M̄-thang saⁿ pâi-thek
Chóng-sī tio̍h khioh lâi chò kàm-kài
(Chiap 6 goe̍h tē 7 bīn)
(Loā Jîn-seng)
1934. 7, no. 592, pp. 4-5
Goá chhì kí kuí-nā hāng tī-chia:-
(1) Lūn Sé-lé. I kóng kìⁿ-nā lâng chì-goān ài niá sé-lé, put-koán i ê phín-tek kap sìn ê thêng-tō͘ hiān-sî chiáⁿ-iūⁿ, lóng thangc chek-sî kā i kiâⁿ sé-lé. Soà ín kuí kù Sèng-keng chin thong, kóng, Lán sī beh kā i kiâⁿ hoán-hoé ê sé-lé, á-sī kóng sim sìn, chhuì jīn chiū tit-tio̍h kiù, só͘-í chhuì ū jīn chiū hó. I soà kā goá kóng, nā ū lâng tī chhài-tiàm, chhiú ū chiú-poe, chhàu-chiú-bī boē thè, nā kóng hi-bōng ài niá sé-lé, iā thang kiâⁿ hō͘ i . Koh kóng, ū chi̍t lâng thâi lâng, bak hoeh ê to gia̍h tī chhiú-ni̍h, cháu-lâi tú-tio̍h tiúⁿ-ló kóng, taⁿ koat-sim ài siū sè-lé, iā thang kiâⁿ hō͘ i, che sī i tuì goá kóng, goá kàu taⁿ kì-tit, che sī i tuì goá kóng, goá kàu taⁿ kì-tit, che sī hui-siông ê lé-tián ê mō͘-to̍k, lām-iōng. Khoàⁿ pò ê hiaⁿ-ché, lín thang ka-tī siūⁿ.
(2) Lūn Chiâⁿ-sèng. In kóng, chiâⁿ-sèng ê phiau-chún, sī chiàu lâng suî-ê sìn ê thêng-tō͘, kap liông-sim ê ì-sek lâi chò phiau-chún, goá thiaⁿ-liáu chin kiaⁿ, che sī toā chhò. Só͘-í i tuì goá kóng, chheⁿ-hoan thâi lâng bô choē, chhin-chhiūⁿ án-ni, lâng nā chia̍h hun, chhoā sè-î, chia̍h chiú, i ê liông-sim nā bô ì-sek kóng hit ê si choē, chiū bô iàu-kín. Koh kóng, in ê bó͘ tiúⁿ-ló ū chhoā sè-î, sī uī-tio̍h i ū chīn-la̍t thoân-tō, chiū hit ê kong-lô thang pó͘. Toā chhò, toā chhò. Só͘-í in chhoā sè-î, chia̍h chiú, hun, á-sī sím-mi̍h pa̍t mi̍h m̄-tio̍h bô ké ê lâng, iā ē siū Sèng-lêng chín-tōng, in-uī i bô ì-sek hit hāng sī choē, chit ê toā chhò, m̄ pí sé-lé khah thiám. Lín khoàⁿ pò ê lâng thang phoàⁿ-piat.
(3) Chheng-nî ông-kok soeh. Chit ê chheng-nî ông-kok soeh, chit-sî lán ê kàu-hoē sin-chiá it-poaⁿ khah bô lâng gī-lūn. Só͘-í goá hut-jiân kóng, lán ū lâng khah bô bêng.
Chiàu lán chèng-thóng sìn-giōng ê lâng sī kóng án-ni. Kóng thiⁿ-tē ê chiong-boa̍t, lán ê Chú beh lîm-kàu tī khong-tiong, iā lán chiah ê iáu oa̍h--ê beh chiūⁿ-hûn ngiâ-chih Chú, iā āu-lâi beh kap i saⁿ-kap chò ông, chò chè-si 1000 nî. Chit ê kàu-lí sī tī Khé-sī-lio̍k, chit ê soeh sī kiò-choè chheng-nî ong-kok chêng soeh. Chit ê soeh tī Bí-kok Bú-tì ê Sîn-ha̍k Chong-tiúⁿ トーレ Sîn-ha̍k Phok-sū bat tù chi̍t pún Sèng-chheh Sîn-ha̍k hō͘ 30 goā phài ê lâng kong-jīn hit pún ê kàu-lí chò tio̍h. Chiông-tiong lán Tiúⁿ-ló-hoē iā kā i sêng-jīn chò tio̍h.
