Kò͘ Tiuⁿ An-kuì Bo̍k-su ê Sió-toān
Khó͘ Khun kì
1934.02, no. 587, pp. 19-20
Bo̍k-su Tiuⁿ An-kuì, pia̍t miâ Tō-sam. Bêng-tī 7 nî 8 goe̍h 7 ji̍t chhut-sì tī Bān-bân Sì-kau-chuí. Lāu-pē Tân Khun-goân, liân seⁿ 5 ê hāu-siⁿ, An-kuì sī tē 5 kián. Goā-kong bô cha-po͘-sun, tī i tō͘-chè ê sî, lāu-pē hoaⁿ-hí chiong i sàng goā-kong. Hit-sî goā-kong toà tī Tek-chhân chng Jī-lun, muí Sèng-ji̍t khì Tō͘-kun-eng lé-pài. Hit-tia̍p Pa Bo̍k-su tì-ì ài siat kàu-hoē tī Jī-lūn, goā-kong hoaⁿ-hí chiong i ê chhù hiàn chò pài-tn̂g. Pa Bo̍k-su chiah khì siat kàu-hoē. Chng-bîn cin oàn-hīn tō-lí, m̄-chún siat kàu-hoē tī hia, tì-kàu khí toā kiáu-jiáu, taⁿ sái lâi phoah, Pa Bo̍k-su hiám sit-lo̍h sìⁿ-miā. In chi̍t ke siū chng-bîn toā oàn-hīn, chhù hō͘ in chiàm, ke-si mi̍h-kiāⁿ hō͘ in chhiúⁿ; soà kek-chhut chng, choân-ke ko͘-po͘-chiong cháu khì bih Tō͘-kun-eng lé-pài-tn̂g chiām toà.
uī-tio̍h in chek Kím-lông hiah jia̍t-sim tī kàu-hoē, chng-bîn tâng-sim beh lia̍h in chek lâi thâi, in chiū àm-chēⁿ tô-cháu pī-lān lâi Tâi-lâm Sin-lâu. Bô phah-sǹg kàu uī chiū jiám-tio̍h liû-hêng-peⁿ soà pia̍t-sè lâi chòng tī Tang-mg5 po͘, hit-sî 33 hoè. Tī 13 hoè ê sî, in-su Pa Bo̍k-su lâi sûn kàu-hoē, tit-tio̍h i ê thiàn-sioh, ū kap Kong-má táⁿ-ha̍p beh chhoā i khì Tâi-lâm tha̍k chheh. Hit-sî i tī khe-á khoàⁿ lâng lia̍h hî, in Má chiong i ê saⁿ-khò͘ kap ê, pau hó-sè, chiū khì khe-á chhoā i, lō͘-ni̍h kā i kóng kin-á-ji̍t Pa Bo̍k-su beh chhoā lí khì Tâi-lâm tha̍k chheh. A-má kā lí kóng tō-lí m̄-thang pàng-sak, tio̍h li̍p-chì toè lín chek Kím-lông ê kha-pō͘, chiong-lâi chiū ū chhut-thâu ê ji̍t. Kàu chhù kap Kong saⁿ-sî, Kong 77 hoè soe-jio̍k tī chhn̂g-tiong , khoàⁿ i beh khì, ba̍k-kho͘ âng, oē kóng bē chhut. Pa Bo̍k-su chiū chhoā in kî-tó lī-pia̍t lâi Tâi-lâm tha̍k chheh. Hit-sî 7 goe̍h hioh-joa̍h tò khì, Má khoàⁿ-tio̍h i khui sian khàu, in-uī Kong tú bâi-chòng 3 ji̍t, chêng-kéng chin ai-siong, kan-ta Má ka-tī chi̍t lâng teh toà, kàu khui-o̍h chiū koh lâi Tâi-lâm tha̍k chheh. Tha̍k 5 nî liáu, Pa Bo̍k-su siông lâi chhoē i, mn̄g mê-nî ê ì-kiàn án-choáⁿ? Ji̍p i-koán chò i-seng? Á-sī ji̍p Sîn-ha̍k chò thoân-tō? Chiàu goá siūⁿ chò thoân-tō tē-it hó. Chóng-sī tio̍h kî-tó, ǹg-bāng Siōng-tè chí-sī. āu-lâi koat-tēng chiū ji̍p Sîn-ha̍k, chò ha̍k-seng só͘ niá sui sī sió-khoá, chóng-sī tuì i khîn-khiām lia̍p-chek ū kià hō͘ Má ēng. Tha̍k kàu tē 4 nî, Ji̍t-pún lâi Tâi, tē-hng jiáu-loān, ha̍k-hāu thêng, ha̍k-seng tò-khì thèng-hāu thài-pêng, 8 goe̍h tiong Má pēⁿ, i chīn-la̍t chiàu-kò͘, ha̍p Chú ê ì-sù, tī 9 goe̍h chiū tiàu i lī-khui sè-kan. Hióng-siū 69 hoè.
