首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 真正奇妙
真正奇妙
卷期：第590卷 本次： 日期：1934/5 刊名：台灣教會公報 頁數：10-13
篇名：真正奇妙 [ Chin-chiàⁿ Kî-biāu ]
作者：
  顯示 : 漢羅 全羅 並列  

真正奇妙！

1934.5，no.590，pp.10-13

 

  [戴仁壽博士久久有teh計畫欲起一間癩病病院。今已經起好，佇3月30號下晡3點，有舉行落成式。表名叫做樂山園(Happy mo͘nt Leprosy colony)。彼日，有請巴克禮博士說教。這霎將彼篇說教in佇遮]。

  閣下，以及列位的在座，咱下晡聚集佇遮，是欲赴這个樂山園的落成式，也欲共戴醫生佮伊的同伴恭喜，因為in今仔日通看見in濟濟的著磨的成績。咱今仔日看見這呢媠的厝宅，大家穩當受大大的感激。我前日來看見，就佇醫生的簿記我的名，紲記一句，講，「真正奇妙，出佇人所拍算的以外。」

我卻毋是醫生，無逐項攏會曉得；總是照我所拍算，起這號的樂山園，有兩項的意思。

  一項是欲講究這个癩病，看有甚物好法度，甚物好藥，通醫好這个症頭，予伊攏無--去。佇天下濟濟所在有gâu的醫生出力teh講究；咱台灣也著有份佇這號的工，因為佇咱中間有濟濟這號的邊。咱平常的人毋知有進步到佗位，毋知醫生teh希望通無偌久一盡滅伊。總是穩當teh進步。照我拍算，別日會達著這个目的。因為這世間是上帝的世間，也伊穩當無歡喜看見這个毛病

閣一項通穩當得著利益，就是通安慰艱苦的人的心；佇遮有厝通蹛，真看活，有藥通食，有田園通作穡，有拜堂通聽道理，有朋友通交陪，予in的心通較開，毋免干單坐--teh，teh煩惱。因為大家知這个是真艱苦的病。我會記得有一擺佇台南，我佮先生娘有去揣一个查某囡仔。伊干單倒佇眠床，蠓罩放--落來，毋准人掀--起來看，有共阮講，伊是拜上帝的人；若毋是按呢伊久久已經有自盡死。今有設這个樂山園，人毋免絕望親像按呢。減采猶未通共人講咱會打揲伊的病。猶久通共伊講咱會減少伊的艱苦，予伊嶄然較輕。

  所以這號的工是真合佇上帝的旨意，是趁咱聖教的道理，趁咱的主的命令，著疼別人親像家己。醫生克己著磨，講究逐項的法度，愛滅這號的病痛，予後世代的人毋免拄著伊，毋免掛慮，卻毋是佈道，猶久是利益人，來歸榮光予上帝。是除去世間一號的毛病，通閣歸倒轉做較親像上帝原本創造伊的款式。因為咱的聖教無嫌這世間是歹所在，照咱講伊是上帝好的工所造成的物。咱毋是親像希利尼的哲學家；in嫌這个物質界是毋好，是阻擋神靈界的發達。也毋是親像釋教的回想，抑是食菜的人，teh嫌伊是苦海，是塵世，著脫離伊那緊那好。照咱講，這世間本是上帝所創造；到萬項物創造了，伊來看，看了就講逐項真好。照咱人這霎所看見，減采看伊無的確是按呢；ná-chún親像in遐的人所講嶄然有理氣。阮對內地所得著的報紙，差不多逐日teh報講有人自盡，或是跳落海，抑是跳落火山來死。In自盡敢是因為in看這世間是艱苦的所在，毋免活，緊死是較好。我kiàn讀，攏teh煩惱，人毋通按呢。因為其實這號思想是毋著。對反通講，佇這世間的物是備辦拄拄好勢，做咱人的路用。我有讀一本冊，是真gâu的科學家所著--的。伊有查考這世間萬物，查考了就做干證，in一項一項攏備辦拄好做咱人的路用，佇宇宙內減采無一所在親像咱這地球赫齊備，便便通予百姓徛起。我讀了不止受感激，本然無拍算有影按呢。卻咱眾人有這號的經驗，不過是無致意若定。前日我坐佇我的房間，真看活；外面真懸，內面攏無；是因為佇火爐有土炭teh著。我就想，我thái-thó有這號土炭通用；想了就知，是因為慢慢年的代先，上帝用爛柴變做土炭，一層一層下--teh，聽候人去掘去用。毋若按呢，通閣想，現金人所發明赫濟新款的器具做咱會路用，攏是倚靠上帝在早所備辦的材料；若無按呢，人了心思來講究攏歸佇空空。親像人設電報，抑是自動車，抑是飛行機，抑是活動的寫真，咱呵咾in的gâu，會曉得發行彼號的事。總是若毋是上帝早早備辦in所欲用的材料，就in的gâu歸佇無。佳哉毋免驚按呢；無論in欲用甚物料，彼个物已經有。是因為按呢，我信佇這世間有拄好的藥通醫治這个真厲害的症頭。人卻猶未有揣著彼个藥。毋久我拍算果然有彼个物佇teh，teh聽候人去揣。我捌聽見醫生講有一款油有真大路用；卻是無夠額通伊到完全好，猶久有真大的路用利益人。毋久這號油一百年前無人捌。物卻是佇teh，精差是人猶未去提。猶原按呢，敢無通向望有猶閣較好的藥佇teh，有齊備的功效，teh聽候人去查考。這是表明這个樂山園一款的路用，天下萬國有gâu的醫生teh犧牲in的性命，愛救才的艱苦的人。