Chóng-sī chin Iâ-so͘-hoē ê lâng kóng hit ê sī chhò. Kóng hiān-sî chiū-sī í-keng 1000 ông-kok lah. In chin Iâ-so͘-hoē, hiān-sî chiū-sī tī hiān-sè ê 1000 nî ông-kok thoân-thé. Só͘-í in ê sìn-tô͘ hiān-sî chiū-sī ông, chè-si lah. Tuì chit ê chhò kak, só͘-í siông-siông kóng-chhut hit hō kî-sióng thian-goē ê soeh. Sím-mi̍h in bó͘ lâng khì thian-tông kap Hā-oa kóng-oē, sím-mi̍h thian-tông pâng chhun kuí keng, bián-liû ū kuí téng ê kî-soat chhut-lâi, siūⁿ-liáu iā hó-chhiò.
Kî-thaⁿ chhin-chhiūⁿ tuì Sèng-keng ê sî-tāi chhò-kak ké-soeh, á-sī kīn-lâi kóng Sèng-keng tiong hit nn̄g-jī Siōng-tè tio̍h lóng ké chò Sîn--jī (上帝改正為神). kóng nā kóng kèng Siōng-tè--ê bē tit-kiù, kóng he sī pài m̄-tio̍h, kóng tio̍h kan-ta kóng chin Sîn ê chiah pài ū tio̍h, si̍t-chāi chin phah-loān lâng ê sìn.
(4) Choè-āu siāng kan-khó͘--ê, chiū-sī in ê thoân-kàu hong-chiam, m̄-sī beh tì-ì kiù boē sìn ê lâng, sī tì-ì beh chhia-tó lâng ê sìn, ín-iú lâng ka-ji̍p in ê hoē, che sī thoân-kàu hong-chiam ê toā chhò. Khiok nā pa̍t kàu-hoē ê léng-sim--ê, in ū châi-tiāu kā i kiù jia̍t-sim, he bô hiâm. Liân hiān-chāi sìn Chú to ū jia̍t-sim ê lâng, iā kā lâng kóng he bē tit kiù, tio̍h têng lâi in hia chìm chi̍t-ê chuí, lâi chín-tōng chiah ē tit kiù. Che sī toā khó͘-o͘N3 ê soeh oē.
Che sī hit ê tiúⁿ-ló tuì goá kóng, kap goá só͘ lia̍h chò bô uî-ke̍h liông-sim ê phoe-phoàⁿ. Nā ū chhò, put-koán sím-mi̍h lâng to thang chí-chèng goá, goá chin hoaⁿ-hí koh ké goá ê su-siúⁿ. Choè-āu kóng chi̍t kù, chiū-sī in ê Sîn-ha̍k-soat siông-siông piàn-oāⁿ, bô ū tēng-chún ê Sèng-chheh ê ké-soeh-hoat. Só͘-í chi̍t nî chêng kóng ê Sîn-ha̍k, kàu-lí, chi̍t nî āu in n7 sêng-jīn ê chin-chē, che sī thang khó-lîn, in-uī in ê kàu-hoē boē chhiong-si̍t. Só͘-í sī kan-ta teh chhoē Keng-tiong ha̍p in ê ì-sù, iú-lī ê soeh nā-tiāⁿ, nā hō͘ piān bô oē, á-sī ka-tī hoat-kiàn khah hó ê soeh, in chêng ê soeh chiū hiat-ka̍k. Che sī lâng só͘ tú-tio̍h chin Iâ-so͘-hoē ê lâng só͘ tông-kám ê sū. Goá bián kóng siuⁿ chē, lín chē-chē lâng pí goá khah chai.
