Ki-tok ê sí
(M. C. H.)
1934. 7, no. 592, pp. 9
Chú Iâ-so͘ chhoā ha̍k-seng kàu Khek-se-má-nî ê hoe-hn̂g, kî-tó liáu. Hit ê lâng-bīn siù-sim ê Iû-tāi, ū ín-sut Chè-si-thâu kap chi̍t-tuī Lô͘-má peng, kia̍h to, kia̍h thuî-á kap hoé-pé, thàu-mê kàu hia lia̍h Iâ-so͘, ná lia̍h chha̍t chi̍t-iūⁿ. Tī Chè-si-thâu, Kong-hoē, kap Chóng-tok Pí-lia̍p-to ê bīn-chêng, siū chióng-chióng bú-jio̍k ê sím-mn̄g. Sui-jiân mn̄g liáu bô choē, iáu-kú Chóng-tok uī-tio̍h ài hō͘ Chè-si-thâu ê tóng hoaⁿ-hí, chiū hoat-kau Iâ-so͘ khì tèng si̍p-jī-kè.
Lia̍t-uī ah! Bô-lūn siáⁿ lâng, i ê sim nā tîm-le̍k tī lī-kí chú-gī ê choē-ok tiong; nā boē bat pún-sin keng-koè kî-īⁿ ê khún-pek; nā bô ū chi̍t tiám sêng-sim thé-hoē ê kang-hu, kap sióng-siōng ê lêng-le̍k; chiū bē-ē bêng-pe̍k tng-sî Chú Iâ-so͘ só͘ siū bān-poaⁿ ê thòng-khó͘. Taⁿ, tàu-tí Ki-tok ê Sí, ū siáⁿ ì-gī tī-teh?
1. Ki-tok ê Sí, sī Siōng-tè ū-tēng ê kè-e̍k.
Pó-lô Sian-siⁿ kóng, Nā-sī kàu hit ê sî, í-keng moá, Siōng-tè chhe I ê Kiáⁿ, tuì hū-jîn-lâng lâi chhut-sì, chhut-sì tī lu̍t-hoat-ē; lâi sio̍k-hoê lu̍t-hoat-ē ê lâng, hō͘ lán siū siat-li̍p chò kiáⁿ (Ka-lia̍p-thài 4:4, 5). Koh kóng, Ki-tok kàu kî, thè ū-choē ê lâng sí (Lô-má 5:6). Thang chai, Siōng-tè chhe Iâ-so͘ lâi sè-kan, chiū-sī ài kiù sè-kan lâng chhut-sí ji̍p-oa̍h. Iâ-so͘ iā chá-chá chai chit chhut chhám-ke̍k, tek-khak ē chi̍t pái ián-chhut tī i ê sin-chiūⁿ; in-uī nā bô án-ni, bô kàu-gia̍h thang hián-bêng Siōng-tè thiàⁿ sè-kan lâng ê chí-ì, iū-koh nā bô án-ni, bē-ē sêng-chiū kiù-sio̍k ê sū-gia̍p.
2. Ki-tok ê Sí, sī hō͘ Siōng-tè kap lâng koh hô.
Tuì A-tong poē-ge̍k Siōng-tè ê bēng-lēng í-lâi, Siōng-tè kap lâng ê keh-lī, bô ū lâng ē-thang hō͘ i koh ho̍k-tò. In-uī chèng-lâng lóng sī tiàm tī choē-ok teh seng-oa̍h, hō͘ Siōng-tè khoàⁿ chò tuì-te̍k; chí-ū Chú Iâ-so͘ thè lán siū-tèng Si̍p-jī-kè, chi̍t-bīn oân-sêng Siōng-tè ê Kong-gī, koh chi̍t-bīn, hián-bêng Siōng-tè ê Thiàⁿ-thàng; tuì án-ni, hō͘ Sîn-jîn-kan koh hô-hó. Pó-lô Sian-siⁿ kóng, Lán iáu-kú chò tuì-te̍k ê sî, tuì I ê Kiáⁿ ê sí, tit-tio̍h kap Siōng-tè koh hô (Lô-má 5:10). Koh kóng, Tuì si̍p-jī-kè kap Siōng-tè hô (Í-hut-só͘ 2:17).
3. Ki-tok ê Sí, kap sè-kan lâng put-tông.
Iâ-so͘ goân-pún sī Tō, hoà-sin chiâⁿ-chò jio̍k-thé. I ū Sîn-jîn ê sèng tī-teh. Lūn I ê Sîn-sèng (神性), éng-oán bē-ē sí-bô. Iâ-so͘ pún-sin bat kóng, Bô lâng tuì Goá chhú--i, sī Goá ka-kī pàng-sak--i. Goá ū koân thang ho̍k-tò (Iok-hān 10:18). Khó-kiàn, Kok-kok-thaⁿ ê tē-hng, sī Iâ-so͘ hoaⁿ-hí kiâⁿ kàu hia--ê; Si̍p-jī-kè ê hêng-hoa̍t, sī Iâ-so͘ chêng-goān sêng-siū--ê. M̄-sī chhin-chhiūⁿ lán lâng, sí ê sî-kan nā kàu, ko͘-put-chiong tio̍h sí ê thang pí-phēng.
Kiat-lūn: (1) Tio̍h chù-sîn khoàⁿ thè lán tèng tī Si̍p-jī-kè ê Chú Iâ-so͘, in-uī tuì I ê sìn-sim, chiū bô iàu-kín lêng-jio̍k, jím-siū khó͘-hêng, taⁿ tit-tio̍h choè-toā ê êng-kng (Hi 12:2).
(2) Tio̍h chiong lán kū ê lâng, kap Iâ-so͘ tâng tèng tī si̍p-jī-kè, hō͘ jio̍k-thè it-chhè ê chêng-io̍k, bô koh koán-hat lán (Lô 6:6).
(3) Tio̍h poē si̍p jī-kè toè Chú Iâ-so͘ (Lō͘ 9:23).
Iâ-so͘ uī-tio̍h beh kiù jîn-luī, ū hi-seng pún-sin ê sèⁿ-miā; só͘-í lán tio̍h ló͘-le̍k hiòng-chiân, uī-tio̍h Chú lâi hōng-sū.
