M̄-thang saⁿ pâi-thek
Chóng-sī tio̍h khioh lâi chò kàm-kài
(Loā Jîn-seng)
1934. 6, no. 591, pp. 6-7
Chá Chú ê ha̍k-seng tuì Chú kóng, "Sian-siⁿ, goán bat khoàⁿ-kìⁿ chi̍t lâng ēng lí ê miâ koáⁿ kuí; goán chiū kìm-chí i, in-uī i bô toè lán". Iâ-so͘ kóng, Bo̍h-tit kìm i, in-uīu bô ū lâng hōng goá ê miâ kiâⁿ koân-lêng, iā oē liâm-piⁿ huí-pòng goá, kìⁿ-nā bô kong-kek lán-ê chiū-sī uī lán". (Khó 9: 28-39). Chhin-chhiūⁿ chit khoán tuì pa̍t ê kûn, bô tek-khak tio̍h siāng kûn, nā ū hōng Chú ê miâ lâi chò-kang chiū hó, tāi-ke tio̍h sio khoan-iông; chit hō khoan-iông tāi-liōng ê oē, Chú siông-siông kóng-chhut. Si̍t-chāi hō͘ lán chin thang o̍h.
Koh chāi-lâi put-châi tuì chit hō kám-chêng-tek kàu-phài ê sio kong-kek ê ì-sù iā-sī bô. Hoán-tńg sī chhú ū jia̍t-sêng ū thang o̍h-ê, goá chiū ài chìn-chêng khì tui-chhoē. Só͘-í chiah ē hiah kheng-sìn Tiong-tiân--sī ê oē, koè-khì Sèng-kiat Kàu-hoē. Goá kì-tit goá tong-sî tuì Lâm-chú beh lī-jīm, chho͘-hoê boeh khì Loē-tē, tī hit nî ê Tiong-hoē tú-sī chū-chi̍p tī Tâi-tiong. Gī-tiúⁿ kap choân Tiong-hoē-oân, piáu kèng-ì khiā khí-lâi bán-liû. Chóng-sī hit-sî goá ê sim-chêng chin jia̍t ài khì, chiū hut-lio̍k choân Tiong-hoē (Hiān-sî ê Tāi-hoē) ê hó-ì chò goá khì. Kàu chit-tia̍p hoê-kò͘ lâi siuⁿ, si̍t-chāi tuì chèng sian-poè, kap thong kàu-hoē ê tāi-piáu, chin si̍t-lé.
Taⁿ goá kó͘-jiân ū koè-khì. iā kó-jiân chin mō͘-hiám. Goá kì-tit goá beh koè-khì, tit-tio̍h Tiōng-gī Tiúⁿ-ló, Chài-chiok, Chài-tek, Chài-hok kap kî-û kuí-nā uī sian-siⁿ ê hó-ì, ū lâng sàng kàu chhia-thâu, ū-ê sàng só͘-huì. In tāi-ke ê ì-sù sī chin thiàⁿ Chú, chhiau-oa̍t-koè kàu-phài ê kám-chêng, ti̍t-ti̍t ǹg-bāng goá khoàⁿ ē sêng-kong tò-lâi lī-ek lán Tâi-oân á-bē. Só͘-í goá iā chin chòng-chì, ū chhoā hū-jîn-lâng kap chi̍t è sè-kiáⁿ 4 hoè koè-khì, thâu boé khì nn̄g pái. àn-choáⁿ kóng mō͘-hiám?
Khì, siū bān-poaⁿ ê kheng-sī, bô lia̍h chò goá sī tī lán chia chò Bo̍k-su, khì koh chò hak-seng, sàu-tè, sé piān-só͘, piàⁿ thâm-koàn, kā lâng chhit ê, chá-chá khí-lâi, pò͘-tō kàu àm-àm, thoàn-liān, siu-ióng. iā bat kap hū-jîn-lâng kap sè-kiáⁿ chhut-khì soè-chhù toà, keng-chè khùn-lân. Bat kuí-nā-pái bô bí, bô chîⁿ thang bé chhài, phoà-pīⁿ ti̍t-ti̍t kî-tó, bô só͘-huì thang chiū-i, choan-sim it-liām ài siu-ióng chò khah ū lō͘-ēng ê khì-khū. Choè-āu e̍k Kok-gú ê Seng-koa chò hàn-bûn, tì-kàu uī-thiàⁿ, tī-chhng toā siong-tiōng, tó chhn̂g kú-kú, si̍t-chāi toā mō͘-hiám, goá ê hū-jîn-lâng kap sè-kiáⁿ, lóng toè goá toā siū-khó͘.
