Tiong-kok Chiàn-sū(2)
1900.09 186 konà p.71-72
Chêng goe̍h Kàu-hoē-pò lō͘-boé só͘ ìn ê siau-si̍t chiū-sī kóng, Se-le̍k 6 goe̍h 25 hō Eng-kok lâng kià phoe kóng, Gī-hô-thoân-huí uî-khùn Pak-kiaⁿ, tì-kàu goā-kok lâng bē-tit chhut Kiaⁿ-siâⁿ, chiū chám-jiân guî-hiám. āu-lâi tī 6 goe̍h 29 hō Ji̍t-pún ê Khim-chhe siá phoe hō͘ toà Thian-tin ê Ji̍t-pún Léng-sū-koaⁿ kóng, In ta̍k ji̍t ná-kú ná-siong-tiōng. Tuì hit-tia̍p khí só͘ chih-tio̍h Pak-kiaⁿ ê siau-sit ū-ê sī Chheng-kok koaⁿ pò-ê lâng táⁿ-sǹg káⁿ bē sìn-tit, chóng-sī tāi-lio̍k chiàu chhù-sū kì tī ē-té:--
Chhit goe̍h tē saⁿ hō. Kong-sū-kun phah tiān-pò hō͘ Ji̍t-pún ê toā-koaⁿ, iū-koh chhiáⁿ Ji̍t-pún Hông-tè chhut-thâu khǹg goā-kok m̄ thang phah hāi Tiong-kok. Ji̍t-pún Hông-tē hoê kóng, Hāi-sí sio̍k Kong-sài-koán ê koaⁿ sī chin tāng-choē, sī hoān-tio̍h bān-kok kong-hoat. iū-koh kóng Tiong-kok nā kó-jiân ài soah-sū chiū tio̍h suî-sî chhut-thâu bia̍t Gī-hô-thoân-huí, tio̍h liâm-piⁿ chún-kok-kok ê Khim-chhe kià siau-sit hō͘ in ê pún-kok.
Cha̍p-peh hō. Lí Hông-chiong khì pak-thâu chò Ti̍t-lē ê Khim-chhe, só͘-í Hông-tè phài Lâu Khun-it, téng i ê khoeh, khì chò Lióng-kńg ê Khim-chhe. Lí Hông-chiong boē lo̍h-chûn khì pak-thâu, hit-sî ū hoan-hù Lāu Eńg-hok (chiū-sī chêng toà Tâi-oân hit-ê) tio̍h chhoā 1,0000 peng chiūⁿ Pak-kiaⁿ phah-soàⁿ hiah ê Gī-hô-thoân-huí.
Jī-saⁿ hō. Kin-á-ji̍t chih-tio̍h tiān-pò kóng tī Ô͘-lâm thó͘-huí ū thâi-sí kuí-nā uī sio̍k Thian-chú-kàu ê Kàu-sū, í-ki̍p chin-chē sio̍k Thian-chú kàu ê pún-tē lâng.
Jī-gō͘ hō. Tī Soaⁿ-sai thó͘-huí ū thâi-sí n̄g uī sio̍k Iâ-so͘-kàu ê Ko͘-niû.
Jī-la̍k hō. Kin-á-ji̍t tī Thian-tin Eng-kok koaⁿ chih-tio̍h Eng-kok Khim-chhe tē 6 hō siá ê phoe kóng, Thó͘-huí iû-goân uî-khùn teh phah Kong-sài-koán, chóng-sī chiàu i phah-sǹg in ē-kham-tit koh tòng n̄g lé-pài kú. Kàu tē 6 hō tī Kong-sài-koán-lāi in ū sit-lo̍h 40 lâng, iā lēng-goā ū 80 ê tio̍h siong.
Jī-káu hō. Chāi chit ji̍t chèng goā-kok kàu-sū kap chò seng-lí--ê lóng lī-khuī Giû-chong. Tī hit-tah sio̍k Tiúⁿ-ló-kàu ê chhù-the̍h lóng-kiōng ta̍t chha-put-to $ 40,0000 í-ki̍p Thian-chú-kàu--ê lóng sio-lio-khì. Tiúⁿ-ló-kàu ê sian-seⁿ bô sit-lo̍h sèⁿ-miā, chóng-sī sio̍k Thian-chú-kàu kuí-nā ê sian-seⁿ kap ji̍p in ê kàu oá 200 ê pún-tē lâng, lóng hō͘ thó͘-huí hāi-sí. Hit-sî Chheng-kok Khim-chhe ū 10,0000 peng tī-hia chóng-sī lóng m̄ chhut-thâu chè-ap thó͘-huí.
Peh goe̍h tē it hō. Chāi chit ji̍t goán chih-tio̍h Siōng-hai Eng-kok Léng-sū-koaⁿ ê tiān-pò kóng, Kàu 7 goe̍h 21 hō toà Pak-kiaⁿ ê goā-kok hū-jîn-lâng kap gin-á lóng pêng-an.
Tē jī hō. Hông-tè chhut chiàu kóng, In tek-khak beh pó-hō͘ toà Pak-kiaⁿ ê chèng goā-kok-lâng; chóng-sī lūn hiah ê thàn goā-kok tō-lí ê pún-tē lâng tio̍h kā in biat-bô, in-uī pí-thó͘-huí in sī koh khah lī-hāi; iū-koh lūn Gī-hô-thoân-huí nā hoán-hoé chiū beh sià-iū in ê choē.
Tē saⁿ hō. Chāi kin-á-ji̍t 2,0000 Ji̍t-pún peng, 1,0000 Eng-kok peng, kap 5000 Bí-kok peng lóng tuì Thian-tin khí-sin beh phah thó͘-huí, soà beh khì kiù Pak-kiaⁿ ê goā-kok-lâng.
Tē sì hō. Goā-kok phah thó͘-huí kàu n̄g saⁿ phò͘ lō͘. Iû-goân tī chit ji̍t thó͘-huí kong Giû-chong ê Ngô͘-kok kun-iâⁿ, m̄-kú kong bē khui.
Tē 5--15 hō. Chāi chit 10 ji̍t ê tiong kan goā-kok peng ti̍t-ti̍t chìn-chèng chiūⁿ-khì Pe̍h-hô, siông-siông kap thó͘-huí sio-thâi, lióng-pêng sit-lo̍h peng chin-chē; chóng-sī kàu tē 15 hō (chiū-sī kū-le̍k 7 goe̍h 21 ji̍t) goā-kok peng kàu Pak-kiaⁿ. Kiaⁿ-siâⁿ phoà, goā-kok peng ji̍p-khì kiù-tio̍h tiàm Kong-sài-koán ê goā-kok-lâng.
Hông-thài-hō͘ chhoā Kong-sū-kun tô-cháu khì Siám-sai-séng ê Se-an-hú. āu-lâi Toan-chhin-ông chhoā Gī-hô-thoân-huí toè Hông-thài-hō͘ cháu.
