首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 舊約書序說
舊約書序說
卷期：第594卷 本次： 日期：1934/9 刊名：台灣教會公報 頁數：6-8
篇名：舊約書序說 [ Kū-iok-su Sū-soat ]
作者：陳金然 Tân Kim-jiân
  顯示 : 漢羅 全羅 並列  

舊約書序說

(陳金然)

(接前號第7面)

1934. 9，no. 594，pp. 6-8

  IV. 舊約書的背景

  我信聖經是上帝的話，是人的經驗最高懸位的記錄。佇彼背後，有活活的上帝的啟示佇teh。因為按呢，自然有時代的表現，閣也有穿環境的衫佇teh。所以咱著知上帝的話對甚物人，對甚物機因來啟示佇歷史裡！這是咱欲明白上帝的啟示的本旨，第一重要的問題。

  原來時代有時代特殊的話語，親像現代逐項攏要緊充實，所以不論甚物，都著究勘到彼个長，闊，懸，深 (弗 3：13)。換話來講，就是著立体的的看法。

  宗教欲表現伊的思想，猶原著借用時代的話語。對按呢實在欲研究聖經，愛了解彼內面的宗教思想。所以著代先知彼時代希伯來人的社會生活佮in的變化；因為這是舊約書的母胎。

  照希伯來的民族史來看，in有3擺換in的環境，亦對彼个環境，或是順應，或是反抗，到尾有生出特色的思想佮文學。大概是：-

  (1) 受迦南的影響。對這个影響所生出--的，是「預言的的宗教佮文學」，實在是希伯來思想史的黃金時代。

  (2) 受巴比倫的影響。對這个環境所生出--的，是「祭司的的宗教佮文學。」

  (3) 受希臘文化的影響。佇這中間有生出「gâu人- 智者的宗教佮文學。」

  今愛淡薄來講起彼个大略。

  1. 受迦南的影響。

  希伯來人的祖公是「一个teh欲死的亞蘭人」(申 26：5)，是對亞蘭的移住團 分開。後來佇遮佇遐漂流-親像創世記的族長生活-經過濟濟變遷，「落去埃及，寄跤佇遐，人額少少，佇遐成做一國，大閣強，人額閣濟」(申 26：5)。後來有大的指導者chhoā in到西奈山，佇遐佮耶和華上帝立約。這个是將來予in 「將恁列祖佇大河彼爿佮佇埃及所服事的上帝除去，來服事耶和華」(約書亞24：14)的一轉機啦！

  對這霎in就離開彼个在來的沙漠生活，來入佇出奶佮蜜的迦南地啦！

  希伯來進入當時的迦南文化- in已經會曉用箭形文字，這咱已經議論了-是極點啦！In的社會生活極複雜，遐的沙漠的囝仔的生活是佮in袂比得。自然in的宗教也是大各樣。In的上帝是巴力-逐所在有巴力的祭壇佮聖所，-列王的記者稱伊做「山頭壇。」這个巴力是農業的神，(以外猶有濟濟款的神，-巴比倫的亞斯他錄，天象，等等)。

  這款的情形，通講是希伯來宗教的危機，因為這是希伯來主義佮迦南主義，耶和華主義佮巴力主義的爭鬥啦！佇這款的對立，紲生起3款的黨派。

  (1) 盲進的，抑是急進的。這派，是不管甚物事，攏是學迦南人的款，無論宗教，抑是社會方面攏是按呢，所以in的生活，就是「對按呢以色列人徛起佇迦南人，赫人，亞摩利人、比利洗人、希未人、耶布斯人的中間，娶in的查某囝做某，也用查某囝嫁in的囝，紲服事in遐的上帝(士師 3：5，6)。連熱心的士師基甸，都對迦南人的中間公然來娶細姨 (士師8：31)。這款的傾向，不止有影響in的耶和華觀。就是in拜巴力，紲佇山頭壇來服事耶和華(I撒9：12，13，10：5；I王22：43)。對按呢生起一種耶和華，巴力的混合神。

