首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 論基督再臨
論基督再臨
卷期：第579卷 本次： 日期：1933/6 刊名：台灣教會公報 頁數：12-15
篇名：論基督再臨 [ Lūn Ki-tok Chài-lîm ]
作者：陳明清 Tân Bêng-chheng
  顯示 : 漢羅 全羅 並列  

論基督再臨

 (陳明清)

 (接前號第15面)

1933.06. 579卷，pp. 12-15

 

  II. 時代的分別。

聖經對這个「時代」的分明；就是對亞當受創造起，到啟示錄21 ：1的「新的天，新的地」出現為止，會通分7个時代(弗2 ：7)。逐个時代攏用審判來煞尾。顯明人完全是失敗。

  Taⁿ這7个時代已經經過5个時代了lah。咱現時是活佇第6時代；閣是第6个時代的路尾lah ；通講是佇拜6暗(II比3 ：8)，拄拄teh聽候義的日頭(就是基督)出現。第7个時代；就是千年王國時代(安歇的時代，大禮拜日)已經佇目前teh聽候咱lah ！

  Taⁿ愛將這7 的時代來分別寫佇下底來研究：－

I. 亞當的時代

對創造亞當起，到挪亞的大水為止。(這个中間有1650年的久)。這个時代所要緊的代誌有7項：－

  (1)上帝創造天地萬物(創世記1章)。

  (2)創造人款式親像上帝(創2章)。

  (3)始祖犯罪(創3章)。

  (4)人類起頭刣死人(創4章)。

  (5)以諾得著接納上天(創5章)。

  (6)用大水滅無歹人(創6章)。

  (7)挪亞一家8人得救(創7章)。

這个時代雖然有歷過1600外年的久，iáu-kú只有10代的人nā-tiāⁿ。因為彼時的人歲壽食真長。若是現今的人因為陷落佇罪惡，袂通親像早時的人hiah長歲壽。

  II. 挪亞的時代

對大水去，到亞伯拉罕受召為止(這中間有370年的久)。這个時代所要緊的代誌有4項：－

  (1)大水了後，上帝設立新的規矩來治理世間人(創8，9章)。

  (2)挪亞的犯罪佮讖語伊3个囝將來欲怎樣(創9章)。

  (3)Ná-a 3个囝：閃，含，雅弗的後裔怎樣(創10章)。

  (4)世間人心驕傲，愛起巴別的塔，主拍亂in 的言語來四散in (創11章)。

這个時代雖然有歷過的年數只有370年；就是前个時代的五份一nā-tiāⁿ。

  III.亞伯拉罕 的時代

對亞伯拉罕受召起，到摩西出世為止，這中間有430年的久(出埃及記12 ：40，41；加拉太3 ：17)。這个時代所要緊的代誌，有7項：－

  (1)亞伯拉罕受召來趁耶和華(創12章)。

  (2)亞伯拉罕對信得著稱做義(創15章)。

  (3)亞伯拉罕獻伊的囝以撒予主(創22章)。

  (4)以撒娶某的事(創24章)。

  (5)雅各夢見有樓梯對地透到天(創28章)。

  (6)約瑟一世人攏是teh辯明基督的事(創37－50章)。

  (7)摩西出世了後，倚靠家己的氣力，愛救上帝的百姓(創1－6章)。

  IV. 摩西的時代

對摩西出世起，到大衛王坐位為止，彼个中間有590年的久。這个時代所要緊的代誌，有8項：－

  (1)以色列脫出法老的手，離開埃及國 (出12章)。

  (2)以色列到西奈山，上帝賞賜律法，會幕的事(出19章)。

  (3)以色列離開西奈山，到約旦。所歷過曠野的路站，有38年的久(民數記1－36章)。

  (4)以色列到約旦的東爿。摩西死佇Pí-sū-ka 的山頭(申34章)。

  (5)約書亞chhoā百姓過約旦河，刣贏迦南，分遐的土地予逐支派(士1－24章)。

  (6)上帝設立士師來治理百姓，若是這中間百姓犯罪，大衰退的時代(士1－21章)。

  (7)耶和華揀撒母耳做先知；以色列揀掃羅做in 的王(I撒 1－15章)。

  (8)耶和華用油抹大衛，予伊代先歷過艱苦，後來為主刣贏眾對敵。

對頂面所寫，通知上帝怎樣teh款待伊的選民；就是以色列百姓。看創世記，通知in 的受揀選；看出埃及記，通知in 的得救；看利未記，通知in有得著教示；看民數記，通知in受試的事；看申命記，通知in備辦欲入迦南的事；看約書亞記，通知in果然有得著迦南的好土地；看士師記，通知in 的大衰退的事；到撒母耳的時，通看出in 的國有閣興起。總是了後因為掃羅王的因端，國有閣衰退。到大衛坐位的時，國才閣得著振興。

