Sî-sū kap Jîn-seng

1933.12  585koàn P.1-3

Chú-pit

    Chit ê 12 goe̍h, sī kin-nî siāng lō͘-boé ê goe̍h. Koh 5 ê lé-pài-ji̍t, chiū tio̍h oāⁿ sin ê nî. Thâu-chit ê lé-pài-ji̍t (12:3), chiū-sī Sè-kài Sèng-chheh Kì liām-ji̍t; chhiáⁿ ē kì-tit te̍k-pia̍t hiàn-kim thang chò Sèng-chheh Kong-hoē ê huì-iōng. Tē 4 ê lé-pài-ji̍t (12:24), sī Chio̍k-hō Ki-tok Sèng-tàn ê cheh-kî. iā tē 5 le-pài-ji̍t (12:31), sī kin-nî choè-chiong ê ji̍t-chí; iā-sī sàng-kū ngiâ-sin pó-poè ê sî-kî.

   Tuì chiah ê sî-sū, ài lâi siūⁿ kuí-kù thang chò lán jîn-seng ê kà-sī.

• I. Sèng-chheh kap Jîn-seng

    Lâng bat chhiáⁿ sè-lài chhut-miâ ê sian-siⁿ, ài chhoē chi̍t kù chin kán-kait koh pau-hâm ê si-kù, thang piáu-bêng chong-kàu kap jîn-seng ê koan-hē. Hiah ê sian-siⁿ tuì kó͘-kim ta̍k khoán ê chheh khì chhoē, lóng bē thang tit-tio̍h. Kàu boé, sī tuì Sèng-keng tiong chhoē-chhut chi̍t ê chheng-liân-lâng Bí-ka só͘ kì--ê. Chiū-sī kóng, ‘'Sè-kan lâng ah ! Iâ-hô-hoa í-keng chí-sī lín sím-mi̍h sī hó.  I tuì só͘ iau-kiû--ê sī sím-mi̍h? Chí-ū ài lín kiâⁿ kong-gī, chûn lîn-bín, kap khiam-pi ê sim , iā kap lín ê Siōng-tè saⁿ-kap kiâⁿ ‘'(Bí-ka 6:8).

    Ū chi̍t uī hó-gia̍h ê sìn-tô͘, in-uī sū-gia̍p sit-pāi, ke-hoé choân-pō͘ phò-sán, pìⁿ-chò sàn-hiong lâng.  Tng tī sit-chì kàu beh chū-chīn ê sî, ū chi̍t chá-khí i teh tha̍k Sèng-keng ; hut-jiân toā gông-gia̍h, chin hoaⁿ-hí kàu lâu ba̍k-sái, tuì I ê hū-jîn-lâng kóng, ‘'Lán ê châi-sán m̄-sī lóng sit-lo̍h, oiáu ū chi̍t tiuⁿ chin kū ê tu-kǹg tī-teh.'' I ê hū-jîn-lâng lia̍h-chò ū kū ê tu-kǹg nge̍h tī Sèng-keng--ni̍h. Kî-si̍t m̄-sī. Chiū-sī I ū tha̍k-tio̍h H-pek-lâi 13 chiuⁿ 5 chat, ‘'Siōng-tè ū kóng, Goá koat-toàn bô pàng-sak lí, koat-toàn bô lī-khui-lí. ‘' Tuì án-ni sìn-gióng ho̍k-heng, oá-khò Siōng-tè, sim-koaⁿ siū an-uì, lâi keng-koè chit ê sè-kan.

    Sèng-keng si̍t-chāi sī jîn-seng ê chí-lâm-chiam. Bô-lūn tī sím-mi̍h kéng-gū, na8 tha̍k Sèng-keng, ē tit-tio̍h sîn ê khuì-la̍t, hó ê an-uì. Iâ-so͘ kóng, Goá sī Lō͘, sī Chin-lí, sī oa̍h-miā. Ē-bīn chiah ê Sèng-keng, chhiáⁿ ē kì-tit;─

• 1) Nā tú-tio̍h iu-būn ê sî, chhiáⁿ tha̍k Iok-hān 14 chiuⁿ.
• 2) Sim-koaⁿ bô moá-chiok ê sî, chhiáⁿ tha̍k Si-phian 23 phiⁿ.
• 3) Tú-tio̍h sit-chì ê sî, chhiáⁿ tha̍k Si-phian 17,46 phiⁿ.
• 4) Nā siⁿ-khí ài phoe-phêng lâng ê sim, chhiáⁿ tha̍k 1 Ko-lîm-to 13 chiuⁿ.
• 5) Tú-tio̍h kiaⁿ-hiâⁿ ê sî chhiáⁿ tha̍k Í-sài-a 41:10--13.
• 6) Tú-tio̍h hō͘ lâng khi-hū biáu-sī ê sî, chhiáⁿ tha̍k Si-phian 27 phiⁿ.
• 7) Nā ài o̍h kap lâng hô-hó ê hong-hoat, chhiáⁿ tha̍k Lô-má 12 chiuⁿ.
• 8) ài chiâⁿ-chò lí-sióng ê Ki-tok-tô͘, tio̍h tha̍k Má-thài 5, 6, 7 chiuⁿ.
• 9) Nā ài hō͘ lí ê sìn-gióng kian-kò͘, chhiáⁿ tha̍k Hi-pek-lâi 11, 12 chiuⁿ.
• 10) ài o̍h choè ko-kip ê kî-tó, chhiáⁿ tha̍k Má-khó 14:36 ; Í-hut-só͘ 1:15-23,3:14-21.
• II. Sèng-tàn kap Jîn-seng

    Lūn Ki-tok ê chhut-sì, khiok m̄-sī tú-tú tī 12 goe̍h 25 ji̍t. Khah chá, tī Au-chiu sai-pō͘ ê bîn-cho̍k, muí nî tī 12 goe̍h 25 hō, ū pī-pān chéng-chéng ê lāu-jia̍t, teh khèng-hō͘ in só͘ ho̍k-sāi ê Ji̍t-thâu-kong, Kàu āu-lâi Ki-tok-kàu thoân-ji̍p hia, sìn-tô͘ ná chē, siūⁿ ài tû-khì hit khoán ê pháiⁿ hong-sio̍k, chiū oāⁿ hit ji̍t lâi chò kì-lāim Ki-tok ê kàng-seng. Tuì án-ni thoân kàu ta̍k só͘-chāi, lóng teh siú hit ji̍t.