這號思想毋若平民若定，有進入到王宮內。押沙龍刁持去希伯崙下願(II撒15：7)。所羅門也去基便敬拜(I王 3：2-5)。當時猶未有為著耶和華的名起殿，所以百姓猶原佇山頭壇獻祭(I 王 3：2)。這號的傾向到B. C. 621年約西亞王13年的大改革才禁止(II王 23章)。

  這个傾向的指導者，抑是代表者是「祭司，」這也是對in的生活上的厲害關係來--的。到尾紲用遮的獻祭的儀式，來飽in私己的腹肚(I撒3：13-16)。

  (2)保守的- 國粹保存黨。極端主張原始的希伯來思想，in的代表者是「拿撒勒人」(彼个詳細的規定請看民6章，新翻譯舊約「拿細耳人」)佮「利甲人」(in的特色請看耶35章)。In對原始的耶和華的禮拜極其忠實，不時為著保全耶和華的禮拜teh盡力(士師4：17-5：24；II王 10：15-)。

  (3)中庸的。這派的代表者是「先知人-預言者。」佇舊約最初記載「先知」的事是 (I撒 10：1-12)，遮的先知有共通的現象，就是用音樂(I撒 10：5；II王 3：15)，抑是傷家己的身軀(I王 18：28)，來入恍惚的狀態，對按呢通聽上帝的聲，來解決時代的問題。

  當初in的地位真低 (I撒 10：11，12；II王 9：11)。這是in源起頭的狀態真粗魯，毋久in的宗教的活命有漸漸進化，到尾通干涉萬般的政務，閣好膽來傳上帝的話(II撒 12：7)。按呢in也毋是急進黨，也毋是保守黨，干焦佮上帝交陪，聽上帝的聲，理解上帝的聖旨，來應時代的要求。因為按呢才講in是「中庸的。」遮的先知的發達通分3站：-

  a)對源起頭到A-mô͘-sū。就是對拿單，迦得起，經過以利亞佮以利沙摻伊的學生到A-mô͘-sū的時代，in的發達。對外有組成先知的學生團體(I王 20：35；II王 4：1)。對內，就是相出「耶和華文書」佮「以羅欣文書。」這兩項文書，是做A-mô͘-sū倫理的讖語(倫理的預言) 的先鋒，亦遮的佮別物資料佮成「律法的冊，」抑是講「摩西的五經。」

  b) A-mô͘-sū起，到受掠的時代。通講這時代希伯來預言的黃金時代。預言北國以色列的先知有A-mô͘-sū，何西阿；預言南爿猶大的先知有以賽亞，彌迦，哈巴谷，那鴻，西番雅佮耶利米。

  c)對受掠起，到預言的終局。這个時代，預言思想有受著祭司思想真大的影響。佇巴比倫裡有以西結，第二以賽亞，佇猶太本土裡有哈該，撒迦利亞，俄巴底亞，瑪拉基，約拿佮約珥。今遮的先知佇逐時代攏有大的貢獻：-

  1)教示人知宗教有含責任，in有這个責任才有in的特權 (A-mô͘-sū 3：1，2)。

  2)上帝較愛宗教的愛情，毋是儀式的宗教(何西 6：6)。

  3)對社會的壓迫所發出社會的良心的聲(II撒 12：7，I王 21：17-)。

  4)宗教的本質不在思想，是在佇經驗(I王 18：21，22)。

  5)分別職業的宗教家佮直接對上帝召的先知(A-mô͘-sū 7：12-15)。請咱會記得，先知也有真佮假；總是佇遮講假先知，毋是伊刁持欲講瞞騙，是in無聽對頂面來的聲，只有趁in的頭腦所推測--的啦！真的先知是in也有用頭殼來想，總是較要緊是聽上帝的聲。因為先知毋是講袂來的事若定，要緊是做上帝代表，替上帝講話的人。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461