首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 數念過往的信徒
數念過往的信徒
卷期：第592卷 本次： 日期：1934/7 刊名：台灣教會公報 頁數：11-12
篇名：數念過往的信徒 [ Siàu-liām koè-óng ê Sìn-tô͘ ]
作者：
  顯示 : 漢羅 全羅 並列  

數念過往的信徒

1934.7，no.592，pp.11-13

I. 故吳黃--氏Io

  主後1850年8月16日，出世佇鳳山。到19歲，就嫁予黃Ka-tì先生。隔年決心信主領洗禮入聖會。

  黃Ka-tì先生是會門人。佇1865年佮故馬醫生過來台灣。伊有做馬醫生的助手，踮佇旗後醫館真久。後來有家己開業佇奉山。對1878年到1911年的中間，有擔當奉山教會的長老。然後有搬來台南告老，紲過身佇台南，享壽74歲。

  先生娘佇活當時，熱心服事主，真gâu幫贊丈夫，也真樸素閣節儉，gâu料理家庭，引chhoā序細拜上帝。若有艱苦人，伊真歡喜周助--in。佮厝邊不止和睦，人大呵咾--伊。伊有生一个後生，佮6个查某囝。

  近來因為身體那衰弱，就佇今年1月14日身體予主召伊，安然離開世間；享壽84歲。內外孫20外名。出葬彼日，有300外人來會葬。

  II. 老先生陳Iú-sêng

  陳Iú-sêng先生阮台中教會初代的傳道。伊的令郎Tun-tek，現時做醫師開業佇台中。伊的查某囝嫁趙Thian-chû先生，現時teh教咱的中學；紲做咱的財團法人理事長。

  先生享壽67歲。對少年去入神學，後來出來傳道30年，換17位。到身體衰弱帶真重的胃病，才辭職告老。

  論伊的傳道理真熱誠，濟濟項予咱數念。其中去後山傳道是第一悽慘，佇遐佮先生娘，細囝覕山久久，食樹皮草根過頓，也捌。為主盡忠phoe死，所以就致到帶重的胃病。

  伊來阮台中著任的時，教會真幼稚，破草厝仔。起頭無椅條，用chhāi竹管箍。然後買16條紅椅條仔，勻勻仔進，到有今仔日合用的大教會。厝大間，地坪闊。有人講，全台上闊囥的教會，減采是台中。照現時的時價來估，建物佮土地，講值倚有8萬銀。遮的無毋是對代代的牧師，先生的心血所造成，猶過起頭的苦心，無毋是對伊。

  最後講一句，就是到伊欲死的3日前。真歡喜，對伊的查某囝講，有一个聲明明共伊講，閣3日就欲chhoā伊倒去。對按呢伊真歡喜，叫人共伊洗身軀，剃頭，換衫，來等。到第3日攏便，笑gī-gī佮大家相辭。共先生娘講，「今我欲做我代先來去啦。」親像睏--去，按呢上天，去見主的面。彼日葬式佇咱教會來做，會葬的人幾若百，大家表敬意，做大行列來送伊安葬。

(L. J. S. )。

  III. 翁Kin長老

  翁Kin長老是二水教會的重要人物。佇少年的時，受伊的兄哥翁Hô長老的引chhoā；閣有看著上帝的大權能，就決心信主。佇1900年12月15日，就到拜堂禮拜。對彼時起，做熱心的信徒；就予教會揀伊當執事兩任；後來閣揀伊當長老兩任。盡忠就職，予會友所呵咾。

  佇今年2月間破病。後來病雖然有好，毋久身體攏袂勇。到佇10月1號，安然過世，脫離世間的艱苦；予主召伊轉去爸兜，享受永遠的福氣，享壽63歲。總是教會失落一个重要的人物，大家傷心毋甘。

  佇10月3號，頂晡9點外做告別式，會內會外有400左右人來會葬，也有濟濟的弔詞，弔奠。楊Chù牧師說教，黃仁壽司會。

  今將伊生存所知影--的，寫幾項來數念伊：-

  1. 熱心服事主。伊信主了後，有拄著逆境。就是信主6年，就死查某囝，10年死某，閣10年，閣死紲娶的某。雖是按呢，伊的信仰無搖動，猶原掠服事主做要緊。本身勤讀聖經，致意守禮拜。也鼓舞家內，以及信者著要緊守禮拜。伊佇病中身體軟弱，也勉強閣來禮拜一擺。

