Chhian-cháiⁿ it-gū
Lâu Chín-hong
1933.11 (584koàn) p.18-19
Chit-pang tú beh lâi ha̍k-hāu ê sî, lō͘ tio̍h tuì Chhī-ngô͘-kó͘ (jîn-kháu iok 4 pah-bān lâng) ê tô͘-chhī keng-koè. Chin tú-hó, tuì chhòng-siat to͘-chhī í-lâi, kin-nî tú sī chi̍t-pah-nî ê kú. Só͘-í in ū khai-chhui Bān-kok ê toā Phok-lám-hoē.
uī-tio̍h tuì tī ta̍k-kok ū chhut-phín ê in-toaⁿ, só͘-í kui-bô͘ khoah koh toā, chhâi-liāu kî-khá koh hong-hù. Chi̍t bīn phí-jîn in-uī hîn-chûn, iū-koh sî-kan kap keng-chè-siōng ê koan-hē, chi̍t-ē chiūⁿ-lio̍k, tī lú-koán keh chi̍t-mê, chiū liâm-piⁿ koh chē 5 mê-ji̍t ê chū-tōng-chhia, chiah kàu chit ê to͘-chhī. In-uī sim sin hui-siông ê phī-lô kap bô bîn. Tì-kàu sui-sī chai chân-liām, iáu-kú bô thang cha̍p-hun ê chham-koan. Chóng-sī ū siūⁿ hiah ê khah tiōng-iàu ê pō͘-hūn, tāi-khài káⁿ khoàⁿ ū chiâu-tio̍h ê sim-sǹg tī-teh.
Tuì tī chū-kí ê chong-kàu koan-liām kap tē-uī-siōng éng-hióng ê koan-hē. Chiông-tiong choè tē-it ū hèng-bī--ê, chiū-sī Ki-tok-kàu Kho-ha̍k-koán. uī-tio̍h choá-bīn ê koan-hē, só͘-í bē-thang siông-sè pò-èng, lia̍h-chò put-chí uî-hām. Tāi-khài tī chit-khoán ê lāi-bīn, lóng-sī koan-hē chong-kàu ê sū. Tuì tī kok-phài pò-kò koè-khì chi̍t sè-kí kàu-hoē ê chōng-hóng. Chiū-sī kàu-hoē ê kàu-sè, Soan-tō-hoē ê kang-chok kap Siā-hoē ê sū-gia̍p, kap kim-hō͘ ê kè-oē. Kî-thaⁿ tī 100 nî kú ê tiong-kan, tī kok kàu-phài-tiong ê lé-tián, gî-sek, kam-tok, bo̍k-su, kàu-hoē só͘ ēng kim-gîn ê khì-kū. iū-koh ū i-chiûⁿ, kong-ho̍k, kū su-luī chin-chē, lóng tī chit ê Kho-ha̍k-koán ē-thang khoàⁿ-tio̍h.
Chiū-tiong lia̍h-chò ū hèng-bī tī chit-keng--ê:---
1.Sè-kài siāng sè-pún ê Sèng-chheh. Goá só͘ khoàⁿ chit-pún, chha-put-to ū toā-thâu-bó ê toā nā-tiāⁿ. Sī ēng tê-sî té tī hit lāi-bīn, iū-koh só͘ siá ê jī, ēng lâng ê ba̍k-chiu khoàⁿ bē bêng, tio̍h ēng hàm-kiàⁿ chiò, chiah khoàⁿ ē bêng. Khoàⁿ chi̍t-khoàⁿ, Bí-kok ê chîⁿ sī 5 sián.
2. Chú ê kî-tó-bûn. Ū chi̍t-lia̍p po-lê, ná chhin-chhiūⁿ bí ê toā. Chóng-sī tī hit lāi-bīn, lí thang khoàⁿ Chú ê kî-tó-bûn choân-pō͘ bêng-bêng, sī ēng Eng-gú siá--ê. iū-koh tī téng-bīn ná chhin-chhiūⁿ Sat-bó-ní teh kî-tó ê siōng tī-hia. Chi̍t-lia̍p, Bí-kok chîⁿ sī chi̍t-kak-gîn.
3. Chi̍t-tè kū-toh. Chit-tè toh sui-jiân sī chho͘-chho͘, chi̍t-ē khoàⁿ bô siáⁿ bí-su̍t-tek, ū kè-ta̍t ê khoán. iáu-kú chit-tè toh sī tī tē 19 sè-kí chêng poâⁿ só͘ lâu kàu-taⁿ thang kì-liām ê toh. Chiū-sī Kiù-sè-kun ( Eng-kok) chhòng-li̍p-chiá Bú-sù (Boost) tāi-chiòng tng-sî hoê-sim ê sî, ū kuī tī hit tè toh-téng-nih kî-tó. Khoàⁿ-liáu ē hō͘ lâng seⁿ-chhut chi̍t khoán ê kám-tōng.
Kám-siā Thiⁿ Pē siúⁿ-sù chit-hō chhian-cháiⁿ it-gū ê hó ki-hoē. Hoē-tiûⁿ chin sī jîn-san jîn-hái, tuì sì-hng lâi,óng-lâi bô tn̄g, put-chí bí-lē, uí-tāi chòng-koan.
Choè-āu khah chhiàm-koân, chin sit-lé, chioh kuì-tiōng ê choá-bīn, chún goá siá chū-só͘ tī chia. In-uī kiám-chhái ū tông-liâu, pêng-iú, ài siúⁿ-sù phoe-sìn. Á-sī ài chit-būn koan-hē Sîn-ha̍k , Kàu-hoē ê sū, chiū ū piān-lī ê só͘-chāi.
S. H. Ryu
Auburn Theological Seminary
Auburn New york.
U.S.A.
