Toā-oan Kàu-hoē

1934. 9, no. 594, pp. 18

  Pè-hoē tuì kiàn-tiok sin pài-tn̂g í-lâi, ta̍k khoán ê chi̍p-hoē ū ná oa̍h-tāng. Chin thang kám-siā Siōng-tè. Pè-hoē ū chi̍t ê hoē-iú Kim-an hiaⁿ, put-chí jia̍t-sim pài Siōng-tè. Chá, put-sî siū sè-sio̍k lâng ê ki-chhì, iáu-kú bô loé-chì, iû-goân khîⁿ-tiâu Siōng-tè. Chit keng pài-tn̂g koh khí, ē-tit sêng-kong, iā-sī tit-tio̍h i chē-chē ê khuì-la̍t. Bô phah-sǹg tuì kū-nî lâi ū phoà-pēⁿ, kiōng tó-chhn̂g 13 goe̍h ji̍t kú. Sui-jiân hiah kú, iā chin gâu thun-lún, oá-khò Siōng-tè. Tī kin-nî 5 goe̍h 5 ji̍t, hō͘ Siōng-tè kéng-tiàu khì Thian-tông; 6 hō lé-pài-ji̍t, ū chhiáⁿ Pa Phok-sū chò Kim-an hiaⁿ chòng-sek ê chú-lí. Goá siá kuí-kù, lâi siàu-liām Kim-an hiaⁿ ê chīn-tiong. Bāng lán o̍h i ê bô-iūⁿ.

  (Chiā Khèng jū pò).