Tī lí chhiú-nih sī Sím-mi̍h?
Tê-sû: Chhut 4:2.
(Niû Siù-tek)
1934. 8, no. 593, pp. 7-8
Kū-e̍k--ê, sī siá "Lí chhiú kia̍h--ê sī sím-mi̍h?" (What is that in thine hand?)
Chit kù oē, sī Mô͘-se tī Hô-lia̍t ê soaⁿ chhī iûⁿ, Siōng-tè chhut siaⁿ mn̄g i ê oē. Siōng-tè tī chhì-phè tiong ēng īⁿ-siōng kéng-tiàu Mô͘-se, kā i kóng, Goá sī chū-jiân jî-jiân--ê, lí tio̍h chhoā goá ê peh-sèⁿ chut Ai-ki̍p. Mô-se the-sî, kám-kak bô lêng, in-uī tī 40 nî chêng, bat ēng bú-le̍k, beh lâi chhoā peh-sèⁿ thoat-lī chit ê kok, nā-sī kàu lō͘-boé sit-pāi. Ta Ni tī chit ê Bí-tiân, ài beh lâi chò i it-seng ê iàm-sè seng-oa̍h. In-uī i ū si̍t-chì, siū Siōng-tè bô beh kiù--i lah, sī kan-ta teh thèng-hāu beh sím-phoàⁿ lâng sí-liáu ê lêng-hûn nā-tiāⁿ, I kap hiān seng-oa̍h ê jîn-luī choa̍t-iân--lah! Ū chit hō su-siúⁿ ê Mô͘-se, taⁿ i beh thè peh-sèⁿ chhut-thâu ê sim í-keng léng, kiù bîn-cho̍k ê cheng-sîn, tuì án-ni iā í-keng hoa-khì--lah. Chóng-sī Siōng-tè sī éng-oán tī-teh--ê, sī chū-jiân jî-jiân--ê, (I am that I am). I ū ēng chhì-phè tiong ê hoé, lâi piáu-bêng I sī kong-gī--ê; ēng chhì-phè sio bē to̍h, lâi hián-bêng I sī éng-oán tī-teh--ê, iā soà chhut-siaⁿ kā i kóng, Goá sī lí ê chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè, lâi piáu-bêng I chin-chiàⁿ kap hiān seng-oa̍h ū koan-hē tī-teh. In-uī i ê chó͘-kong ê chi̍t sì-lâng, Siōng-tè án-choáⁿ teh ín-chhoā--in. Taⁿ in hiān-chāi ê kan-khó͘, Siōng-tè iû-goân beh khoàⁿ-kò͘, hû-chhî--in. Nā-sī lí Mô͘-se tio̍h thiaⁿ Goá ê bēng-lēng, Goá beh ēng lí lâi chhoā peh-sèⁿ; Goá chit-sî beh kiù lín, chhin-chhiūⁿ chá-ji̍t kiù lín chó͘-kong chi̍t-iūⁿ. Mô͘-se ê sim kiaⁿ-hiâⁿ, tiû-tû the-tang the-sai, ài beh siám-pīⁿ chek-jīm.
Kú-kú khiā tī chia kap Siōng-tè tuì-tap ê Mô͘-se, lóng sī teh siūⁿ pa̍t lâng ê pún-sū, koân-le̍k, châi-tiāu, lóng bē kì-tit ka-kī sī siáⁿ-hoè. Taⁿ Siōng-tè ài hō͘ i chai, chiū kóng, Tī lí chhiú--nih sī sím-mi̍h?
1. Chhī-iûⁿ ê Koáiⁿ-á
Biô-siá tī Mô͘-se ba̍k-chiu só͘ ū--ê, sī Nî-lô ê toā-hô, Ai-ki̍p ê ông-kiong, Hoat-ló ê ióng-béng, pō͘-peng bé-peng ê chéng-chè, Pí-tong Lân-sek ê toā pó-khò͘. Chiah-ê lóng sī Ai-ki̍p kok ê koân-le̍k, châi-le̍k, goá chit ê chhī-iûⁿ ê Mô͘-se beh thài oē iâⁿ--i? Tú teh siūⁿ chiah-ê ê sî, thiaⁿ-tio̍h Siōng-tè teh mn̄g i khoàⁿ chhiú--nih sī sím-mi̍h. Hut-jiân hō͘ i bē kì-tit pa̍t-hāng, kan-ta khoàⁿ i chhiú só͘ kia̍h--ê, chiū ìn Siōng-tè kóng, Sī koáiⁿ-á. Ah! Chin-chiàⁿ sī koáiⁿ-á. I teh siūⁿ tio̍h kia̍h to, lâi khì kap Hoat-l2o sio-thâi, nā-sī Siōng-tè ài i kia̍h koáiⁿ-á khì chhoā peh-sèⁿ. Chhī-iûⁿ lâng ū nn̄g ki koáiⁿ; chi̍t ki kiò chò kùn, boé-á khah toā kho͘, ū tèng teng, sī teh phah iá-siù; koh chi̍t ki sī koáiⁿ-á, thâu-á kau-kau, teh chí-tō iûⁿ-á ê kiâⁿ-ta̍h, kap kiù iûⁿ-á tuì hām-kheⁿ khí--lâi. Mô͘-se só͘ kia̍h ê sī koáiⁿ-á, só͘-í sī hián-bêng Siōng-tè ái i ēng bo̍k-chiá thiàⁿ iûⁿ ê thài-tō͘: Chiū-sī bo̍k-chiá thiàⁿ iûⁿ ê thài-tō͘: Chiū-sī un-jiû, thiàⁿ-thàng, pó-hō͘, chí-tō, hi-seng ê cheng-sîn lâi chhoā hiah ê peh-sèⁿ. Sìn-tô͘ beh thiàⁿ kàu-hoē, hō͘ kin-á-ji̍t léng-sim ê sìn-tô͘ tò-tńg, m̄-sī ēng to-kiàm ê lí-lūn, á-sī kan-ko ê kong-kek, si̍t-chāi sī kan-ta chi̍t ki ê chhī-iûⁿ koáiⁿ. Bo̍k-su, thoân-tō, beh kiù hiān-chāi ê kàu-hoē, siông-siông ài ēng in ê pún-sū, ha̍k-būn, chhiú-oán, sè-le̍k kap chèng-chhek, chóng-sī án-ni bô tek-khah ē sêng-kong, ū-sî beh toā sit-pāi. To̍k-to̍k tio̍h kia̍h só͘ kia̍h ê chhī-iûⁿ koáiⁿ, lâi chò lín tī-hoē ê hoat-chek, kiù lâng ê ke-si, ún-tàng ē toā tek-sèng.