I 33 hoè nî-boé chut-gia̍p, chiaⁿ-goe̍h toà Tek-á kha Kàu-hoē. Tuì in-su LâuChùn-sîn ê kài-siāu, nî-boé tī Lí-káng kap N̂g--sī Lāi-hó oân-hun. Keh-nî choán-jīm Lāi-po͘, tú-tio̍h thó͘-huí lâi cheng-piàng, i-chiûⁿ mi̍h-kiāⁿ chin chhiúⁿ. Koh choán-jīm khì Ka-la̍h-po͘ ê tē 5 nî, thó͘-huí jiáu-loān tē-hng, hāi chng-bîn, sit-lo̍h chhù-the̍h kap sèⁿ-miiā--ê chin chē, chóng-sī tuì i tit-tio̍h Hiàn-peng ê sìn-iōng, hoē-iú kap chng-bîn siū i tì-ìm--ê bē chió. Jiân-āu ū khì toà Má-keng, Toā-siā, Toā-tō͘, Soaⁿ-pà, Pín-tong, Chó-tìn ; kî-tiong hō͘ Chó-tìn, Soaⁿ-pà nn̄g Tông-hoē chhiáⁿ chò bo̍k-s8 12 nî kú. uī-tio̍h Chó-tìn pài-tn̂g siū pe̍h-hiā sún-hāi chin guî-hiám, hoē-iú khah chē sī sàn-hiong, chóng-sī tuì i chīn-la̍t kó͘-bú, hoē-iú chiū tâng-sim chhut-la̍t, tit-tio̍h Chú pang-chān, pài-tn̂g sin-tio̍k chiū oân-chiâⁿ. Tī i 56 hoè ê sî, chiū sî-chit lâi Pîn-tong khiā-khí, toà pài-tn̂g chò-kang kiōng 33 nî kú.
Sui-jiân bô chāi-chit, iáu-kú i thoân-kàu ê kang bô soah, siông khì Kheh-chng pò͘-tō, koh siū Lú Soan-tō-hoē thok i khì Bān-bân pang-chān lú thoân-tō N̂g Chuí-moái chò-kang. Tī 8 goe̍h 23 hō khí pēⁿ, sui-jiân keng-koè chin chē i-seng chīn-la̍t i-tī, bû-nāi Chú ê ì-sù í-keng chiâⁿ, ài i soah sè-kan ê tio̍h-boâ, tī 9 goe̍h 17 hō téng-po͘ 4 tiám an-jiân siū tiàu ji̍p Chú lêng-kiong, hióng-siū 60 hoè. Choè thang an-uì i ê uî-cho̍k, chiū-sī pēⁿ tiong ka-tī tì-ì kî-tó, iā ài lâng thè i kî-tó, siông gîm-si ài thiaⁿ tō-lí, koh tì-ì ka-têng lé-pài. Koh tī lîm-chiong ê sî ū kóng, Goá chin hoaⁿ-hí m̄-bián koh toà sè-kan siū-khó͘, goá chiong lín kau-tài Iâ-hô-hoa, goān Iâ-hô-hoa chiok-hok lín. Tiām-tiām ū hiah kú ka-tī kóng, "Chin hó thiaⁿ, chin hó thiaⁿ." Choè-āu koh kóng, "Goá beh lâi khì lah, beh ho̍k-sāi Iâ-hô-hoa." Tī 18 hō ē-po͘ 3 tiám tī ka-tī ê ke chò kò-pia̍t-sek, hoē-chòng-chiá 400 goā lâng. I ê uî-cho̍k ū lāu bo̍k-su niû, 4 ê hāu seⁿ, 5 ê cha-bó͘ kiáⁿ, 3 ê chhoā liáu, iā 3 ê chhut-kè, lāi-goā sun 15-ê. Toā kiáⁿ Sûn-in toè i ê kha-pō͘ chò bo̍k-su, jī-kiáⁿ Sûn-bín Khí-kho i-ha̍k-sū, saⁿ-kiáⁿ Sûn-chiong chō͘-lí ka-têng ê sū-bū, sì-kiáⁿ Sûn-éng chāi hāu tiong; iā toā kiáⁿ-sài Khó͘ Khun Bo̍k-su, jī kiáⁿ-sài N̂g Ta̍t-tek Hùn-tō, saⁿ kiáⁿ-sài Chiā Ki-choân Hùn-tō.
Lūn i chò-lâng sī khîn-khiām phok-sò͘, tiong-hō͘, láu-si̍t, koj un-jiû hô-pêng. Chò kang chīn-la̍t koh ióng-kám phoe-miā, soat-kàu ū tit-tio̍h Chú pang-chān gâu kám-kek lâng. Kuí-nā ê Soan-kàu-su bat o-ló i gâu kóng tō-lí, soà hō i chò tē-jī ê Kím-chhuì bo̍k-su. Koh ū hoē-iú kóng, nā Tiuⁿ Bo̍k-su teh kóng tō-lí, sui sī tio̍h khì piān-só͘, iā thun-lún ài thiaⁿ kàu soah. Taⁿ i ê kang bêng-pe̍k lah, thang kóng i chin ho̍k-khì. Goá kán-lio̍k siá i chiah ê lí-le̍k hō͘ tāi-ke chai, lâi saⁿ siàu-liām. Goān Chú an-uì chiok-hok i ê uî-cho̍k. A-bēng.