Hū-jîn-lâng ēng beh chu-sat lâi chó͘-chí goá ê khì Sèng-kiat-hoē, goá hit-sî chí-ū ēng tiōng-hu ê koân ap i. Ah! Si̍t-chāi tuì liông-sim kóng, ū chīn só͘ ē ài chō͘ Sèng-kiat hoē hō͘ i tī Tâi-oân sêng-kong. Bô phah-sǹg bē hû-tit. Só͘-í goá chiah koh koat-jiân lī-khui tò-lâi Bó-hoē.
Tâi-oân chhú-khì ê kàu-hoē ē ná hok-cha̍p, che sī chêng ū sian-kiàn ê sian-poè í-keng kóng. Chóng-sī chāi-lâi ê Thian-chú-kàu lán lóng bêng chai in sī choa̍t-tuì bē-tit kap lán ha̍p-chok:
Tuì (1) Kìm lâng tha̍k Sèng-keng. (2) In ê ngó͘-siōng-hoà. (3) Kap chē-chē hāng bô ha̍h Sèng-keng lé-tián. Chì-chió chit 3 hāng lán to chai kap Thian-chú-kàu bē hô.
Chin Iâ-so͘-kàu ji̍p Tâi-oân, chi̍t-sî lán ê kàu-hoē chi̍t-pō͘-hūn ê lâng, iā-sī chin iô-choah. Chóng-sī kàu chit sî, lán iā chai in choa̍t-tuì bē-tit kap lán ha̍p-chok. Goá iā chē-chió ū kā i gián-kiù, só͘-í siá tī chia hō͘ khah boē chai ê lâng chham-khó. Chì-chió chit kuí-nā tiám, lán choa̍t-tuì bē-tit kap in ha̍p-chok:-
(1) Siū Sèng-lêng tit-tio̍h chín-tōng. Lán chai chin ê chong-kàu ê lêng-kám sī chāi tī liông-sim, hit ê piáu-hiān sī chāi tī phín-tek, khiok m̄-sī kóng choa̍t-tuì bô chín-tōng, kap hong-giân, chóng-sī hit hō sī lē-goā, m̄-sī chò it-tēng siū Sîn heng-sek. Nā lia̍h chò it-tēng ê hêng-sek, chiū-sī í-keng ji̍p-bê. Put-kak ê tiong-kan pìⁿ-chò bû-hêng ê hêng-sek ê ngó͘-siōng-hoà, bê tī ngó͘-siōng, m̄-sī tú-tú chí pài-pu̍t, chiū khu-chi̍p tī chi̍t-hāng bô ha̍p-lí ê hêng-sek. iā hit ê lâng ê sim ê chip-bê, kap kèng chi̍t ê ngó͘-siōng, chha bô hn̄g. Chá ū chhut-miâ ê Sîn-ha̍k ka kóng, Lâng nā lia̍h hit hō bô chū-jiân ê sim-lí tek, chhiong-tōng lâi chò siū Sîn ê kì-hō, chiū hit ê sìn-gióng thang kóng sī pēⁿ-tek sìn-gióng (病的信仰). Kàu chit-tia̍p khah chē lâng chai hit ê chín-tōng sī chi̍t-khoán ê cheng-sîn-tek, kap seng-lí-tek ê ha̍p-pèng chok-iōng. Chit-khoán liû-gī ê chong-phài, m̄-nā chin Iâ-so͘-hoē, chiū Loē-tē ê Hong-giân-hoē kap goā-kok iā ū, khoài-heng, iā khoài-thè. (2) Che sī goā-bīn lán só͘ khoài khoàⁿ-chhut ê tiám, lāi-iông chhin-chhiūⁿ kàu-lí ê kuí-nā tiám, che sī pêng sìn-tô͘ khah oh khoàⁿ-chhut ê tiám. Goá chhì kóng tī chia, (choá-bīn ê to͘-ha̍p bē-tit kóng 10 hun siông-sè, chóng-sī kán-lio̍k chi̍t hāng kóng kuí kù).
Goá bat chi̍t pái kap in tī Tâi-oân choè tiā-piáu-tek ū koân-ui, kàu-lí chheng-chò siāng bêng, ē kham-tit tù-chheh lâi chí-tō in ê kàu-hoē ê tiúⁿ-ló, chiong i só͘ kóng ê kín-kín kā i kì, kuí-nā-hoê mn̄g i khoàⁿ án-ni sī tio̍h, chiū tuì lán chèng-thóng sìn-gióng (Eng Sù-tô͘ Sìn-keng chò kui-chun) ê lâng, kā i khoàⁿ, chiū-sī toā-chhò.
(Boē-oân).
