首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 舊約書序說
舊約書序說
卷期：第593卷 本次： 日期：1934/8 刊名：台灣教會公報 頁數：5-7
篇名：舊約書序說 [ Kū-iok-su Sū-soat ]
作者：陳金然 Tân Kim-jiân
  顯示 : 漢羅 全羅 並列  

舊約書序說

1934.08  593卷  p.5-7

(陳金然)

(接前號第6面)

III. 經學士 - 書記官

佇新約裡有時人稱呼叫經學士，教法師(教律法的先生)，博士；其實這3个名，攏siāng一項的意思。有時特別尊稱做法利賽的經學士(可 2：16)，猶過其實就是法利賽人。總是毋通拍算新約時代的經學士，拄拄佮起初的經學士攏siāng款。因為經學士的工，是(1)研究猶太人的律法，(2)解釋律法，(3)抄寫律法來流傳正本佇後代。按呢，就是新約時代的經學士是律法家，若是初初的經學士是咧 (1)抄寫(編輯)宗教文學(聖經 - 律法)，(2)學者，(3)是解釋家。Taⁿ咱暫時來想這个書記官(II 母 8：17)的來歷。論筆耕(對寫字的頭路來度活)的歷史，通揫到B. C. 2000埃及的時代。對Petrie來發掘西奈半島的碑文，就知寫字的法度已經佇B. C. 1500就對埃及傳入迦南，西奈地方啦！拍算彼時是紲傳筆耕的職業來。B. C. 14世紀的時陣，迦南地方無論偌小的諸侯，都有會寫搢形文字(楔形文字)的書記。原來寫這號搢形文字是高級的學問，普通人袂曉得，所以這號搢形文字是公用的時才有用，若私用是用迦南，腓尼基字。照士師記8：14來看，就知B. C. 12 世紀尾，迦南文化已經真進步，抄寫的術，已經真普及的款。

接紲迦南文化的以色列民族，也敢無各樣佇頂面所講--的。佇in敬拜上帝的聖殿--裡，抑是王宮--裡，攏有專門的書記，咧掌理年代記的記錄。佇大衛的王宮-裡有任命史官佮書記官(II 撒 8：16，17)，大衛本身也會寫(II 撒11：14)。對遮的咱通想，當時上流的人攏會曉得自由來攑筆啦 (I王21：8，II王5：5)。

總是對597 B. C. 佮586 B. C. 兩擺的遷徙，猶太族的上流階級攏受掠去巴比倫(II王24：25)了後，佇遐in的思想方面佮文學方面大發達，只有是編輯佮訂正在來文學nā-tiāⁿ。總是佇-遐有生出一種叫做「經學士」的階級。彼个頭一个，就是出名的「通達天頂上帝的律法的經學士」Í-sū-la̍h啦！(Lat 7：12)。伊佇B. C. 458對巴比倫轉來耶路撒冷。彼霎了後，這个階級漸漸發展，成做非常的勢力，到B. C. 3世紀頭，紲成做「遮的經學士的家」(I代 2：55)。B. C. 2世紀頭，照Ben sirach所記，in的勢力非常大，所有的猶太文化，攏佇in的肩頭頂--裡。照in的解釋，實行律法毋但做個人的活命的培養nā-tiāⁿ，是不止關係社會佮國民的繁榮。因為上帝有啟示天的法則，做人的路，無論外皮抑是精神，人攏著對這个來得救，所以違逆律法，就是悖逆上帝。法利賽黨，是做一个思想的代表者。所以in佇新約時代「佇會堂內坐高位」(Lō͘ 11：43)，「經學士佮法利賽人坐摩西的位......」(太23：1，2)。對按呢人尊稱 in做「拉比」。In也愛人按呢稱呼in。Taⁿ in的任務：-

1. 律法的方面。

  a)用理論圖謀律法的發達。

  b)教示學生捌律法。

  c)佇70人會議佮地方裁判所做審判司。

2. 宗教的方面。佇會堂--裡執行宗教的的勸勉，抑是神學tek的教示。照新約，耶穌人有看伊做拉比，伊本身也有做這號工程(路 4：16 - )，閣捌受拉比的教育的保羅，佇伊的傳道旅行中，常常捌做這號工 (行 13：13 - )。

