Chû-siān-hoē
(Ông oá)
1934. 7, no. 592, pp. 19
Tì-ì, chhiáⁿ Lia̍t-uī thiàⁿ Chú ê hiaⁿ-ché lâi khoàⁿ, thang chai lán kin-nî tio̍h àn-choáⁿ chhut-la̍t hiàn-kim ê sū.
Chiàu Châi-bū-pō͘ só͘ ū-sǹg--ê, pâi-lia̍t hō͘ tāi-ke chò chham-khó.
1. Kin-nî khiàm khah-chē chîⁿ: In-uī kin-nî lán Tiong-hoē lāi , ke saⁿ ê sian-siⁿ, chiū-sī Giâm-chêng, Ē-poàⁿ-thiⁿ, Toā-nâ. Chit saⁿ uī, in só͘ chhut ê í-goā, tio̍h koh thiap 770 goā kho͘. Koh ū kuí-nā keng kàu-hoē kin-nî tò-thè kiám chhut; chiū-sī Gû-taⁿ-oan, Tang-āu-liâu, Koè-kau, Hó͘-boé, Thô͘-khò͘ chí 5 uī, kiám-chhut iok 240 kho͘; nn̄g tiâu kiōng, tio̍h ke khai chi̍t chheng kho͘.
Taⁿ chit chheng kho͘ beh tuì toh-uī lâi tit-tio̍h? Taⁿ lâi kóng choân-pō͘ só͘-khiàm--ê; kin-nî lán choân-pō͘ só͘ khiàm--ê, sī saⁿ chheng kho͘.
1. Pó͘-chō͘ kim: Pun khah lím nn̄g-chheng nn̄g-pah kho͘.
2. Lîm-sî kiù-kip hiàn-kim: Tī 8 goe̍h 12 hō beh si-hêng. ǹg-bāng thang tit-tio̍h saⁿ pah kho͘.
3. Chû-siān-hoē: Beh ke khui chi̍t tiâu sin lō͘, chiu sī ke tuì Chú-ji̍t-o̍h seng-tô͘ tê, khoàⁿ sī beh lîm-sî tê, á-sī beh chiong in nî-tiong ê hiàn-kim, the̍h kuí hun lâi hiàn lóng hó.
Koh chi̍t hāng, ài toā lâng gín-ná tê khah chiâu-tio̍h, hō͘ kìⁿ-nā chò sìn-chiá--ê, ta̍k lâng lóng ū hūn chit hāng Chû-siān hiān-kim; ū-ê thang hiàn kuí cha̍p kho͘, bô-ê thang hiàn kuì chiam chîⁿ. Kin-nî Chû-siān-hoē, tio̍h ke tê ū saⁿ pah kho͘ chiahbē khùn-lân. Só͘-í ài chhiáⁿ hiaⁿ-tī chi-moē, chū-hoat-tek lâi hiàn khah ū hok-khì; in-uī goá bē-tit kàu lín ta̍k kháu-chàu kìⁿ-tio̍h ún ta̍k lâng ê bīn, nā chiap bô tio̍h ê lâng, chhiáⁿ lín tuì lín ê sian-siⁿ sin-ji̍p-ài chhut loā-chē, beh kau ê sî, chiàu lín ê lī-piān thang kau lín ê sian-siⁿ, á-sī Tióng-chip.
Kū-nî chóng siu sī Y822 38; koh chi̍t tiâu Y70.27, ha̍p-kiōng Y892.65. Kin-nî ū-sǹg beh tê chheng-jī kho͘ àn-sǹg tī 7 goe̍h kan, ē chhut-khì tê. Chhiáⁿ tāi-ke tàu kha-chhiú, chiū-sī.
