It-khài bo̍h-tit khoà-lū
Pîn-tong seng
1933.08 581Koàn p.5
Pún-kan Chùn-pêng Sian-siⁿ kóng, ‘'Bô khoàⁿ-kìⁿ ê mi̍h beh hō͘ i ū khoàⁿ-kìⁿ, che sī sìn-gióng ê khuì-la̍t; bô sìn-gióng ê lâng, chit sè-kan ê bu̍t-chit lia̍h-choè chin ún-tàng, chin si̍t-chāi ; ū sìn-gióng ê lâng bān-sū bô si̍t-chāi, bô kú-tn̂g , khoài tńg-seh liû-tōng ê mi̍h.Só͘-í lâng nā him-bō͘ hit ê chhiau-oa̍t tī bu̍t-chit ê sim-lêng kài hit pêng ê sū, chiong che chò bo̍k-tek,in-uī beh tit-tio̍h hit ê, lâi cheng-chìn ê seng-gâi kiò-chò chiàu sîn lâi kiâⁿ ê sìn-gióng ê seng-gâi.''
San-sek tiong-chiòng kóng, ‘'Kî-tó Siōng-tè, chiū-sī hō͘ it-chhè ê hoân-ló cháu-siám ê lō͘.Bô-lūn chiú, á-sī oa̍h-tāng siá-chin, thiàu-bú-tiûⁿ, á-sī sím-mi̍h siat-pī ki-koan, iā boē tit thang hō͘ lán tit-tio̍h uì-an kap pang-chān ê,chí-ū tuì kî-tó thang tit-tio̍h. Kî-tó oē iô-tāng Siōng-tè ê khuì-la̍t(jia̍t-sêng chin-si̍t ê kî-tó). Hō͘ hoān-lān khùn-khó͘ uî-teh ê tiong-kan, iā chai thang kî-tó ê lâng, chiū bô tio̍h-kip, chhiⁿ-kông, koh sim-koaⁿ bē siū-bê lâi hām-lo̍h tī iú-he̍k, koh oē khah-iâⁿ it-chhè ê hoân-ló.''
Sèng Pí-tek kóng, ‘'Lín ēng hoān só͘ khoà-lū ê, kau-hù I, in-uī I koan-sim tī lín''(1 Pí 5:7).
Sèng Pó-lô kóng,''It-khài bo̍h-tit khoà-lū, to̍k-to̍k bān-sū tio̍h ēng kî-tó khùn-kiû kap kám-siā, chiong lín só͘ kiû ê, pâi-lia̍t tī Siōng-tè''(Hui 4:6)
Iú-bêng ê chok-khek-ka, lâng chheng i choè ‘' Khì-ga̍k á-sī kau-hióng-ga̍k ê lāu-pē'' Joseph Haydn(1732-1809), bat chi̍t pái kap nn̄g ê pêng-iú teh tâm-oā ê sî, chiū mn̄g in kóng, ‘'Lín nā hoân-ló,khó͘-thàng ê sî beh cháiⁿ-iūⁿ?''Chi̍t-ê kóng, ;''Tī hit-sî goá beh chia̍h-chiú lâi boē kì-tit hiah ê hoân-ló.''Koh chi̍t-ê kóng, ‘'Goá tī hit-sî beh tuì im-gak lâi kiû uì-an,'' Chóng-sī toā im-ga̍k-ka Joseph Haydn kóng, ‘'Put-lūn siáⁿ im-ga̍k, nā bô lâng chò khek, cháiⁿ-iūⁿ thang toâⁿ, thang gîm thang ián-chàu, thang tit-tio̍h thiaⁿ-liáu oē sóng-khoài?''
Jī goe̍h 27 hō àm, tī Tâi-lâm Kong-koán ū khui Sîn-ha̍k Hāu-iú-hoē chú-chhui ê chû-siān im-ga̍k-hoē, kî-tiong Sîn, Tiong, Lú ha̍k-seng, kî-thaⁿ iú-chì kiōng 100 miâ, só͘ ha̍p-chhiùⁿ''Thiⁿ-toē chhòng-chō'' hit tiâu chin chhut-miâ ê kheh, sī Joseph Haydn chò ê, chin hó thiaⁿ, kóng ‘'Goá tī hoân-ló khó͘-thàng ê sî, goá chiū kî-tó.'' I bô kóng, ‘' Goá tī hit sî chiū kiò lâng ián-chàu goá ê kheh, á-sī pa̍t-lâng ê khek,'' á-sī kóng, ‘'Lín tio̍h tuì im-ga̍k lâi kiû uì-an.'' Si̍t-chāi chin kám-sim, iā thang chin kng-bêng, hoaⁿ-hí ê khoán-sit?'' I ìn kóng, ‘'Siōng-tè ê Sîn tī goá ê sim-lāi, goá ū peng-an, khoài-lo̍k, bē kìm-tit chin hoaⁿ-hí tiô-thiàu chiū-sī.'' Chok-khek-ka ê sèng-keh iā thang tuì i só͘ chò ê khek lâi chai-iáⁿ, che-sī sū-si̍t. Chū-kó͘ ki̍p kim chē-chē ê chok-khek-ka lóng ēng kî-tó lâi chò-khek, che iā-sī sū-si̍t. I só͘ chò ê khek ū kèng-khiân kap sîn-sèng, ū Sîn ê hoaⁿ-hí moá-moá, che iā-sī tuì in ê khek só͘ piáu-hiān ê thang sêng-jīn. Nā thiaⁿ Handel ê chhut-miâ ê ‘'Bí-sài-a,'' á-sī ‘'Hallelujah Chorus'' sím-mi̍h lâng bô kám-kak-tioh hit tiong-kan ê sîn-sèng, kèng-khiân , hoaⁿ-hí ê im-ūn?
Tuì im-ga̍k oē thang tit-tio̍h uì-an, che iā-sī sū-si̍t. Chóng-sī nā bô ū kî-tó, bô thiàⁿ chú ê sim, chiū kui tī khang-khang. Ka-têng sui-jiân ū chi̍t,nn̄g chheng gîn ê piano, á-sī kui cha̍p khoán ê gû-lo̍k siat-pī, á-sī ū chîⁿ-gîn moá sì-soaⁿ, kiat-kio̍k iā-boē tit-tio̍h chin ê uì-an. Kap Chú kiat-liân siong-thong ná chhiū kap ki, chiū ū chin-si̍t ê hoaⁿ-hí, chhin-chhiūⁿ oa̍h chuí-choâⁿ tuì sim-chhân ti̍t-ti̍t chhèng, éng bô soah, ti̍t kàu éng-oa̍h.
(Boē-oân)
