Un-jiû Khiam-sùn

Má-thài 11 chiuⁿ 29 chat

(Tân chheng-gī)

1934. 8, no. 593, pp.22-23

  Lūn Un-jiû, khiam-sùn chit 4 jī, sǹg sī Tō-tek-tiong ê tē-it, Chú Iâ-so͘ siông-siông kà-sī lâng tio̍h o̍h I, I pún-sin ū án-ni kiâⁿ. I sui-jiân ū Siōng-tè ê Kiáⁿ ê chun-chheng, kàng-lîm choè lâng, kam-goān siū sè-kan ê kan-khó͘, siū pháiⁿ lâng ê hām-hāi, choân bô oàn-hūn ê sim, sûn-sûn siān kàu, toā kiâⁿ īⁿ-chek, bô khoa-kháu kok-it ê koân-lêng. Koh-chài chiong-sin sūn-thàn Siōng-tè ê bēng-lēng, khiam-pi kàu sí. I ê un-jiû khiam-sùn, si̍t-chāi thang choè bān-sè ê su-piáu. Lūn I só͘ kà-sī un-jiû khiam-sùn ê tō-lí, ū kì-chài tī Sèng-keng, chhì ín lâi lūn:-

  1. Khoàⁿ Má-thài 18 chiuⁿ 1-4 só͘ kóng. Tng-sî ba̍k-seng chiū-kūn Iâ-so͘ kóng, Tī Thian-kok sím-mi̍h lâng choè toā? Iâ-so͘ kiò chi̍t ê gín-á khiā tī bīn-chêng kóng, Goá si̍t-chāi kā lín kóng, bô tò-tńg chhin-chhiūⁿ gín-á, boē tit-ji̍p Thian-kok. Só͘-í hoān-nā khiam-sùn chhin-chhiūⁿ gín-á, chiū tī Thian-kok choè toā. In-uī gín-á ê khoán, ài tì-sek, ài chit-mn̄g, siông-siông ài cha-chhat sū-bu̍t. I ê sim goân sio̍k khiam-sùn, bô kiau-ngō͘, in-uī I ū goân-pún khiam-sùn ê thian-sèng, chit khoán ê sim-hō͘ Iâ-so͘ só͘ hoaⁿ-hí. Chāi-chá Hoat-lī-sài lâng bô khiam-sùn ê sim, só͘-í Iâ-so͘ chek-pī i ū chai-ē, i ê só͘ choè, chiū-sī khiam-sùn ê hoán-tuì, lâng m̄-thang o̍h i, tio̍h o̍h Iâ-so͘ khiam-sùn ê hó bô-iūⁿ.

  2. Khoàⁿ Mâ-thài 20 chiuⁿ 25-28 só͘ kóng. Iâ-so͘ tiàu ha̍k-seng lâi, kā i kóng, Lín chai īⁿ-pang lâng ū kun-ông chú-tī, ū tāi-jîn koán-hat, to̍k-to̍k lín tiong-kan m̄-thang án-ni; lín tiong-kan ài choè toā ê, tio̍h choè lâng ê chhe-ēng; ài choè thâu ê, tio̍h choè lín ê lô͘-po̍k. Chhin-chhiūⁿ Jîn-chú lâi, m̄-sī beh chhe-ēng lâng, chiū-sī beh hō͘ lâng chhe-ēng; koh-chài pàng-sak sìⁿ-miā, thoè chèng-lâng sio̍k choē. Iâ-so͘ kóng án-ni, sī in-uī tng-sî Se-pí-thài ū nn̄g ê kiáⁿ, i ê lāu-bú chhoā i chiū-kūn Iâ-so͘, pài kiû chi̍t hāng. Iâ-so͘ kóng, Lí ài goá choè sím-mi̍h? ìn kóng, Chún goá nn̄g ê kiáⁿ, tī lí ê Kok chē lí ê chó-iū. Cha̍p ê ha̍k-seng thiaⁿ-liáu chin oàn-hūn chit nn̄g ê, in-uī chai in ê ì-sù bô khiam-pi, ài choè toā.

  3. Khoàⁿ Iok-hān 13 chiuⁿ 4-5 só͘ kóng. Chiū lī-khui toh, thǹg saⁿ; ēng kun ka-kī bâ. Tò chuí tī poâⁿ nih, soé ha̍k-seng ê kha, ēng só͘ hâ ê kun kā in chhit. Iâ-so͘ kiâⁿ án-ni, sī in-uī khoàⁿ ha̍k-seng iû-goân boe-oē khek-kí khiam-sùn, só͘-í kiâⁿ án-ni lâi kà-sī in. Só͘-í I án-ni kóng, Goá choè án-ni lín chai bô? Lín chheng goá choè Chú, choè Sian-siⁿ, tio̍h soé lín ê kha, chiū lín iā tio̍h saⁿ-kap soé kha. Goá chí-sī lín, ēng chit ê haot-tō͘ hō͘ lín o̍h goá lâi choè.

  Chit khoán ê bô͘-hoān, si̍t-chāi sī un-jiû khiam-sùn ê chin-siòng, lán lâng tio̍h o̍h án-ni lâi kiâⁿ. Só͘-í lán lâng tī sè-kan, tio̍h ēng un-jiû khiam-sùn choè kun-pún, chiū só͘ tit-tio̍h ê lī-ek sī chin toā.