2. Ū koân-lêng ê koáiⁿ-á
oa̍t-thâu khoàⁿ-tio̍h hit ki o͘-sian o͘-sian koh m̄-ta̍t chîⁿ, tāi-iok ū 5 chhioh 8 chhùn tn̂g ê koáiⁿ-á, chiū teh siūⁿ Siōng-tè mn̄g goá chit ki koáiⁿ beh chhòng sím-mi̍h. Hut-jiân thiaⁿ-tio̍h Siōng-tè kā i kóng, Hiattī toē-nih; i chiu koh siūⁿ káⁿ sī kiò goá hiat-kak, I beh koh ēn pa̍t-hāng hō͘ goá, thang chò goá thâi-iâⁿ tuì-te̍k ê ke-si. M̄-sī lah! Khoàⁿ-tio̍h só͘ hiat ê koáiⁿ pìⁿ-chò choâ, chiah chai Siōng-tè kiâⁿ koân-lêng tī i ê koáiⁿ-á, hō͘ i ê koáiⁿ pìⁿ-chò ū koân-lêng ê koáiⁿ-á.
Mô͘-se ê sim-koaⁿ chin kiaⁿ, m̄-káⁿ khì, nā-sī Siōng-tè hō͘ i ê koáiⁿ pìⁿ-chò ū koân-lêng, beh hián-bêng Siōng-tè ê Sîn beh ka pi khì, Siōng-tè ê koân-lêng kap khuì-la̍t beh kap i saⁿ-kap kiâⁿ Sui-jiân Mô͘-se sī nńg-chiáⁿ koh ham-bān kóng oē, iáu-kú nā tit-tio̍h Siōng-tè ê koân-lêng kap i kiâⁿ, chiū beh hō͘ hit ê ióng-béng ê Hoat-ló sit-pāi, beh hō͘ hit 5 pù-ū ê Ai-ki̍p kok bia̍t-bô. Ah! Mô͘-se án-ni sìn, Siōng-tè án-ni kiâⁿ, kàu-hoē tit-tio̍h khah-iâⁿ. Chē-chē hiaⁿ-tī teh siūⁿ i sī chin ham-bān, bô châi-tiāu; chē-chē Sìn-tô͘ teh phah-sǹg lán to bô chhin-chhiūⁿ bo̍k-su, thoân-tō hiah bat tō-lí, lán lóng boē-hiáu kàu-hoē ê chèng-tī sī sím-mi̍h, á-sī pang-chān kàu-hoē tio̍h cháiⁿ-iūⁿ, hiah ê lóng-sī thoân-kàu-su tióng-chip ê tāi-chì; in-uī lán sī o͘-sian o͘-sian ê koáiⁿ-á. It-tàn siū-tio̍h ap-pek, lóng-lo̍k hit-sî chiah teh siūⁿ, thài oē án-ni. Che lóng-sī lín bē kì-tit só͘ kia̍h ê koáiⁿ, sī ū koân-lêng--ê, sī ē hō͘ Hô-chuí pìⁿ huih, hō͘ tîn-á pìⁿ báng, hō͘ Âng-hái pìⁿ ta-tē ê ū koân-lêng ê koáiⁿ-á--lah.
Sìn-tô͘ ta̍k lâng tī kàu-hoē lóng thang chai, thang kóng, thang pān, thang kà, thang thoân. Siáⁿ-sū m̄-ài chai, m̄-ài kóng lâi siū ap-pek; m̄-ài pān, m̄-ài kà, m̄-ài thoân lâi siū lóng-lo̍k ah?
Kiat-boé lâi kóng, suî lâng tio̍h kia̍h só͘ kia̍h--ê, lâi chīn Siōng-tè kau-tāi ê kang, tio̍h sìn Siōng-tè ê koân-lêng kap khuì-la̍t, lâi khah-iâⁿ lóng-chóng ê tuì-te̍k, hō͘ lán khiā-chāi tī sìn, kiâⁿ tī sìn, pháu-cháu tī sìn, tuì sìn kàu sìn, kàu éng-oán.