  咱也毋免行天下，愛知這號意思；若使看咱台灣就通知。五六十年，咱這个海嶼有濟濟項的破病。我本身會記得有鳥鼠症，有霍亂病，有出珠彼號，也有寒熱病，這號真盛，我家己有寒熱，無làng uî，差不多無làng月。今這久彼號的病佇佗位？差不多攏無，細漢的囡仔有的káⁿ毋捌遐的名。怎樣會按呢？就是人講究彼个衛生法，照所講究，就設好的法度teh持防，用好的藥來醫治，致到台灣算是好徛起的所在。毋久50年前，才的逐項的藥已經有，遐的衛生的理氣也佇teh。不過彼霎猶未有人去講究來知；若較早講究來設法，就毋免人拄著赫呢坐艱苦。毋知著偌久，就這號癩病猶原會無--去。咱毋通嫌這个世間是艱苦的所在，著嫌咱本身，因為咱teh計畫別物，無teh要緊這的救命憐憫人的法度。

  恁想看覓，對原早，對亞述國，巴比倫國，到今，人有了偌濟工，偌濟錢，偌濟人的性命，攏是欲拍別國予伊降服，攏是害人，毋是欲利益人；到路尾無所得著，攏是拍損。十外年前，阮彼爿的大國交戰五年久。彼時也是按呢；千萬人死，著傷的算袂了，差不多無一口灶無teh憂悶，貨物毀壞到袂算--得；也到路尾是無路用，逐國攏有大大刻虧。今通想，設使有用赫濟的心思，赫坐錢，赫濟人的性命，有計畫欲相幫贊，相疼，來講究救命的法，無講究害命的法度，到這陣世間有偌大的進步，人加添偌濟項的福氣，醫法有想出偌濟項救人免得彼號的病；減采這个樂山園的目的已經達著。所以我講著嫌本身貧憚，趁私慾，無thàn相疼的法，致到赫濟項的艱苦猶佇teh，無予咱攏除去。今咱著趁較好的法，鼓舞這號樂山園的事業，向望無偌久有大功效。

  做按呢是趁咱的主的模樣，行伊的腳步，體貼伊的心。照咱算，今仔日是三月30日；照舊曆是二月16日；照猶太人算是正月16日，拄好是in的盤過節，是咱的受難節，因為佇今仔日咱的主是佇十字架來贖咱的罪。用今仔日做咱的落成式是真合時。因為咱的主落來世間，出世做人，毋是欲敗壞世間，就是欲敗壞魔鬼所做的，照I翰 3：8節所記載。上帝所造的是攏好，魔鬼所造的攏是歹。魔鬼所造的若定，敢毋是欲真好？今咱的主踮佇地面上的時，伊常常拄著thái-ko的人。敢毋是佮咱台灣所有的thái-ko相同；總是翻譯是相同的字。照猶太人的例，thái-ko的人是無清氣，毋通佮別人相交陪。毋若按呢，連摸著的人也算做無細膩；伊好膽伸手hoāⁿ in，顯明伊無予in所bak著，反轉是in予伊按手了就變做清氣；歹是予好較贏。咱的先生也是按呢，是體貼耶穌的心，學伊的模樣；是靠伊的力，望伊的神的引chhoā，好膽進前，起這間的厝，欲佮這个病症交戰到較贏。咱今仔日相佮聚集佇遮，顯明相體貼的意思是好；總是毋通干單佇今仔日若定，著常常數念替伊祈禱，照咱的力量幫贊伊的所費；向望年年有好消息通歡喜，大大利益本島的艱苦人，大大歸榮光予咱的上帝；是心所願。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461