3. 文獻的方面。保存聖經佮抄寫。佇這時代的經學士，本身有咧設法保存佮抄寫兩項的工；總是後來是彼號無遐爾有專門智識的紲職業的的人咧掌抄寫的事。照看佇這時代，是不止自由通變換本文的款。

猶太民族是用耶路撒冷做in全生活的中心，雖然對希律已經失落政治的獨立，也是無變換。總是到A. D. 70耶路撒冷予羅馬軍thún踏，閣A. D. 135因為Kok-suì-tek彌賽亞Bar Kochba反叛，致到政府禁止，毋准猶太人入聖城。對按呢in的全生活佮指導者團大變動。因為百姓攏掠這个慘事，是對極端的彌賽亞思想佮將末思想來，就是掠熱心黨的所做--的。所以遐的賢人對百姓無人望，閣羅馬政府咧壓迫，就漸漸予經學士吞--去。耶路撒冷陷落了後，遮的經學士就聚集學生佇Jabune繼續in傳來的教育。這中間，in有將in的傳承來組織編篡裁判佮宗儀。對這層大貢獻，大努力--的，就是Rabbi Akiba。伊佇舊約的聖經佮本文，研究上是照真大的地位。伊因為Bar Kochba的事件，致到伊的性命佮事業平平煞。若是伊的學生Rabbi Meir有接續伊的跤步。後來in的事業的中心地有紲去Thê-pí-lī-a。In的編篡事業的結果，就是Mashna (A. D. 3世紀頭完成)佮Gemara (6世紀尾完成)，也這兩部合做伙，就是出名的Talmud。

In對重聖經的律法以外，不止重用口傳的細則 (可7：3，4；太15：3)。這號口傳的細則就是Mishna，意思是「重」，抑是「教示」，有分做兩部6綱。

  1. Jeroim - 農業上的律法。

  2. Moed -安息日，聖日的法。

  3. Nashim -婚姻法。

  4. Nejekim - 法律法。

  5. Kodashim -牲禮法。

  6. Toholoto -祭司的齋戒法。

  2 部   Halakah -日常規則(1-3)。

         Haggadah -律法解釋(4-6)。

遮的綱要，有閣分做篇，章，節，逐節是叫做Mishna，Gemara是咧註解Mishna--的，意思是決定抑是教理。

佇這中間留佇巴比倫的猶太人，也有興起經學士，也編輯Talmud，多少佮Thê-pí-lī-a所編--的有相出入，所以叫彼个做巴比倫Talmud。Thê-pí-lī-a彼个稱做Pa-le̍k-su-thèng Talmud。

傳承已經決定，就紲做別項事業。因為希伯來話，變做死話，也在來的希伯來字，是寫子音nā-tiāⁿ，所以驚了將來生起誤讀就著設法予本文的讀法佮in傳統較一致；就發明母音記號來補希伯來字的無完全。參加這个大事業的學者名佮按怎完成這个事業，攏無地通知。所以今仔日chheng遐的put-bêng的學者做Massoretes，也所發明的記號叫做Massra記號。

所以經學士的中間專門咧做抄寫的工的人，稱in做Massretes，意思是「傳統」抑是「手盤手。」In愛無錯誤，所以欲抄寫著一一暗記字數，逐逝的中點有偌濟，字的大小，頂下，攏照原本。有時若字有過頭抑是無夠，也照按呢抄，只有記明訂正的說明佇欄外。欲寫的時著先出聲對本身講，「我因為欲予摩西的律法成做聖的冊，才來寫這个，」也見律法的路尾逝著寫「為著全以色列的目睭，」決斷毋通用倒手寫，字佮字著閬一支頭毛闊，攏毋通用略字。全卷的字攏著平大，逐擺若寫到上帝的名的時，著念「我寫這个名，成上帝的榮光。」咧寫上帝的名的時，雖然以色列王來，也毋通停，閣著一下墨寫到了，毋通搵墨才閣寫。寫好的律法著30日內攏校正，一列若有一个大錯抑是3个小錯，就袂做儀式用--得，實在真細膩斟酌。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461