    Tàu-tí Ki-tok ê chhut-sì, ū sím-mi̍h kè-tat, thang hō͘ lán kì-liām?

• 1) In-uī I it-seng uī-tio̍h lâng chīn-la̍t tē-it chē.
• 2) In-uī I ēng tē-it ha̍p ê khiàm-khoeh, lâi siúⁿ-sù chèng jîn-luī.

Chóng kóng chi̍t kù, I ū ēng IN-tián kap Chin-lí (Hān 1:17), lâi siúⁿ-sù sè-kan.

I só͘ siúⁿ-sù ê In-tián sī sím-mi̍h?
1) Thê-koân hū-jîn-lâng ê tē-uī.

2) Táⁿ-phoà khoàⁿ-khin sè-kiáⁿ ê pháiⁿ su-siúⁿ.

3) Kam-goān chò loán-jio̍k, sàn-hiong, pēⁿ-lâng, pháiⁿ-lâng ê pêng-iú.

I só͘ siúⁿ-sù ê Chin-lí sī sím-mi̍h?

1) Siōng-tè chiū-sī jîn-luī chû-ài ê Thiⁿ pē.

2) Sè-kài ê jîn-luī, lóng sī hiaⁿ-tī chí-moē.

3) Tio̍h kam-goān ho̍k-sāi pa̍t lâng, lâi oân-sêng chū-kí ê jîn-keh.

    Jîn-luī lêng-khó bô chèng-tī, bô hoat-lu̍t, bô kàu-io̍k, bô sè-kan it chhè ; chóng-sī bē thang bô ū Ki-tok ê In-tián; kap Chin-lí . Só͘-í lán tī chiok-hō Sèng-tàn, éng-éng m̄-thang bē kì-tit--ê, chiū-sī tio̍h chiong Ki-tok ê IN-tián kap Chin-lí hoat-hui tī chit ê sè-kài. In-uī che sī kiàn-siat sè-kài pêng-hô ê tē-ki.

• III. Nî-boé kap Jîn-seng

    Kong-im chin kín, koh bô loā-kú tioh hoan-gêng Chiau hô 9 nî , ‘'Chîⁿ liáu ē thang koh thàn; kong-im sit-lo̍h, éng-oán bē thang koh tit-tio̍h.'' Koè-khì ê ji̍t-chí, lán ū phah-sńg chē-chē ki-hoē, iū-koh bô tiong-si̍t tī Chú só͘ kau-thok--ê. Che lán tio̍h ka-tī hoán-séng.

     Bó͘ sian-siⁿ kóng, ‘'Jîn-seng tē-it kiàn-siàu, tē-it sit-pāi--ê sī sím-mi̍h? Chiū-sī bē ē ǹg tē-it hó ê bo̍k-tek lâi kiâⁿ.''  Só͘-í lán chi̍t-bīn tio̍h séng-chhat, koh chi̍t-bīn tio̍h koat-sim chún-pī sin-nî chò lâng ê hong-chiam. Chì-chió chhiáⁿ koat-sim 3 hāng :,─

• 1) Koat-sim chò chū-iû ê Ki-tok-tô͘ (! Pi1-tek 2:11,12).
• 2) Koat-sim chò ji̍t-ji̍t oāⁿ-sin ê Ki-tok-tô͘ (2 Lîm 4:16, 5:17).
• 3) Koat-sim chò oân-choân ê Ki-tok-tô͘ (1Lîm 14:20, 16:13 ; Hut 4:13).

Si-ong Bû-ta̍t-lêng ê Si ū chi̍t phiⁿ kì kóng, Ū chi̍t ê hū-jîn-lâng, tuì kiat-hun liáu-āu, siⁿ-khí chē-chē hong-pho, kan-khó͘ kàu tòng-bē-tiâu, chiu siūⁿ beh tô-cháu. Chóng-sī tuì I ê bô koat-sim, m̄-káⁿ toàn-hêng, chiu iân-chhiân kî-ji̍t, sit-lo̍h ki-hoē. Kàu bé, siū koaiⁿ tī chi̍t keng koân-lâu : chheng-chhun ti̍t-ti̍t koè, bô loā-kú pìⁿ-chò pe̍h thâu-mn̂g ê lâng. Chí-ū tī-hia thó͘-khuì nā-tiāⁿ. Hit siú Si ê kiat-gú ū chi̍t kù : ‘'Che m̄-sī pa̍t lâng ê tāi-hì. ‘'

    Ki-tok-tô͘ ah ! Tio̍h koat-sim ! ‘' Khùn ê lâng tio̍h chhéⁿ, Tuì sí-lâng tiong khí-lâi, chiū Ki-tok ê kng beh chiò lí ‘' (Hut 5 :14).

    Ki-tok-tô͘ ah ! Tio̍h koat-sim ! Thiàⁿ lán ê Thiⁿ Pē beh tuì lí kóng, ‘'Goá ê kiáⁿ-jî ah ! lí tī chin-lí teh kiâⁿ, Goá ê hoaⁿ-hí bô khah toā chit-ê'' (Iok-hān 3 su 4 chat).