Goá bat khoaⁿ-khoaⁿ thèng-hāu Siōng-tè
(Sèng-si 12)
(Bêng Iú-tek)
1934. 3, no. 588, pp. 24-25
Chiàu chit phiⁿ ê chok-chiá ka-kī kóng, i bat chi̍t pái thèng-hāu Siōng-tè. Lūn i hit pái só͘ tú-tio̍h, m̄-sī sim-sek, hó thit-thô ê sū. I só͘ tú-tio̍h, sim-koaⁿ hui-siông kan-khó͘. Hit pái ê keng-kè, chiū-sī i seng-gâi-tiong tē-it toā ê sū.
Lūn hit ê keng-kè, i bô sím-mi̍h kóng. I kan-ta siat chi̍t ê phì-jū kóng, I ū poa̍h-lo̍h tī chin thang kiaⁿ ê hām-khiⁿ. Chiàu khoàⁿ, i ti̍t-ti̍t oá-khò ka-kī kap lâng ê sè-le̍k, tì-kàu chin kî-koài. I ná oá-khò lâng, kám-chêng ná khah-bô tú-hó. Kàu lō͘-bé, sim-sîn tú-tio̍h toā ê chhiⁿ-chhám.
Bô sím-mi̍h kóng-khí i ê keng-kè, i só͘ ài kóng--ê, chiū-sī i cháiⁿ-iūⁿ thoat-lī thô͘-bê siū khan khí--lâi. Hit ê sū, chiū-sī lâng tē-it bô phah-sǹg--ê, tuì án-ni, choē-choē lâng khoàⁿ-kìⁿ lâi kiaⁿ-uì. Tuì án-ni i pún-sin tē-it tāi-seng kî-koài. M̄-nā án-ni, i í-chêng só͘ sìn lóng oāⁿ liáu-liáu.
Tuì hit pái só͘ keng-kè, ka-kī kóng i ê kha khiā tī sin kap kian-kò͘ ê só͘-chāi, i ê chhuì bô koh-chài chhiùⁿ í-chêng só͘ siông chhiùⁿ ê koa. Í-chêng só͘ chhiùⁿ hit khoán, bat Siōng-tè ê lâng bô ài chhiùⁿ, ia̍h bô ài thiaⁿ. (I í-chêng mā chai án-ni).
Tuì hit pái só͘ tú-tio̍h, i bô chhin-chhiūⁿ í-chêng put-sî khoà-lū hoat-lu̍t ê pé-pa̍k, taⁿ ū oa̍h-oa̍h sin ê kui-kú tī i ê sim-lāi. I bô chhin-chhiūⁿ í-chêng, siông-siông m̄-goān siū kà-sī. Tuì hit-tia̍p í-āu, I bô lūn tú-tio̍h sím-mi̍h kéng-gū, siông-siông khah kam-goān siū khó͘-khǹg.
Chok-chiá tú-tio̍h chit khoán chiah-ni̍h kî-koài ê sū, beh cháiⁿ-iūⁿ soat-bêng? I ka-kī hó-táⁿ kóng, tī i iáu-bē keng-kè hit khoán ê sū, si̍t-chāi m̄-bat Siōng-tè. I sui-jiân ài hō͘ lâng phah-sǹg i ta̍k-hāng bat, m̄-kú si̍t-chāi kan-ta phiàn lâng nā-tiāⁿ. I sui-jiân chhin-chhiūⁿ jia̍t-sim tī ta̍k hāng ê lé-sò͘, m̄-kú sī kan-ta goā-phê nā-tiāⁿ. Tī i ê sim-lāi lóng bô án-ni.
Tuì hit pái ê bat Siōng-tè, i pìⁿ-choè sin khoán ê lâng, chiū-sī pìⁿ-choè oá-khò Siōng-tè ê lâng.
I só͘ tit-tio̍h--ê, sī i ê hó siau-sit. M̄-nā i ê. Choē-choē lâng iû-goân ài thiaⁿ chit khoán. Hit ê siau-sit i ū sì-koè pò-iông. ia̍h ū siá tī chheh-ni̍h lâi thoân-pò hō͘ ta̍k sè-tāi ê lâng, kàu tī kin-á-ji̍t. Chit siú, chiū-sī tuì Si-phian 40 phiⁿ 1 chat kàu 11 chat the̍h-lâi--ê.
