘-hū i chò thài-chú ê chu-keh. Hô-hòng lán chò Siōng-té ê kiáⁿ, nā bô thàn Sèng-keng ê kà-sī, m̄-nā put-hàu tī Thiⁿ Pē, iā hō͘ lán ê kàu-hoē boē thang tit-tio̍h kóng-khoah, koh ko͘-hū Chú ê Si̍p-jī-kè.
3. Sim-lāi ê ké-chò. Sèng-keng Má-thài 15:7 ū kóng, "Ké-hó ê lâng ah! Lín ēng chhuì-tûn chun-kèng goá; nā-sī lín ê sim lī-khui goá hn̄g-hn̄g." Iû-tāi sim-lāi ké-chò ê sū, kì tī Má-thài 26:48. Lán chai Iû-tāi sī Iâ-so͘ ê ha̍k-seng; ha̍k-seng kap sian-siⁿ ê thiàⁿ-chêng chhin-chhiūⁿ pē-bú ê thiàⁿ, bô koh-iūⁿ; chóng-sī Iû-tāi ēng chim-chhuì bē sian-siⁿ. án-ni hián-bêng i chin thiàⁿ I; m̄-kú i ê sim ū khǹg pháiⁿ liām-thâu. Lán chò Ki-tok-tô͘ ê lâng, nā kan-ta ēng chhuì gâu gîm si, gâu tha̍k Sèng-keng, á-sī gâu kî-tó, nā-sī i ê sim ū khǹg oàn-hīn lâng, á-sī gâu phoe-phêng lâng. Chit khoán ê sim, lī-khui tō-lí chin hn̄g; chit khoán chiū-sī sim-lāi ê ké-chò.
Tē-jī hāng sī Chin.
Tī Iok-hān 15:1, Iâ-so͘ kóng, "Goá sī chin ê phû-tô-chhiū". Iâ-so͘ sī chin ê Kiù-chú, lán ài tiàm tī I; nā bô ēng chin-si̍t chiū bē-ē.
Chóng-sī nā ài chai chin ê thiat-tí, tio̍h khoàⁿ ū siū tio̍h chē-chē chhì-liān á-sī sím-mi̍h khún-pek ê sū, iáu-kú ē khiā-chāi. Chhin-chhiūⁿ lán chē-chē chheng-liân, chhut tī siā-hoē, ē siū chē-chē khùn-khó͘, iā ū chē-chē iú-he̍k ê sū; siōng-chhiáⁿ ē khiā-chāi. Chit khoán thang kóng sī chin ê Ki-tok-tô͘. Sio̍k-gú kóng, "Chin kim put phàⁿ hoé; kìⁿ hoé piān siau-si̍h." Nā kó-jiân sī chin ê, hoán-tńg ē hō͘ lán ê sim-sîn kian-kò͘.
Chhiáⁿ mn̄g lia̍t-uī: ài chò chin--ê, á-sī ài chò ké--ê?
Hū-kì: Chit phiⁿ sī tī Ka-gī Y. M. C. A. Lē-hoē só͘ káng-ián--ê.
Kì-chiá: T. K. P.
