六甲教會
1934.9，no.594，pp.18
佇7月29號，新任議長王守勇牧師有來本會開問道會，有一名來求進教。小會議准接納伊進教，佇8月12號頂晡10點，有行洗禮予一个大人，一个小兒，下晡同守聖餐。陪餐者男女共14名，獻金3.88，因為收冬期較少人。頂晡禮拜30外；下晡34名出席。
這間教會本是共遮的人稅一間店做禮拜堂。感謝上帝，這幫施Chú-keh先生娘歡喜將伊6500箍買的一座樓，暫時獻做集會的路用，所以現時集會真好勢。向望會漸漸興起。
本教會有兩个執事，因為失落一个，所以這幫照規矩投票，邱善德兄中選；佇8月12號，有設立伊做執事來鬥料理教會。
(李傳報)。
La̍k-kah Kàu-hoē
1934. 9, no. 594, pp. 18
Tī 7 goe̍h 29 hō, Sin-jīm Gī-tiúⁿ Ông Siú-ióng Bo̍k-su ū lâi Pún-hoē khui būn-tō-hoē, ū chi̍t miâ lâi kiû chìn-kàu. Sió-hoē gī-chún chiap la̍p i chìn-kàu, tī 8 goe̍h 12 hō téng-po͘ 10 tiám, ū kiâⁿ Sé-lé hō͘ chi̍t ê toā lâng, chi̍t ê siáu-jî, Ē-po͘ tâng-siú Sèng-chhan. Poê-chhan-chiá lâm-lú kiōng 14 miâ, hiàn-kim 3.88, in-uī siu-tang kî khah chió lâng. Téng-po͘ lé-pài 30 goā; ē-po͘ 34 miâ chhut-se̍k.
Chit keng kàu-hoē pún sī kā chia ê lâng soè chi̍t-keng tiàm chò lé-pài-tn̂g. Kám-siā Siōng-tè, chit pang Si Chú-keh Sian-seⁿ-niû hoaⁿ-hí chiong i 6500 kho͘ bé ê chi̍t-chō lâu, chiām-sî hiàn-chō chi̍p-hoē ê lō͘-ēng, só͘-í hiān-sî chi̍p-hoē chin hó-sè. ǹg-bāng ē chiām-chiām heng-khí.
Pún Kàu-hoē ū nn̄g ê chip-sū, in-uī sit-lo̍h chi̍t-ê, só͘-í chit pang chiàu ku-kí tâu-phiò, Khu Siān-tek hiaⁿ tiòng-soán; tī 8 goe̍h 12 hō, ū siat-li̍p i chò chip-sū lâi tàu liāu-lí kàu-hoē.
(Lí Thoân pò).