  V. 大衛的時代

對大衛坐位起，到以色列百姓受掠為止，彼中間有400年的久。這个時代所要緊的代誌，有8項：-

(1)    大衛雖然受掃羅窘逐，iáu-kú受主的庇佑，後來得著做猶大支派的王(I撒)。

(2)    大衛後來佇耶路撒冷得著立做以色列12支派的王(II 撒1-10章；I大13-19章) 。

(3)    大衛到中年的時，因為犯罪的因端，伊的家庭佮國家有歷過濟濟的艱苦(II 撒 11-24章；I大 20-29章)。

(4)    大衛的囝所羅門坐位，做以色列行伍的王。伊的國大興。可惜到尾違背主的道理(I王1-11章；II大 1-9章)。

(5)    所羅門過身了後，以色列有分做兩國。北，做以色列；南，做猶大(I王12章；II 大 10章)。

(6)    北爿的以色列國，遐的王攏行歹。南爿的猶大國，遐的王較濟也是行歹；只有幾若的王盡心服事主(I王 12章到II王 25章；II 大 10-26章)。

(7)    以色列百姓代先受掠去亞述國。後來猶大國的百姓也受掠去巴比倫國。巴比倫當時的王，就是Nî-pò͘-kah-nî-sat (II王17，24，25章；II大36章)。

(8)    當彼時主有揀召幾若的先知，就是以利亞，以利沙，以賽亞，耶利米才的 (I王17章到II王13章佮以賽亞，耶利米的冊)。

 

VI. 異邦的時代

對以色列百姓受掠去別國起，到基督再臨為止。所以這个時代到今仔日猶袂滿。這个時代通閣分別做3 chām ：-

1.     耶穌袂出世以前的時代(這个中間有560年的久)。

2.     耶穌佇世間的時代。

3.     教會時代。

第2佮第3个時代，也通稱做「基督的時代，」(有經過1900外年久lah)。咱現時所tiàm這个時代，就是屬佇教會時代，抑是講，「恩典時代。」因為現時是「受接納的時，拯救的日」(哥林多後書6 ：2)。

這个異邦的時代所要緊的代誌，有6項：-

(1)    猶太國的百姓已經受掠去巴比倫滿70年久，照聖經的讖語，予遐的百姓倒轉去in 的本所在(但9：12；耶 25：11，12，29：10)。

(2)    當彼時，也有先知幾若人，就是以西結，但以理，Hap-ki，撒迦利亞，Má-lia̍p-ki chiah 的。

(3)    佇這个異邦的時代，照但以理的讖語，果然有幾若國接續來管轄這个世界；就是巴比倫國，Bí-thài，巴西，希臘(Ngá-hoan)。羅馬chiah 的國(但以理2，7章)。

(4)    當羅馬國teh管轄的時代，耶穌做救主來降生佇猶太地(路2：1)。

(5)    耶穌替有罪的人死，閣活上天了後，聖神降臨佇這地上，來建立教會。隔40年了後，耶路撒冷受羅馬兵滅無；就是佇A.D. 70年。猶太人受四散佇列邦(行傳1，2章)。

(6)    現今猶是屬異邦的時代。這个時代是紲到教會(正聖徒)受接納上空中迎接主彼時才煞(I帖4：16-18)。

 

VII. 千年王國時代

對基督的地上再臨起，到新的天，新的地出現為止。這个時代有1000年的久，這个時代所要緊的事，有6項：-

(1)    對教會受接納上空中的時起，到佇主耶穌佮眾聖徒落來地上建設千年平安國的有大患難，閣佇彼時欲有假基督出現。(論chiah 的代誌，後來會閣講起)。

(2)    主耶穌欲佮聖徒對空中臨到地上，來滅無假基督，設立千年的平安國；佇耶路撒冷的聖城，執掌公義的權柄來管轄萬百姓(太24：29，30：路21：25-28；啟19：11-21，20：1-5；賽 2：2，11：6-13)。

(3)    一千年的中間，撒旦欲受掠hiat落佇無底坑(深淵)。地上所有的咒詛欲變做祝福(啟20：1-6；賽35：1，2，7，55：12，13)。

(4)    一千年滿了後，撒旦暫時欲受tháu放，就出來迷惑地上四方的列邦，來圍困耶路撒冷城，彼時就有火對天降落來滅in。後來就受發落火佮琉磺的 ô͘，永遠受刑罰(啟20：7-10)。

(5)    後來主就設立一个白色大的座位來審判死人(啟20：11-15)。

(6)    Chiah 的代誌了後，欲有新的天，新的地，新的耶路撒冷出現來做聖徒永遠的徛家 (賽 65：17；II比3：13；啟21：1-5)。

對頂面所寫chiah 的時代的中間，所歷過--的，已經有5千9百外年，欲到6千年。聖經講，「主看一千年親像一日」(II比3：8)。主耶和華將6日來創造天，第，萬項物，到第7日煞，來安歇。所以聖經常常用7做完全的數。對亞當受創造起，到現今已經歷過倚6千年，就是倚6日的久。到第7千年，就是平安的大安息日。舊約時代已經有歷過4千年；就是對拜一到拜四。新約時代拄拄是對拜五早起接起，所以新約的中間ta̍uh-ta̍uh記講，現今是末世(希1：2，9：26；I比1：20)。新約時代也已經歷過1930外年久。所以通講現今是佇拜6暗lah。

(袂完)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461