Seng-ga̍k Cha̍p-tâm
(H. T. S.)
1933. 03, no. 576, pp. 20

1. Seng-ga̍k sǹg-sī tī im-ga̍k ê tiong-kan choè ū kám-tōng-la̍t ê sèng-chit. Khì-ga̍k sǹg-sī chiong lâng ê su-siúⁿ kám-chêng, ēng kàn-chiap ê hoat-tō͘ lâi piáu-hiān ê. Nā-sī seng-ga̍k sī ēng ti̍t-chiap ê hoat-tō͘.
2. Lâng cháiⁿ-iūⁿ tio̍h gîm, tio̍h chhiùⁿ? Choè toā ê bo̍k-tek chiū-sī beh hoàn-khí lâng ê kám-chêng, ū hô-khì, ū ko-siōng ê cheng-sîn, lêng-tek ê khì-siōng. Koh tuì chit ê lâi khek-tiâu tī lâng ê sim-té, chhin-chhiūⁿ khek-jī tī chio̍h-pi, kú-tn̂g ìn-siōng chù-ji̍p tī thâu-náu-lāi.
3. Chong-kàu im-ga̍k ê kè-ta̍t, chiū-sī pí sè-sio̍k im-ga̍k ū koh-khah toā ê khuì-la̍t lâi chō-chiâⁿ chit ê bo̍k-tek. Só͘-í ū lâng ài chhiùⁿ sè-sio̍k-tek ê koa-khek, liû-hêng-khek, loân-ài-khek, m̄-ta̍t-tio̍h siông-siông ài chhiùⁿ Chong-kàu-khek, Sèng-ga̍k-khek, Chàm-bí-koa sī khak thò-tòng. Ū-sî sè-sio̍k-khek ū pau-hâm chin toā ê guî-hiám-sèng tī-teh. Chiàu só͘ siūⁿ, im-ga̍k tio̍h put-chí ū chong-kàu-tek, ia̍h chong-kàu tio̍h put-chí ū im-ga̍k-tek, chiah ū kè-ta̍t.
4. Ū lâng ē gîm chin hó-thiaⁿ, án-ni bô kàu-gia̍h. Beh thiaⁿ hó-thiaⁿ ê, khì kàu tó-uī lóng ū tàng thiaⁿ. Chin ê seng-ga̍k-ka tek-khak ū i ê seng-ga̍k-tek pún-lêng, á-sī sò͘-chit tī-teh. Kha-kut suí ê lâng bô tek-khak lóng tio̍h chò bú-tō ka(dancer). Nā ū hit ê thian-châi chū-jiân i sī bú-tō-ka. Seng-ga̍k iā sī sio-siāng. Adelina Parry hu-jîn (chhut-sì tī Se-pan-gâ, toā-hàn tī Bí-kok Í-tāi-lī-hē tē-it liû ê seng-ga̍k-ka), sǹg-sī chhut-sì chiū ū hit ê seng-ga̍k-tek ê pún-lêng. Só͘-í lâng mn̄g i cháiⁿ-iūⁿ gîm, i ka-tī kóng, goá m̄-chai.
5. Ū seng-ga̍k-tek pún-lêng á-bô, nā thiaⁿ i gîm d：r：m：f：s：l：t：d ê im-kai siōng-hā chiū ē chai. Phó͘-thong ê lâng gîm chi̍t-jī doh kap seng-ga̍k-ka só͘ gîm chi̍t jī doh chiū ū toā cheng-chha. In-uī seng-ga̍k-ka só͘ teh hoat-im lóng ū i ê chhuì-chi̍h, nâ-âu, chhuì-koà, chhuì-tûn tú-hó ê uī-tì. I ê ho͘-khip iā ū chiàu seng-ga̍k ê kui-kí teh chhú-kip. Chin-chē lâng lóng sī teh gîm i ka-tī ê gîm-hoat. Gîm ka-tī thiaⁿ ē hiáu, ē sóng-khoài chiū kàu-gia̍h. M̄-koán i ū chiàu it-tēng ê kui-chek á-bô, á-sī hō͘ pa̍t lâng thiaⁿ-liáu ē tit-tio̍h sím-mi̍h á-bô. In-uī seng-ga̍k ê bo̍k-tek, chiū-sī chhin-chhiūⁿ téng-bīn í-keng ū kóng, sī beh hō͘ lâng ê kám-chêng hiòng-siōng, ēng chin hó ê mi̍h ìn-siōng tī lâng ê thâu-náu, kú-tn̂g tī-teh, chhin-chhiūⁿ khek-jī tī chio̍h-pi. (Boē-oân).