  2. 關心佇教會。論教會逐項事，伊不止關心，佇病中，也常常teh掛慮教會的事。又閣教會逐項的捐項攏是伊teh攬尾。別位教會若來題，攏歡喜出。

  3. Gâu疼傳教--的伊對傳教--的gâu同情，也捌暗靜幫贊拄著艱苦--的。

  4. Gâu體貼人。不論會外會內的人，攏呵咾伊gâu體貼人。因為不論甚物人若無拄好，共伊求借攏有；也罕得共人討。捌一擺去山裡欲轉來的時，拄好有人teh共伊偷扭蕃薯，伊越對別位，潦過溪轉去，因為驚了偷扭蕃薯的人看著見笑。所以，逐人毋甘。

  今長老的工煞啦；有留伊的婦人人佮兩个後生，5个查某囝，有的猶手裡抱。伊的大後生翁Se-keⁿ君，現時猶佇神學校，是有為的青年。願主祝福in，也幫贊in會綴長老的腳步，關心佇教會。Amen。(黃仁壽記)。

  IV. 失落好的郭牧師娘

  郭牧師娘來奉事敝會6，7年久，教會受伊的培養非常濟。教會那活動堅固。不幸染著產褥熱的症，治療無效。

佇1月19日別世，享壽43歲。留郭牧師，佮5个後生，5个查某囝，20日午後3點告別式。楊世註牧師司式。有中會的代表，本庄的庄長講弔詞。會內會外的朋友，幾若百人會葬，無毋流目屎表同情。一項是毋甘伊的子女真予人傷心。今煞伊的著磨來安歇，福氣ah！

  伊佇阮遮的工作言行，簡單記幾項，減采會通做模樣也kú敢。

  Gâu培養教會：對伊來敝會，教會漸漸堅固徛在，教會逐方面的機關，伊無毋佮牧師同出力培養。

  真和平：伊毋若佇家庭和平，就對會內會外攏真和平，毋捌佮人衝突，無講話。

  真平等：伊對富貴的人，無扶挺thiám-mīⁿ，對貧賤--的，無驕態看輕，無分彼此，一視同仁。

  真聽人：伊若聽著會友破病，抑是甚物試煉，隨時去安慰，替人祈禱。這擺伊家己teh傷重，拄著我的婦人人，佮洪Tāi-bí先生娘也著重病。伊逐日都teh問看in兩人有較好無？俗語講，sin to不顧己，thài會顧別人，若是伊是掛慮別人，較過頭佇本身。

  性情溫純：伊的性情真溫純，不時有笑容，清彩的面色，毋捌看著伊有受氣，懊惱的容貌。

  Gâu體貼人：伊是驚人艱苦，毋驚家己的著磨，罕得央託人鬥做伊的工。這擺伊的病遐傷重，毋知偌苦痛，攏無哼呻，是驚牧師佮伊的子女煩惱，也毋敢勞動別人。

  真克己：伊是食bái，穿bái。若買較好的物配，是張等人客；較好的衣裳，重樸素，真經濟。對家己是真節儉，對教會是盡所的援助。

  致意教育：對in來敝會了後，逐年有開夏期學校，伊是放下家庭的工，逐日出力鬥教。也是一个真好的主日學教員，對伊的盡力，加真濟人會讀聖經。

  Gâu栽培子女：伊的子女5、6歲，就會曉讀聖經。In是散hiong的傳教家，栽培4个女兒，經由女學，一个長男佇中學，通知伊對子女的關心。

  Gâu援助丈夫：牧師所做的工，伊也gâu幫贊--伊，佇精神上也gâu幫贊。照郭牧師講，伊佇少年的時，受著刺激，愛時傳教的工，牧師娘盡力阻擋，安慰，會得達做牧師的地位，大半是得著牧師娘精神上的援助。

  以上是照我所知，記淡薄來數念--伊。俗語講，「好到十全，歹到加圇」，實在有影。

  牧師娘佇家庭是好的主婦，佇教會是好的指導者，佇社會是光的燈台。伊的死，是勝利的死。不過是in的遺族大損失，阮的教會大薄福。

  (草屯賴江，記)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461