那久那知
(偕叡廉)
1934.5，no.590，pp.27
舊約聖經內有記載濟濟古早的代誌，不止有大干涉佇古早的歷史。聖經是上帝所啟示--的，所以所記載--的是實在。可惜世間人的心肝常常愛囥僥疑，致到對家己的毋捌，隨便愛批評。
親像舊約聖經內有講起在早亞述國，有出一个皇帝名叫Sat-kun。伊的皇太子名叫Se-ná-ki-li̍p。無愛信聖經的人講，無影有皇帝名叫Sat-kun，因為聖經以外毋捌聽著伊的名。古早的歷史也無講起伊的代誌。這是聖經寫毋著。
總是後來有揣著Sat-kun王所起，真媠，真堅固的王宮發見著--的。佇遐有揣著一塊磚仔，比人的手底加大無偌濟。佇磚仔的頂面有寫95的皇帝的名，佮in所坐位的年號，中間也有Sat-kun王佮伊的皇太仔，Se-ná-ki-li̍p的名佇teh。頭一的皇帝坐位，就是4300年前。本然人拍算亞述國的歷史無赫早，今知亞述的歷史佮中國差不多平早。
已經講，頂面彼塊磚是佇Sat-kun王的王宮揣著，離尼尼微城約略5鋪路。雖然這塊磚仔是細細，若是對歷史上來共伊看，是真要緊，因為所寫的字有證明古早實在有一個Sat-kun王。聖經所記載的是著。 |
