Seng-thian kap uî-chiok
1933.07 580 koàn p.6
Thài 28:16--20
Gō͘ goe̍h 25, Seng-thian-cheh ; chiū-sī Ki-tok chiàn-sèng khái-soân, kha ta̍h Sat-tàn , oân-siat Sîn-kok êng-kui ê ji̍t. ia̍h sī jîn-luī ê tē-uī, kap koân-lī khoe-ho̍k ê ji̍t, chiū-sī lán lâng chhut-sì ji̍p-oa̍h, éng m̄-thang bē kì-tit ê ji̍t.
Si̍p-kè ê kî tio̍h kia̍h koân, chê-siaⁿ pò-iông Chú ê miâ. Kia̍h thâu ! Khoàⁿ Chú ê seng-thian, kap thiaⁿ I ê uî-chio̍k:----
1. Thian-tē kui it-thóng. "Thiⁿ-téng tē-ē ê koân lóng-chóng hō͘ goá'' (18) Che sī Chú só͘ soan-giân, hō͘ jîn-luī chai thiⁿ-tē bān-mi̍h lóng-chóng kui-ho̍k, Chú teh chip-chiáng , thóng-hat in; chiâⁿ-chó bān ông ê Ông.
án-ni Chú chiū (1) Ko-seng jîn-luī, ho̍k-tò lâng ê tē-uī (chò kiáⁿ, sêng-chiap gia̍p ê koân-lī, chù-iû). (Lô-má 8:15-17). (2) Tháu-pàng jîn-luī ê kan-khó͘ (Má-thài 11:28-30, Lô-má 8:1,2). (3) Oân-sêng jîn-luī ê jîn-keh (Lô-má 3:20-28,4:3-9). Chiū-sī hō͘ lâng tuì sìn chheng-chò gī, lâi oân-chiâⁿ lâng ê jîn-keh, kap bān-mi̍h pêⁿ-pêⁿ kui-ho̍k.
Taⁿ- Chú í-keng li̍p-tēng beh hō͘ tē-chiūⁿ Thian-kok-hoà, lâi oân-sêng I ê toā sū-gia̍p. Kóng, ‘'Tī tē-ni̍h chhin-chhiūⁿ tī Thiⁿ-ni̍h''(Má-thài 6:10).
Lán chèng sìn-tô͘, tio̍h khí-lâi kap Chú tâng-sim ūn-tōng , hō͘ bān-bîn kap mi̍h oân-choân kui-ho̍k, ho͘ tē pìⁿ-chò thiⁿ.
2. Tāi-kí Thoân-tō. Kóng "Lín tio̍h khì chio bān peh-sìⁿ lâi chò ha̍k-seng.'' Chiū-sī tio̍h thoân hok-im, pò͘-tō......Chú ê bēng-lēng.
Chú ēng īⁿ-siōng chí-sī Pí-tek thoân-tō tī īⁿ-pang (Heng 10:9-16) . Chhe Pó-lô khì Au-chiu thoân-tō, í-āu ha̍k-seng chiap-soà. Kèng-jiân chiâⁿ-chò Au-chiu tāi-lio̍k chu-kok ê kok kàu, kap sin tāi-lio̍k ê kok-hûn(國魂), í-ki̍p Tang A bûn-bêng ê tō soàⁿ(導線).
Tang-sai lâm-pak bô chi̍t só͘-chāi bô Sèng-hoē ê kiàn-li̍p tī hia . Thang chai le̍k-tāi sìn-tô͘ ū si̍t-hêng Chú ê uî-chio̍k, bô hiâm lô-khó͘, kia̍t-le̍k kan-chèng ê só͘-tì.
Taⁿ lán sìn-tô͘ kiám-m̄ si̍t-hêng Chú ê bēng-lēng, ēng "Lín tio̍h khì.........'' Chiū-sī sìn-tô͘ kai thoân-tō , kò-jîn-tek hia̍p-tông ê toā khuì-la̍t, sî-sî ióng-chìn;bô hō͘ tek-sî put-tek-sî ê chó͘-keh, chhî-sio̍k tāi-kí thoân-tō, kui Chú ūn-tōng, piàn-piàn kàu tē-ke̍k. Thèng-hāu Chú koh lâi.
3. Sin-seng sèng-hoà ūn-tōng. "Kā in kiâⁿ sé-lé, hō͘ in kui tī Pē, Kiáⁿ, Sèng Sîn ê miâ.'' Oāⁿ oē lâi kóng, sī jîn-seng kek-bēng, á-sī sin-seng sèng-hoà ūn-tōng. Chiū-sī ēng Ki-tok ê pó-hoeh sé-khì lâng it-chhè ê choē-ok kap lâ-sâm, lâi oân-choân sio̍k tī Chú.
Ki-tok ū hō͘ lâng chheng-khì , liông-siān, kiáu-chèng ê la̍t, seng-gâi ê piàn-hoà, tí-khòng choē-ok ê seng-oa̍h, hióng-siū sèng-kiat seng-oa̍h ê hok-khì.
Só͘-í lán sìn-tô͘ tio̍h ji̍p sin seng-oa̍h lâi chiâⁿ-sèng, koh tio̍h chhoā pa̍t-lâng chìn-ji̍p lâi hióng-siū sin seng-oa̍h; chiū-sī sin-seng sèng-hoà ūn-tōng.
Lia̍t-uī kèng-thiàⁿ ê hiaⁿ-ché, Chú ê uî-chio̍k chiū-sī ài lán chīn sìn-tô͘ ê gī-bū kap sù-bēng. Só͘-í tio̍h kap Chú tâng-sim hia̍p-lek, chīn-la̍t kan-chèng, tāi-kí thoân-tō , khoah-toā I ê sèng-thé piàn-piàn,oân-chiâⁿ Chú ê uî-chio̍k, lâi pò-tap Chú kiù-lêng sio̍k-choē, kiù lán kiù lâng ê in :---
Hoah kóng , Iâ-so͘ Ki-tok seng-thian bān-soè ! Bān-bān-soè!
